“O Le Mea Sili e Mafai ona Tatou Tuuina Atu i o Tatou Aiga,” Liahona, Fep. 2026.
Sau, Mulimuli Mai ia te A’u
O le Mea Sili E Mafai Ona Tatou Tuuina Atu o Tatou Aiga
E tatau ona tatou faia mea uma tatou te mafaia e faalautele atu ai le malamalama ma faamanuiaga o le talalelei i a tatou fanau ma i isi.
Ata na tusia e Casey Nelson
I le popofou o lo’u olaga, sa tauivi o’u matua i le la faaipoipoga, ma sa aafia ai lo matou aiga. Ina ua iloa e le uo a lo’u tina lenei mea, sa ia fai atu i lo’u tina, “E a pe a e sau ma aoao e uiga i la’u ekalesia?” Fai mai lo’u tina e lei saunia i la’ua ma lo’u tama mo lena mea. Sa fai mai lana uo, “Aisea la e te le faatagaina ai a’u e ave lau fanau faatasi ma a’u?” Sa lima o’u tausaga i le taimi lena. Sa valu tausaga o lo’u tuafafine.
O lenei uo lelei na aveina a’u ma lo’u uso i le lotu mo ni nai tausaga. Ou te manatua lo’u mauaina o le olioli o le talalelei toefuataiina a Iesu Keriso. A o tuputupu ae la’u molimau, sa ou moomoo ma tatalo mo o’u matua ina ia aoao e uiga i le talalelei. Ina ua filifili lo’u tuafafine e papatiso, sa lagona e o’u matua e tatau ona la sailia sina mea itiiti e uiga i le Ekalesia.
A o amata ona aoao o’u matua e uiga i le moni o le talalelei, sa ou vaaia se suiga o le loto ia i la’ua. Sa faalotomaualaloina i la’ua, ma sa la’ua taliaina le talalelei. Ina ua mavae le tausaga talu ona la auai i le Ekalesia, sa atoa lo’u valu tausaga ma sa papatisoina a’u e lo’u tama. Sa faafofoga ma tali mai le Tama Faalelagi i a’u tatalo.
I le tolu tausaga mulimuli ane, na faapaiaina ai le Malumalu o Mekisiko Aai o Mekisiko. Sa ou maua le avanoa matou te o ai iina ma lo’u aiga. Sa matou tootutuli i se fatafaitaulaga matagofie ina ia faamauina faatasi e faavavau, ma sa matou olioli i folafolaga ma faamoemoe ua aumaia e Iesu Keriso ma Lana talalelei. I ni tausaga mulimuli ane, sa faamauina ai i ma’ua ma lo’u toalua i le maota lava lea e tasi o le Alii.
Ou te manatua le taimi na fanau ai la’u tama ulumatua. I na taimi mu’amu’a ina ua ou opoina o ia i o’u lima, sa lofituina a’u i le mama a’ia’i o lo’u afafine laitiiti ma e ala i le alofa faalenatura ma le manao na ou maua i le avea ai ma ona tama e puipui o ia, tausia o ia, ma aoao o ia i le mea sili e mafai ona ou tuuina atu ia te ia. I le mafaufau ai i tulaga o lenei lalolagi pa’ū lea na oo mai i ai talu ai nei lo’u afafine, sa tuputupu ae ai ia te a’u se lagona malosi o le faamoemoe ma le tiutetauave ona o feagaiga na ma osia ma lo’u toalua ma le Alii i totonu o le malumalu. Sa ou iloaina o le mea sili e mafai ona ou aoao atu i lo’u afafine—ma, i le taimi, o la’u fanau uma—o le talalelei a Iesu Keriso. O le mea tonu lava lea sa faia e le Alii ia i tatou mai lava i le amataga.
O Se Tiutetauave Paia
Na faatonu e le Alii ia Atamu e aoao lana fanau “e ao i tagata uma, i soo se mea lava, ona salamo, po o o le a leai se ala e mafai ai ona latou mautofi i le malo o le Atua. …
“O lea Ou te tuu atu ia te oe se poloaiga, ia aoao saoloto atu ia mea i lau fanau, ua fai atu:
“… E faapea lava ona tatau ona toe fanauina o outou i le malo o le lagi, i le vai, ma i le Agaga, ma faamamaina i le toto, o le toto lava lea o la’u Toatasi na Fanaua; ina ia mafai ona faapaiaina outou mai agasala uma, ma olioli i afioga o le ola faavavau i le lalolagi lenei, ma le ola faavavau i le lalolagi a sau. …
“Ma o lenei, faauta, Ou te fai atu ia te oe: O le fuafuaga o le faaolataga lenei mo tagata uma” (Mose 6:57–59, 62).
O le aiga o le nofoaga sili lea mo le aoaoina e uiga i le talalelei a Iesu Keriso. Na aoao mai Peresitene Dallin H. Oaks, Fesoasoani Muamua i le Au Peresitene Sili, “E moni lava, o loo i ai uma [se tama ma se tina], faatasi ai ma meaalofa eseese e taiala ai le tuputupu ae o [a laua fanau].” Ae tusa lava pe le lelei tulaga, e mafai lava ona tatou aoao a tatou fanau i le aoaoga faavae a Keriso ma le taua o le taliaina ma le faaaogaina o le Togiola a Iesu Keriso i o latou olaga. Ma, e faamoemoe, o le a totogo a’e le talalelei i o latou loto.
E fesoasoani le talalelei ia i tatou e aoao a tatou fanau e aoao le eseesega i le va o le lelei ma le leaga. E iai taimi o le a latou “tofo i le oona, ina ia latou iloa ai ona faataua le lelei” (Mose 6:55). A o aoao a tatou fanau, e avea i latou ma “pule ia i latou lava” (Mose 6:56). E mafai ona latou filifili e mulimuli i mea tatou te aoao atu pe filifili e le faia, ae e le o tuua na o i tatou pe a tatou faataunuuina lenei tiutetauave paia.
O Le Meaalofa o le Agaga Paia
Afai tatou te talitonu ia Iesu Keriso, salamo, ma papatisoina, ua fetalai mai le Alii, “O le a e maua le meaalofa o le Agaga Paia” (Mose 6:52). O se tasi lenei o meaalofa silisili e mafai ona tatou maua. E leai se isi soa e sili atu e faamamaina ma faapaiaina i tatou ma suia o tatou natura mo le lelei sili atu, “ma faapaiaina atili ai i tatou, sili atu ona atoatoa, e pei o le Atua (tagai i le 3 Nifae 27:20).”
E tatau ona tatou faia mea uma tatou te mafaia e fesoasoani ai ia tatou fanau ma isi ia iloa o le Agaga Paia o se faamanuiaga moni lava ma o se meaalofa taua mai le Atua. O le Agaga Paia “ua tuuina atu e mau ia i [tatou]; o le mau o le lagi; o le Fesoasoani; o mea filemu o le mamalu ola pea; o le upumoni o mea uma; o lē e faavaveina mea uma, lea na te faaolaina mea uma; o lē na te silafia mea uma, ma ua i ai le mana uma tau i le atamai, alofa mutimutivale, upumoni, fai mea tonu, ma le faamasinotonu.
Faatasi ai ma mea e sili ona lelei e mafai ona tatou faia mo o tatou aiga o le fesoasoani lea ia i latou e aoao e faalagolago i le Atua i o latou olaga atoa ma ia tumau ai pea i le faatumauina o le mafutaga faifai pea a le Agaga Paia.
E Matuai Aoga ai Taumafaiga Uma
Ou te faafetai mo lo’u malamalama i le talalelei a Iesu Keriso. Ou te faafetai mo le tiutetauave ma le avanoa na ma maua ma lo’u toalua e faalautele atu ai lenei malamalama ma faamanuiaga o le talalelei i le ma fanau ma isi.
O lenei mea o se faasologa e faifai pea. O loo ma galulue pea ma lo’u toalua i le aoaoina o le ma fanau, ma o loo latou faia a latou lava faaiuga e faavae i luga o le faitalia ua saunia e le Atua mo i latou. O le faaauau pea ona aoao saoloto atu nei mea i a tatou fanau o le mea sili lea e mafai ona tatou faia mo i latou, ma e matuai aoga ai taumafaiga uma. Ua ou iloa lenei mea mai o’u aafiaga. Ua ou vaai i le ala ua faamamaina ai a’u ma o’u manaoga e le Faaola ma Lana talalelei. E le mafai ona ou vaai faalemafaufau i le mea o le a ou i ai pe ana leai lena mea. O le a se mea semanu e tupu i lo’u aiga o loo ola a’e i se tamai nuu maotua i le ogatotonu o Mekisiko pe ana faapea matou te lei mauaina le talalelei toefuataiina? E le mafai ona ou vaai moni lava ia te a’u i se isi lava ala.
E matuai aoga ai taumafaiga uma e talia ai le valaaulia a le Faaola ia tauivi ia atoatoa e pei ona i ai o Ia ma lo tatou Tama oi le Lagi (tagai i le 3 Nifae 12:48) ma ia uunaia e pele ia i tatou ia faia foi faapea. A o tatou faia lenei mea, o le a iu ina tatou paia e pei ona i ai i Laua. Ma e ui ina tatou aafia i le saua, faigata, ma amioletonu i lenei olaga, ae o loo i ai le faamoemoe e ala i le Togiola a Iesu Keriso (tagai i le Moronae 7:41). O sauniga ma feagaiga o Lana talalelei e fusia ai i tatou—ma o tatou aiga—ia te Ia ma lo tatou Tama Faalelagi, o e ua faia mea uma e mafai mo lo tatou fiafia e faavavau.
Tau ina ia tatou taumafai e faia mea uma tatou te mafaia e fesoasoani ai i a tatou fanau ma i latou tatou te alolofa i ai ia ola i le talalelei a Iesu Keriso. O le mea sili lea e mafai ona tatou tuuina atu ia i latou i le taimi nei ma le faavavau.