Malumalu, Molimau ma se Opo a se Tamā

Na faafuasei ona ma‘i tigaina le tamā o Taaken Iobi. “Sa ou talanoa ia te ia i se tasi po ma sa manuia o ia ma malosi,” o lana tala lea, “ona oo lea i le aso na sosoo ai . . . sa matuai ese lava lona tagata . . . ua le mafai ona gaioi ua le mafai foi ona tautala.”

I le mavae ai o le lua vaiaso i le falemai, sa le mafai lava e fomai ona faamalamalama le ma‘i supa faanimonimo ma le le mafai ona tautala. Sa sili ona faigata le tulaga mo Taaken ona sa i Hawaii o ia mo le aoga a o lona aiga e i Kiribati i lo latou nuu. “E matuai vavamamao lava i matou,” o lana tala lea.

Lima tausaga na muamua atu, sa 20 tausaga o Taaken ina ua malaga o ia i Niu Sila e faamisiona mo Le Ekalesia a Iesu Keriso o le Au Paia o Aso e Gata Ai. O le taimi muamua lea ua malaga ese ai o ia mai Kilipati ma o ia foi le tagata muamua o ona tei na tuua.

Sa vave ona liua le fiafia i le ma‘imanatu, ma i lana uluai telefoni i lona tamā, sa le mafai ona tautala i se upu—sa na o lona tagi. Ina ua iu ina ia ta‘u atu i ona matua ua manao o ia e sau i le fale, sa la faamalosiau atu ia te ia e nofo.

Sa matuai faafetai Taaken ina ua maea lana misiona. I le mavae ai ona faamalolo o ia i le 2022, sa le mafai ona alu loa lava o ia i le fale. Sa taofia o ia ona o le faama‘i oti o le KOVITI- ma le mafai ai ona lele i Kiripati, o lea sa alu sa‘o ai loa o ia i le Iunivesite o Polika Iaga ma amata ai lona faailoga o le suesueina o le talimalolelei.

Sa talanoa Taaken i lona aiga i aso uma i luga o upega tafailagi ma vitio. E le tutusa ma le faatasitasi, ae o le faalogo atu i leo o ona matua i aso taitasi na fesoasoani e faafesootai le vavamamao.

E i ai se nofoaga faapitoa o lona tamā i le loto o Taaken. “O ia o se tagata alofa . . . e alofa tele o ia ia te au ma nai o’u tei.” Na te manatua le popolega tele o lona tamā pe a ma‘i se tasi o lana fanau. Na te faia mea uma na te mafaia e faatau ai a latou meaai ia sa faigata ona maua i le motu, pei o “apu! Ioe,” e ataata Taaken i le manatuaina.

O se taimi o le a ia le faagaloina lava na tupu i le aoga maualuga. Na maua e Taaken sona lipoti leaga i le aoga, ma sa le fiafia ai ina ua faitau atu e le faiaoga ia te ia, ae ina ua tuua e Taaken le potuaoga, sa te‘i o ia i le vaaia o lona tamā—e faigaluega i le au kamuta a le aoga—o nofo i le faletele, ma faalogologo atu ai.

O le taimi lava na vaaia ai e lona tamā lona afafine o tagi, sa tagi foi o ia. “Sa ma fetagisi faatasi,” na ata ai Taaken. “Sa ou tagi ma tilotilo atu ia te ia, sa tilotilo mai foi o ia ia te au ma tagi.” O ona lava foi loimata, sa fesoasoani ai lona tamā e tauave le le fiafia o Taaken.

I le mavae ai o tausaga, i le faitauafe o maila le mamao, na matuai taia leaga ai lava Taaken i le tala e uiga i le ma‘i o lona tamā. Sa le mafai ona taulai o ia i ana meaaoga po o lana galuega, ma na pau le mea sa mafai ona mafaufau i ai o lona tamā i lo latou aiga, ua le mafai ona gaioi pe tautala. “Na toulu o‘u loimata i nisi taimi ona na pau le mea [sa i ai] i lo‘u mafaufau o lo‘u tamā . . . ma e ese le faigata o lena mea,” o lana tala lea.

O le taimi lea, sa nofo latalata ai Taaken i le Malumalu o Laie Hawaii, ae sa le‘i alu soo i ai. Sa ia lagona se uunaiga e toe foi, ae sa ia lagona le tausalaina. “Sa ou le mautinoa pe mafai ona faafofoga mai le Tama Faalelagi i la‘u tatalo ona sa ou taumamao mai ia te Ia mo se taimi,” na ia tautino ai.

Ae ui i lona tausalaina, sa ia iloa ua na o le Atua e mafai ona faamafanafanaina o ia. Sa tonu ia te ia e galue i le faatuatua ma amata ona alu i le malumalu i aso taitasi e tatalo ai mo le manuia o lona tamā.

Ona tupu ai lea o se vavega. Sa amata ona toe faasolosolo manuia lona tamā. Sa le‘i vave ona maua le faamalologa ae sa i‘u ina mafai ona ia toe tautala. “O le a umi se taimi faatoa malosi atoa lea,” na fai mai ai Taaken, “ae ua ou lagonaina moni lava sa fesoasoani mai le Tama Faalelagi ia te au e ala i le fesoasoani ia toe malosi lo‘u tamā.”

Toeitiiti atoa se tausaga a o lei ma‘i lona tamā, e fa tausaga talu ona tuua e Taaken lona aiga, sa mafai ai loa ona toe lele o ia i Kiripati. Sa tonu ia te ia e faate‘i lona aiga, ma ina ua ia savali atu i le faitotoa, sa faataupupula ae lona tamā ia te ia mo ni minute atoa se lua e aunoa ma se upu.

“Na pau le mea sa mafai ona ou vaaia o loimata i ona mata,” na manatua ai e Taaken. Sa fesili lona tamā, “Aisea na e le ta‘u maia ai o le a e toe foi mai?” Ona la fetagisi faatasi ai lea. “O le taimi aupito sili lea,” o lana tala lea.

O le taimi nei, o loo faaauau pea ona faaopoopo le malosi o lona tamā. O lea aafiaga ua malosi ai le molimau a Taaken i le alofa o le Tama Faalelagi, e pei ona atagia mai i le alofa o lona tamā faalelalolagi.

Sa ia aoaoina e faapea, tusa lava pe tatou te faataumamaoina i tatou lava mai ia te Ia, ae e i ai lava o Ia iina, o faatalitali mai ma aao mafola, ua saunia e talileleia i tatou i le fale.