Kapistahan 2025: Usa ka Selebrasyon sa Pagtuo ug Musika

“Kon motuo ka, mabalhin nimo ang labing taas nga mga bungtod!” nagkanta ang daghang katawhan nga mga 2,500 nga kabatan-onan ug mga young single adult samtang gibuksan ni Xia Vigor ang Kapistahan 2025: Usa ka Konserto sa Kabatan-onan. Dihang si Xia, usa ka inilang batan-on nga artista sa TV ug salida, nagsugod sa pagsayaw uban sa iyang back-up nga mga tigpasundayag, ang mga nanan-aw miulbo sa pag-abiba.

“Ania kita dinhi kay gihigugma nato ang Ginoo, ganahan kita og musika, ug ganahan kita nga mopadayag sa atong pagtuo pinaagi sa musika!” Mipayahag si Xia human sa pag-abi- abi sa tanan ngadto sa una gayod nga Strive to Be [Maningkamot nga Mahimo] nga konserto sa Pilipinas. Gipahigayon niadtong Agosto 2, 2025, didto sa Waterfront Insular Hotel Pavilion sa Davao City, ang konserto gipasundayag nga live, nga adunay sobra sa 15,000 nga batan-on nga mga Santos sa Ulahing mga Adlaw ang miapil og tan-aw sulod sa mga meetinghouse ug sa mga panimalay sa tibuok nasod.

Human sa pambukas nga awit, giawhag ni Xia ang mga nanan-aw nga magpadayon sa pagkanta ug pagsayaw agig pagsaulog sa pagtuo ngadto ni Jesukristo. Dayon iyang gipaila si Daniel Costales ug Brandon Kyle Sorilla, kinsa mipasundayag sa “Stronger” kuyog sa mga kabatan-onan ug YSA nga mga dancer. Misunod si Ysabelle Cuevas sa paspas nga bersiyon sa iyang orihinal nga kanta nga “Beloved,” nga sa kadugayan giapilan ni Xia, Daniel, ug Brandon sa pagtapos sa mao nga yugto.

Gipahinay ni Brandon ang tempo pinaagi sa “I Need Your Strength,” gisundan sa duha ka pinulongan nga rendisyon ni Nivera sa “Look Unto Christ [Tan-awa S’ya].” Ang interfaith nga yugto mipakita sa kampiyon sa The Voice Kids 2024 nga si Nevin Adam Garceniego ug sa taga Davao nga grupo nga Songspell, nagpasundayag og makapuno sa kalag nga pasundayag sa “Fear Not.” Mibalik si Daniel nga nagkanta sa “His Work,” nagdasig sa mga kabatan-onan sa pag-apil sa batalyon sa Ginoo, samtang si Sariah Gayola mipabati sa tanan og kasegurohan pinaagi sa “Never That Bad.” Si Brandon ug Noreen nagdungan sa “I Can Do All Things,” gisundan ni Ysabelle sa iyang “Disciple of Christ.”

Ang labing nindot nga bahin sa konserto mao ang Strive to Be Theme Song Medley—“I Will Go and Do,” “A Great Work,” “Trust in the Lord,” ug “Peace in Christ [Kalinaw diha ni Kristo]”—nga gipasundayag sa tibuok grupo. Alang sa kataposang pasundayag, ang K-pop idol nga si Chanty Videla nangulo sa kadaghanan sa “Carry Me,” nga giapilan sa tanang 16 ka dancer ug 10 ka back-up nga mga tigkanta.

Bisan nagkasakit siya sa pipila ka adlaw sa wala pa ang konserto, si Noreen mihatag og kinasingkasing nga pasundayag. “Giatake ko sa hubak ug nabalaka nga dili ko makakanta,” misulti siya. “Apan nag-ampo ko ug misalig sa Ginoo. Ang ako lamang gipanghinaot nga mabati sa mga nanan-aw ang Espiritu. Mapasalamaton ko nga gitubag ang akong pag- ampo—perpekto ang pagkahimo sa konserto, sama sa Iyang giplano.”

Si Brandon nakahinumdom og makatandog nga takna atol sa teknikal nga pag-ensayo. “Sa miaging gabii sa wala pa ang konserto, atol sa FSY nga Medley, napalong ang tanang suga. Apan nagpadayon ang musika ug ang mga mic, mao nga nagpadayon mi sa pagkanta. Gipasiga sa mga nanan-aw ang mga suga sa ilang phone ug giwarawara kini duyog sa musika. Nakatandog kadto sa pagbati. Nagtulo ang akong luha samtang nagtan-aw sa kadaghanan nga nanganta dungan namo. Nagpahinumdom kadto kanamo nga sa mga panahon sa kangitngit, mosalig sa Ginoo—Siya mogiya kaninyo ngadto sa kahayag.” Mibalik og siga ang mga suga sakto sa ilang pagkanta sa kataposang linya: “Mosalig kita sa Ginoo.”

Dihang gipangutana kon unsay iyang nakat-onan gikan sa maong kasinatian, ang 17 anyos nga singer nga si Lian Villejo nga taga Buhangin Stake miingon, “Ang kinabuhi dili sama ka bati kay sa atong gihunahuna, basta anaa ang Ginoo sa imong kiliran.”

Para ni Sariah, ang pagrepresenta sa Davao ug ang pagpasundayag kauban sa mga artisa nga taga Manila maoy usa ka talagsaong pribiliheyo. “Nindot kaayo ang ilang mga tingog, ug buotan kaayo sila. Gibati nako ang Espiritu sa Ginoo pinaagi sa ilang mga talento.” Si Danielle Talaboc, 18, nga taga Mati Stake, namalandong sa panaghiusa nga iyang gibati. “Nakaamgo ko nga sa mga mata sa Dios, parehas kitang tanan. Diha sa Iyang buhat, walay panaglahi—ang tanan adunay bahin sa Iyang balaanon nga katuyoan.”

Si Xia ug Nevin, parehong aktibo sa showbiz, mipadayag og pasalamat sa mainiton nga pagdawat ug sa bag-ong mga panaghigalaay. Si Chanty, kinsa mipalta sa dakong kalihokan sa iyang home network aron moapil sa konserto, misulti, “Nakapasundayag ko sa ibabaw sa daghang mga entablado, apan kini siya akong gibati nga personal. Kami nagdayeg sa Dios ug nagdapit sa Espiritu. Atol sa medley, akong gibati nga ang Dios sama nga nakigsulti nako pinaagi sa mga pulong sa musika.”

Alang sa dancer ug choreographer sa Panabo Stake nga si Euneir—karon si Elder Mitaran nga nagserbisyo sa San Pablo Mission—ang konserto maoy perpekto nga panamilit sa dili pa siya mosulod sa Sentro sa Pagbansay sa mga Misyonaryo human sa usa ka semana.

Ang tanang partisipante sama og usa ka misyonaryo, naggamit sa ilang mga talento aron ipakigbahin ang ebanghelyo. Si Cecille Serna, 19, gikan sa Davao Stake, misulti nga ang iyang mga higala nga gikan sa laing mga pagtuo nakadayeg sa Simbahan ug sa makahuloganon nga mga kalihokan niini. “Usa kadto ka dakong oportunidad sa pagpakigbahin og daghan pa mahitungod sa Simbahan. Gani ako silang gidapit sa pagbisita sa Davao Temple atol sa open house niini.”

Tan-awa ang “Kapistahan sa 2025: Usa ka Konserto sa Kabatan-onan” dinhi:
Facebook | https://www.facebook.com/ share/1C3uAe7Sgh/
YouTube | https://www.youtube.com/ watch?v=wGRsNHy2heY