O Iesu Keriso: O Lo Tatou Puatalefusi Faavavau ma Paia

E alofa le Tamā Faalelagi i Ana fanau uma. Mai taimi anamua e oo mai i le Toefuataiga o le talalelei a Iesu Keriso i lenei tisipenisione , sa Ia taialaina le au faatuatua i luga o vasa loloto agai atu i nuu o le folafolaga, ma faataunuuina ai Ana feagaiga.

I le Tusi a Mamona, na fauina e sa Iareto ni vaa i lalo o le taitaiga a le Alii ma folau ai i luga o le moana loloto, e faalagolago i Lona mana. E ui i afa ma tofotofoga, sa faasaoina i latou ma taunuu ai i le nuu o le folafolaga. Na faapena foi, ona poloaiina Nifae e fau se vaa. Faatasi ai ma lona aiga ma le aiga o Isamaeli, sa latou malaga ai i le vasa, ma faalagolago i le Atua ma sa taitaiina ai e le Agaga i lo latou tofi folafolaina.

I popofou o le Ekalesia toefuataiina, sa faalogo le Au Paia faamaoni i Europa i le talalelei e ala i faifeautalai tuuto. Sa momomo o latou loto ma sa suia ai o latou olaga e faavavau. Faatasi ai ma le faatuatua lē maluelue, sa tuua o latou aiga, faaee vaa, ma folau loa agai i Siona, e saili le malutaga faaleagaga ma faamanuiaga o feagaiga.

Sa savavali nei soo faamaoni i le usiusitai, o o latou olaga na faailoga i le tausiga atoatoa o poloaiga—o le fuataga moni o le avea ma soo.

E ala i nei faataitaiga, tatou te molimauina ai lena mea i tupulaga uma, ua valaau e le Alii Ana fanau e faalagolago ia te Ia ma agai i luma i le faatuatua agai atu i faamanuiaga ua Ia saunia. Pe asaina vasa pe ui atu i tofotofoga faaletagata, Na te taitai i tatou i o tatou nuu folafolaina.

Sa latou tali atu i faatonuga faalelagi i le lotomaualalo ma le faatuatua. Pe o le fauina o vaa, laasia vasa, po o le tuua o nuu moni, sa latou faalagolago i le Alii ma le faamoemoega atoa o le loto. O a latou tala o molimau, molimau o le liua ia Keriso. Ua faamalosia la‘u molimau i lo latou lototoa ma sa valaaulia ai au e mulimuli i le Faaola ma le lotomaualalo.

Ou te manatua le ola ae i le motu tuufua o Vava‘u i Toga. O le mea e tasi sa tumatila ina ua ou matua: o le mitamitaga ma le migao na umia e o‘u matua, matuamatutua, tuaoi ma tagatanuu mo le igoa o le matou uafu—Puatalefusi.

E tele ina ou manatunatu pe aisea e tauave ai e lenei igoa lea mamafa i o latou loto, o lea na amata ai ona ou fesilisili. E ui ina sa leai ni faamaumauga tusitusia, ae sa faifai pea lava ma lagonaina i le loto. E tasi le upumoni e aliga i tali uma: sa iloga tagata o Vava‘u i lo latou talimalo lelei. I le aganuu a Toga, e maua lea agaga i le fasifuaitau “Fatafata Mafana”—o se loto e mafanafana, mutimutialofa, ma alofa, I le naunau e aoao atili, sa ou maua ai se talafaasolopito tusia i luga o le initoneti.

E tusa ai ma le The Journal of Pacific History, i le 1780, sa folau ai le Kapeteni Sipaniolo o Francisco Antonio Mourelle i le La Princesa mai Filipaina i Mekisiko. Sa matua matautia le malaga i le Vasa Pasefika—sa pagatia le auvaa i le leai o ni meaai ma ni vai, ma sa matuai manaomia ona faaleleia le vaa a o latou tauivi ma le ogaoga o faama‘i pipisi ma masini ua faaleagaina.

Ia Mati 1781, “Sa latou muai vaaia Fonualei ma i le iloa ai e naumati, sa faaigoaina ai o Amargura (oona). Sa latou faaauau i Late, ae sa le mafai ona latou maua se taulaga o vaa, o lea sa latou faaauau ai i Vava‘u ma taula ai e lata i le nuu o i ai nei o Longomapu i le aso 1 Mati 1781. Na faaigoa e Kapeteni Mourelle le uafu o Puerto del Refugio—o le Uafu o le Sulufaiga—ona o lo latou tulaga atuatuvale ma le talimalo lelei sa faaalia ia i latou. I aluga o le tolu vaiaso sa latou nonofo ai iina, sa mafai e le au Sepania ona toe saunia ma toefaaleleia lo latou vaa. Sa latou tuua Vava‘u i le aso 19 Mati 1781 . . . ma folau atu i San Blas e faamaea la latou misiona.”

O le igoa lea o le, Uafu o le Sulufaiga, na talia ma le alofa ma faaliliuina e tagata Toga i le Puatalefusi—o se igoa ua tauaveina nei le taua loloto faaleagaga ma faaleaganuu. Ua faatusa i se uafu faaletino ma se nofoaga paia o le mafanafana, mutimutialofa, ma le sulufaiga, e atagia ai le agaga o tagata Toga o Fatafata Mafana.

E i ai taimi i la tatou malaga i le olaga nei i le taimi e lagona ai le vaivai e o tatou agaga ma lagona ai foi e o tatou loto e faapei o Fonualei—e oona, lilofia i faigata, ma e mamao mai le filemu. Tatou te sasi, tatou te tautevateva, ma lagona le le agavaa ona o le agasala. O taimi ia, e galala ai o tatou agaga mo le faamalologa, mo le alofa tunoa, mo le malutaga.

Ae ua ofo mai e le Faaola, i Lona alofa e le muta, ia i tatou le Puatalefusi—o se Uafu faaleagaga o le Sulufaiga—i vaiaso taitasi e ala i le sauniga o le faamanatuga. Sa aoao mai e le Faaola:

“Aua faauta, Ou te fai atu ia te oe, e lē afaina po o le a le mea tou te aina pe o le a foi le mea tou te inuina pe a outou taumamafa i le faamanatuga, pe afai tou te faia ma le manatu tasi i lo‘u mamalu—e faamanatu ai i le Tamā lo‘u tino sa tuu i lalo mo outou, ma lo‘u toto sa faamaligi mo le faamagaloina o a outou agasala” (Mataupu Faavae ma Feagaiga 27:2).

O le faamanatuga o se avanoa paia mo le toefaafouina o feagaiga, mutimutialofa e le muta, ma le toefaafouga paia. E ala i Lana Togiola, ua valaaulia i tatou e o mai ia te Ia, ia fafagaina i le areto ma le vai o le feagaiga, ma ia faaatoatoaina ai. O iina e fonofono ai vaa ua malepelepe, tatou te salamo ai, toetaulai atu ai i a tatou feagaiga, ma maua ai foi e o tatou agaga ua vaivai le filemu ma le olioli ia te Ia.

Tatou savavali i le lotomaualalo, valaaulia uo e auai mai i sauniga faamanatuga, ma faalagolago i Lana upu. O Ia o lē sa taita‘ia sa Iareto, Nifae, ma paionia o le toefuataiga, o le a taita‘ia foi i tatou i lo tatou aiga faalelagi. Manatua, po o le a lava le mamao tatou te tafefea i ai, e tumau lava Lona alofa, ma e tatala mai pea Ona aao.

Ou te iloa o Iesu Keriso o lo tatou Faaola ma le Togiola. E alofa le Tama Faalelagi ia i tatou taitoatasi, i le suafa o Iesu Keriso. Amene.