Imong Napalipay si Lola

Nagdako uban sa mga ginikanan nga mga bungol, kahibalo gyod ko nga ang akong pamilya lahi. Sa bata pa ko, walay makasinyas alang sa akong mga ginikanan atol sa mga miting o mga kalihokan sa Simbahan, mao nga dili kami motambong pirme.

Mibati ko nga wala mahisakop, nagtinguha sa unsay anaa sa uban sa akong ward—usa ka pamilya nga magdungan sa pag-ampo ug sa pagtuon sa kasulatan.

Pero, sa naghinapos na ang akong senior high school, mas nahimo kaming aktibo sa Simbahan. Ang akong mga ginikanan naselyo sa Mesa Arizona Temple, ug ang duha sa upat nako ka igsoon ug ako naselyo ngadto nila.

Paglabay sa lima ka tuig, nangandam ko nga matugahan ug maminyo sa templo. Sa gabii sa wala pa ang akong pagselyo sa templo, ang akong igsoong lalaki ug ang iyang asawa mitambong sa templo aron mopahigayon og buhat sa proxy alang sa mga ginikanan sa akong inahan agi og pagpangandam sa ilang pagselyo sa sunod adlaw. Ang akong inahan usa ka kinabig hapit 20 ka tuig na nianang higayona, ug matinguhaon siya nga sugdan ang family history ug buhat sa templo.

Pagkasunod adlaw, ang among mga apohan naselyo sa usag usa, ang akong igsoong lalaki ug ang iyang asawa mao usab ang nag-proxy. Adlaw kadto sa akong kasal, oo, apan hilabihan kini ka importante alang nako. Ang akong mga apohan nga wala gayod nako mahimamat, nakigsalo niining espesyal nga adlaw uban nako.

Milabay ang pipila ka adlaw, samtang ang akong bana ug ako miabli sa mga regalo sa among kasal, among giablihan ang usa ka espesyal kaayo nga gasa gikan sa ig-agaw igtagsa sa akong lola. Relihiyoso siya nga babaye nga suod sa akong lola. Ang regalo usa ka litrato sa akong lola sa adlaw mismo sa iyang kasal. Sa nakasukip nga kard adunay nakasulat nga nag-ingon, “Ang imong lola nalipay kaayo nimo ug naglantaw nimo.”

Kini nga ig-agaw wala kahibalo kon unsa ka makahuloganon sa iyang mensahe ngari nako. Wala usab siya mahibalo bahin sa buhat sa templo nga bag-ohay lang nga gipahigayon alang sa akong lola. Nasayod ko sa akong kasingkasing nianang higayona nga ang akong lola nahimuot ug nalipay nga ang among pamilya nagsugod na sa importante nga panaw sa family history ug buhat sa templo.

Kami karon usa na ka mahangtoron nga pamilya, anaa sa dalan sa pagpundok sa among mga katigulangan ug gigiyahan sa akong inahan sa pagpanalangin sa among pamilya sa pikas habig sa tabil.