Alang sa Atong Panahon

Niadtong Septiyembre 23, 1995, si Presidente Gordon B. Hinckley (1910–2008) namulong sa usa ka panagpundok sa mga igsoong babaye sa Relief Society ug mipaila sa “Ang Pamilya: Usa ka Pamahayag ngadto sa Kalibotan.” Ang mosunod mao ang pipila sa iyang mga komentaryo niana nga okasyon:

“Nagtuo ako nga kini mahimo gyod nga panalangin sa matag bata nga matawo ngadto sa usa ka panimalay diin kana nga bata gikahinangop, gimatuto, gihigugma ug gipanalanginan og mga ginikanan, amahan ug inahan kinsa nagpuyo nga adunay pagka-maunungon sa usag usa ug ngadto sa ilang mga anak. …

“Kon padak-on ninyo ang inyong mga anak sa mga paagi sa ebanghelyo ni Jesukristo, uban sa paghigugma ug taas nga paglaom, mas taas ang purohan nga magmalinawon unya ang ilang mga kinabuhi. …

“Uban sa daghang hiwi nga pangatarongan nga gipakatap nga isip tinuod, uban sa daghang panglingla kabahin sa mga sumbanan ug mga hiyas, uban sa daghang pangdani ug tentasyon nga anam-anam nga nagmantsa sa kalibotan, among gibati nga mopasidaan ug mopahimangno. Sa pagpadayon niini kami sa Unang Kapangulohan ug sa Konseho sa Napulog Duha ka Apostoles karon mopagawas niini nga pamahayag ngadto sa Simbahan ug sa kalibotan isip usa ka deklarasyon ug pagpalanog pag-usab sa mga sumbanan, mga doktrina, ug mga buhat nga may kalabotan sa pamilya diin ang mga propeta, mga manalagna, ug mga tigpadayag niini nga simbahan mibalik-balik sa pagpahayag niini sa tibuok kasaysayan. …

“Moawhag kami sa tanan sa mainampingon, mahunahunaon, ug mainampoon nga pagbasa niini nga pamahayag. Ang kalig-on sa bisan unsa nga nasod anaa sa sulod sa mga panimalay. Among giawhag ang atong katawhan bisan asa sa paglig-on sa ilang mga pamilya sa pagsunod sa dugay nang gitahod nga mga hiyas.”