“Pinaagi sa Balaan nga Plano: Apostolikanhong mga Pagtulun-an bahin sa Pamilya,” Liahona , Sept. 2025.
“Ang Ginoo mipili sa pamilya nga mahimong sukaranan nga yunit sa Simbahan ug sa katilingban.”
Sa kapanahonan, ang mga propeta ug apostoles nakapahayag sa pagkasagrado sa pamilya ug nagpasidaan sa mga kalamidad nga moabot ngadto sa mga indibidwal, mga nasod, ug sa kalibotan kon ang mga pamilya dili mapatunhay ug mapanalipdan. Ania ang pipila ka dinasig nga mga pulong gikan sa mga propeta ug apostoles kabahin sa pamilya ug sa kaimportante sa “Ang Pamilya: Usa ka Pamahayag ngadto sa Kalibotan.”
Ang Pamilya Sentro sa Plano sa Dios
Presidente Russell M. Nelson
Presidente sa Ang Simbahan ni Jesukristo sa mga Santos sa Ulahing mga Adlaw
“Importante sa plano sa Dios mao ang pamilya. Gani, ang katuyoan sa plano mao ang paghimaya sa pamilya. Ang yuta gilalang aron nga kita isip espiritu nga mga anak didto sa kinabuhi nga wala pa dinhi sa yuta sa atong Amahan sa Langit makaanhi sa yuta ug makaangkon og pisikal nga mga lawas. Ania kita dinhi aron sulayan ug testingan [tan-awa sa Abraham 3:24–25 ]. Kita ania dinhi aron ‘mopili sa kalingkawasan ug sa kinabuhing dayon … o sa pagpili sa pagkabihag ug sa kamatayon,’ [2 Nephi 2:27 ]. Ug ang labing maayo sa tanan, kita gitugotan nga mahigugma, maminyo, ug sa pagdapit og mga anak dinhi sa atong mga pamilya” (“Faith and Families ,” Ensign , Mar. 2007, 39).
Ang Pamilya Usa ka Pamahayag nga Gitukod sa Mahangtorong Doktrina
Presidente Dallin H. Oaks
Unang Magtatambag sa Unang Kapangulohan
“Kadtong wala gayod makasabot sa mahigugmaong plano sa Amahan alang sa Iyang mga anak tingali mokonsiderar niining pamahayag bahin sa pamilya nga usa lang ka pamahayag sa palisiya nga kinahanglang usbon. Sa sukwahi, kita nagmatuod nga ang pamahayag bahin sa pamilya, nga gibase sa dili mausab nga doktrina, naghulagway sa matang sa mga relasyon sa pamilya diin ang labing importante nga bahin sa atong mahangtorong kalamboan mahitabo.” (“Balaanong Gugma diha sa Plano sa Amahan ,” Liahona , Mayo 2022, 103).
Ang Kinabuhi sa Pamilya sa Pagkamortal Nag-andam Nato alang sa Kahangtoran
Presidente Henry B. Eyring
Ikaduhang Magtatambag sa Unang Kapangulohan
“Ang yunit sa pamilya dili lamang sukaranan sa katilingban ug sa Simbahan apan sa atong paglaom alang sa kinabuhing dayon. Atong sugdan sa paghimo diha sa pamilya, ang mas gamay nga yunit, unsay magamit sa Simbahan ug sa katilingban nga atong gipuy-an niini nga kalibotan ug unsa unya ang atong himoon diha sa mga pamilya mahiusa sa kahangtoran pinaagi sa mga pakigsaad ug pagkamatinud-anon” (“The Family ” [Brigham Young University devotional, Nov. 5, 1995], 8, speeches.byu.edu).
Ang Pisikal nga Kasuod Itagana alang sa Kaminyoon
Presidente Jeffrey R. Holland
Akting nga Presidente sa Korum sa Napulog Duha ka Apostoles
“Ang tawhanong kasuod gitagana alang sa mga minyo tungod kay mao kini ang kataposang simbolo sa kinatibuk-ang panaghiusa, ang kinatibuk-an ug usa ka panaghiusa ug giorden ug gipasabot sa Dios. Gikan sa Tanaman sa Eden hangtod karon, ang kaminyoon giplano nga magpasabot nga kompleto nga panaghiusa sa usa ka lalaki ug sa usa ka babaye—sa ilang mga kasingkasing, mga paglaom, mga kinabuhi, gugma, pamilya, umaabot, sa tanang butang. … Kini usa ka pagkahiusa sa ingon nga kahingpit nga atong gigamit ang pulong nga selyo sa pagpahayag sa mahangtoron nga saad niini” (“Personal Purity ,” Liahona , Jan. 1999, 91).
Ang gugma sa ginikanan alang sa usa ka anak mao ang usa sa kinakusgan nga pwersa sa uniberso. Mao kini ang usa sa pipila ka butang dinhi sa yuta nga mahimo gayod nga mahangtoron.
Karon, tingali mibati kamo nga ang inyong relasyon sa inyong anak dili kaayo maayo. Kana ang higayon nga ang gahom sa Manluluwas mosulod. Siya miayo sa masakiton, ug Siya mahimong moayo sa mga relasyon. Siya mipadaghan sa pan ug isda, ug Siya mahimong mopadaghan sa gugma ug kalipay diha sa inyong panimalay” (“Si Jesukristo Mao ang Kalig-on sa mga Ginikanan ,” Liahona , Mayo 2023, 56).
Lig-ona ang mga Sumpay sa Pamilya, Bisan Kon ang Pipila Maputol
Elder David A. Bednar
Sa Korum sa Napulog Duha ka Apostoles
Kaninyo [mga young adult] nga nakasinati sa kagul-anan sa diborsyo sa inyong pamilya o mibati sa kasakit sa pagkapakyas sa pagsalig, palihog hinumdomi nga kini magsugod pag-usab diha kaninyo! Usa ka sumpay sa kadena sa inyong mga henerasyon tingali naputol, apan ang ubang matarong nga mga sumpay ug ang nahabilin sa kadena importante gihapon sa kahangtoran. Makadugang kamo og kalig-on sa inyong kadena ug tingali gani makatabang sa pagpahiuli sa naputol nga mga sumpay. Kana nga buhat matuman sa tagsa-tagsa.” (“Usa ka Lig-on nga Sumpay ” [tibuok kalibotan nga debosyonal alang sa mga young adult, Sept. 10, 2017], Librarya sa Ebanghelyo).
Ang mga Tahas sa Kababayen-an ug Kalalakin-an Adunay Managsama nga Bili
Elder Quentin L. Cook
Sa Korum sa Napulog Duha ka Apostoles
Ang kababayen-an ug mga kalalakin-an adunay talagsaong mga tahas ingon nga gi-outline diha sa ‘Ang Pamilya: Usa ka Pamahayag ngadto sa Kalibutan,’ apan ang ilang pagkatinugyanan managsama og bili ug importansya. Sila adunay managsamang gahom sa pagdawat og pagpadayag alang sa ilang pamilya. Kon sila magtrabaho og dungan diha sa gugma ug pagkamatarong, ang ilang mga desisyon mga panalanginan sa langit.” (“Dakong Gugma alang sa mga Anak sa Atong Amahan ,” Liahona , Mayo 2019, 79).
Ang mga Ginikanan Kinahanglan nga Mogiya sa mga Anak ngadto sa Paglaom ni Kristo
Elder D. Todd Christofferson
Sa Korum sa Napulog Duha ka Apostoles
“Ang Dios mi-orden nga ang mga lalaki ug mga babaye magminyo gayod ug manganak, sa ingon naglalang, diha sa panag-uban sa Dios, sa pisikal nga mga lawas nga mao ang yawe sa pagsulay sa mortalidad ug gikinahanglan sa mahangtorong himaya uban Kaniya. Siya usab mi-orden nga ang ginikanan kinahanglang moestablisar og mga pamilya ug mopadako sa ilang mga anak diha sa kahayag ug kamatuoran, [tan-awa sa Doktrina ug mga Pakigsaad 93:36–40 ], maghatag kanila og paglaom diha kang Kristo” (“Nganong Kaminyoon, Nganong Pamilya ,” Liahona , Mayo 2015, 51).
Kon kita mopunit ug mopili kon unsa ang atong dawaton diha sa pamahayag, atong gipangiob ang atong mahangtorong panan-aw, naghatag og dako kaayong importansya sa atong kasinatian dinhi ug karon. Sa mainampoong pagpamalandong sa pamahayag pinaagi sa mata sa hugot nga pagtuo, kita mas makasabot kon unsa kanindot pagkasumpay ang mga baroganan, nagpadayag sa plano sa atong Amahan alang sa Iyang mga anak.” (“Ang Mata sa Hugot nga Pagtuo ,” Liahona , Mayo 2019, 35–36).