Auaunaga: O Lo Tatou Olioli Sili

Saunia e Marco Antonio Velez de Villa Gomez, Lima, Peru

I lo’u valaauga fou, sa ou lagonaina ai se mea ou te le’i lagonaina muamua.

I le taimi o le faama’i pipisi o le KOVITI-19, o i latou o e na i ai ni galuega mautu i Peru sa i ai pea ni tupe maua, ae o le toatele o tagata Peru o i latou o tagata e faatau atu mea i luga o le auala. Sa lē tatau i tagata ona tuua o latou fale ona o le sa, o lea sa toatele ai tagata sa le mafai ona galulue.

I se tasi aso na taunuu mai ai se vaega o se ausiva ma se faaili i le matou auala ma amata ona faafiafia. Sa tau’ai mai e tuaoi tupe siliva mai o latou faitotoa. O i latou sa leai ni tupe na tuuina atu ia i latou ni meaai.

Sa nutimomoia ai lo’u loto i le vaai atu i tagata o loo i ai manaoga faapena. Sa le tele ni mea na maua e lo’u aiga, ae sa tele atu mea na matou maua nai lo i latou. Sa matou fesoasoani ia i latou i le mea sa matou mafaia.

O lena aafiaga na aoaoina ai a’u e silafia i tatou e le Alii ma o tatou manaoga, ma sa aoga lelei ia te a’u i lo’u valaauga o se epikopo. Faatasi ai ma le tiutetauave manaia o le tausia o fanau a le Atua, sa ou lagonaina ai se mea i lena valaauga ou te le’i lagonaina lava a o auauna atu i isi valaauga.

Ina ua toe faaauau ona ou faigaluega ina ua uma le faama’i, e masani ona ou foi i le fale pe tusa o le 8:00 i le afiafi. Ona ou aga atu lea i le falesa e faatautaia faatalanoaga ma tagata o e manaomia fautuaga ma auaunaga. O nisi taimi e tuai ai faatalanoaga.

A o auauna atu, sa ou lagonaina le alofa tele o le Alii mo Ana fanau. O se lagona ofoofogia lena ou te le’i lagonaina muamua. O nisi taimi ou te toe foi ai i le fale ma le tagi.

O isi taimi, sa ou lagona le vaivai ma le lē malosi, ae sa lagolagoina a’u e le Alii i lo’u taimi o se epikopo. Sa lagolagoina foi a’u e lo’u toalua, ma sa ou faafetai ona sa mafai ona vaai la’u fanau ia te a’u o auauna atu i le Alii.

Sa amata foi ona ou malamalama i le alofa tele o ō tatou taitai mo i tatou. Ou te faafetai mo le auala na fesoasoani ai lena malamalama i la’u molimau ia tuputupu a’e. Ma ou te faafetai na faamanuiaina a’u e le Alii i le meaalofa o le alofa mama (tagai i le Moronae 7:46–48).

Ou te lagona na tuuina mai e le Atua ia te a’u se avanoa e auauna atu ai lea ou te le’i agavaa i ai. E masani ona ou fesili ifo ia te a’u lava, “Aisea ua tupu ai ia te a’u?” Sa oo ina ou malamalama e alofa le Alii ia te a’u ma iloa se mea i totonu ia te a’u ou te le’i vaaia ia te a’u lava ia.

E leai se mea tatou te lē maua i le galuega a le Alii. Mai gaoioiga uma e mafai ona tatou auai ai e ala i Lana Ekalesia, ou te iloa o le auaunaga, auauna atu i isi, ma le avea ma aao o le Alii i taimi faigata tatou te maua ai lo tatou olioli sili (tagai i le Mosaea 2:17).