“Mga Leksiyon nga Nakat-onan sa Pagdapit kang Kristo nga Mosulat sa Akong Sugilanon,” Liahona, Sept. 2025.
Kababayen-an sa Pakigsaad
Mga Leksiyon nga Nakat-onan sa Pagdapit kang Kristo nga Mosulat sa Akong Sugilanon
Kitang tanan adunay lain-laing mga kasinatian, apan kon atong ipatigbabaw ang Dios labaw sa tanan sa atong kinabuhi, atong matuman ang katuyoan sa atong pagkalalang sa mga paagi nga wala nato mahunahunai.
Detalye gikan sa Protector by Day and by Night [Tigpanalipod sa Maadlaw ug Magabii], ni Caitlin Connolly, dili mahimong pakopyahan
Niadtong 2016—sa tunga-tunga sa dul-an sa tulo ka dekada nga kaminyoon, nagpadako ug nag-amuma ug naghigugma sa among tulo ka anak nga lalaki, full-time nga abogada, nagserbisyo sa mga calling sa Simbahan, ug nagtagad sa mga panginahanglan sa among mga paryente—ang akong bana, si Doug, ug ako gitawag nga moserbisyo sulod sa tulo ka tuig isip mga lider sa misyon sa Arequipa, Peru. Mibiya kami human sa pagkatawo sa among unang apo nga lalaki.
Mipauli kami niadtong 2019 nga aduna nay duha ka bag-ong mga apo nga babaye. Ang among mga magulang nga mga anak nga lalaki naminyo na, ug ang kinamanghoran adunay hinigugma ug sa dili madugay magminyo. Mibalik ko sa pagka-abogada, ug ang akong paborito nga calling mao ang pagka-Mama ug pagka-Lola.
Ug dayon ang tawag miabot nga moserbisyo isip Kinatibuk-ang Presidente sa Primary. Ang komportable nga asoy nga akong gisulat alang sa akong kaugalingon mao ang paggahin og panahon uban sa akong pamilya, laing dekada sa pagka-abogada aron maseguro ang pinansiyal nga kahimtang, ug pagserbisyo sa akong ward o diha sa templo.
Unsa kaha kon magpadayon ko sa pagpuyo niining komportable nga asoy?
Malingaw ra unta ko nga mogahin og dugang nga panahon sa akong mga apo ug segurado unta ang akong pinansiyal nga kahimtang. Ug dili unta nako masinati ang makapalambo, makapahinuklog sa kalag, ug makapalig-on sa pagtuo nga kasinatian. Lisod ba? Oo. Angay lang ba? Aw, oo!
Ako mohatag sa akong pagsaksi nga “tungod kay [ang Manluluwas] hingpit nga nahibalo sa atong potensyal, Siya modala kanato sa mga dapit nga kita mismo wala gayod makahunahuna.” Ako masaligon nga Siya modala ninyo ngadto sa mga dapit nga wala gayod ninyo mahunahunai, ug ang inyong pagserbisyo makapalambo sa kalag. Tugoti nga ang Dios mogiya ninyo sa paglakaw tupad sa usa ka tawo nga nagkinahanglan kaninyo.
Mahimong makita ninyo ang inyong kaugalingon nga nagtudlo sa mga hamtong sa pagbasa. O tingali nagserbisyo sa mga imigrante. Tingali mangulo kamo og grupo sa komunidad sa pagmintenar ug pagpabilin sa mga parke nga luwas alang sa mga pamilya. Kon atong ipatigbabaw ang Dios labaw sa tanan, Siya modala nato ngadto sa dapit diin Siya nagkinahanglan nato ug ngadto sa mga dapit nga wala gayod nato mahunahunai.
Si Presidente Russell M. Nelson namahayag nga atong “madawat ang dugang pa nga hugot nga pagtuo pinaagi sa paghimo og butang nga nagkinahanglan og dugang nga hugot nga pagtuo.”
Nasayod ako nga tinuod kana. Tungod kay sa pagpatigbabaw sa Dios labaw sa tanan sa akong kinabuhi, sa pagtugot Kaniya nga maoy mosulat sa akong sugilanon, ang akong pagtuo diha ni Jesukristo milambo.
Unya, sa unsang paagi nga Siya inyong ipatigbabaw labaw sa tanan?
Unsaon man paghimo niana sa usa ka batan-on nga nagpadayon sa iyang edukasyon ug gusto nga maminyo ug makabaton og pamilya? Si Presidente Dallin H. Oaks, Unang Magtatambag sa Unang Kapangulohan, mipasabot nga ang pagpili dili tali sa pamilya o sa edukasyon ug panarbaho. Siya miingon: “Ang tukma nga panahon mao ang atong pilion, ug tinguhaon nato ang inspirasyon sa Ginoo ug ang mga pagtulun-an sa Iyang mga sulugoon sa paghimo niana.”
Sa paghisgot niini nga hilisgotan, hinaot nga sensitibo ko ngadto niadtong adunay sinsero ug makanunayong tinguha nga magminyo ug makabaton og mga anak niini nga kinabuhi ug dili pa minyo. Kahibalo ko nga daghan ang nag-inusara nga ginikanan tungod sa kamatayon o diborsiyo. Aduna koy daghang kaila nga mga magtiayon nga naminyo ug nagtinguha nga adunay mga anak ug nag-antos sa pagkabaog o nakuhaan. Nasayod ko nga kamo nag-antos. Gusto ninyo nga ang tukma nga panahon mausab. Dili kini mao ang asoy nga inyong gisulat alang sa inyong kaugalingon. Ang akong kasingkasing naguol alang ninyo.
Ang Sugilanon sa Matag Usa Managlahi
Mipadayon ko sa edukasyon, sa undergraduate ug sa abogasya. Naminyo ko tunga-tunga sa akong pag-eskwela og abogasya. Nanganak ko sa akong anak nga lalaki sa tuig human sa akong pagpasar sa bar. Aduna koy gagmay nga mga bata, ug ang akong bana ug ako nahigugma ug nag-amuma nila samtang kaming duha nagtrabaho. Bisi kadto, usahay nagkapuliki; kami naluya ug usahay gikapoy. Gisuportahan nako siya, ug siya misuporta nako. Ang pamilya kaniadto, ug karon, mao ang among labing una nga prayoridad. Ang akong bana ug ako nagtinguha og inspirasyon niini nga mga pagpili ug sa tukmang panahon. Mao kadto ang gibati namo nga buhaton. Naningkamot kami nga ipatigbabaw ang Dios labaw sa tanan.
Gikan sa pinansiyal ug propesyonal nga panglantaw, murag maayo nga dili lang una manganak hangtod nga mas maestablisar na sa akong panarbaho. Apan sa pagtugot sa Ginoo nga maoy mosulat sa atong mga sugilanon, usahay makahimo kita og mga butang nga dili masabtan sa kalibotan. Nagkapuliki ko sa pagmabdos, pagpanganak sa mga bata, pag-amuma sa mga anak, paghatod sa eskwelahan, dula sa mga bata, mga responsibilidad sa Simbahan, pagkahimong maabagon nga asawa, ug sa akong propesyonal nga mga buluhaton. Kadto usa ka makalipay nga pagkapuliki nga dili nako usbon. Gibati namo nga masaligon sa among giagian tungod kay among gipatigbabaw ang Dios labaw sa tanan.
Palihog ayaw sayopa sa pagsabot. Wala ko magsugyot nga ang tanan mosunod sa akong giagian. Ang atong mga sugilanon dili parehas. Mipakigbahin ko sa akoa tungod kay mao kini ang akong nasayran. Pero, ang usa ka butang nga atong gihimo nga parehas mao ang tinguha: nga ipatigbabaw ang Dios labaw sa tanan.
Ang pagka-inahan mao ang akong labing una nga prayoridad. Kini ang akong hingpit nga kalipay. Ang Dios mipanalangin sa atong unang mga ginikanan ug misugo nila “Panganak kamog daghan ug lukpa ang kalibotan sa inyong mga liwat” (Genesis 1:28). Ang unang sugo nga gihatag ngadto ni Adan ug ni Eva mao ang “mahitungod sa posibilidad nga mahimong mga ginikanan.”
Ang akong nag-unang interes mao ang pagkainahan. Kana nga interes dili ingon nga wala mahisubay sa akong makugihong tinguha sa edukasyon. Kita gisugo nga magtinguha sa pagkat-on—pipila niini magagikan sa atong pagtinguha og edukasyon. Magagikan usab kini sa pagkaginikanan, diin makakat-on kita nga mahimong sama sa dios samtang nag-ugmad kita og mga kinaiya sa paghigugma, kaluoy, ug pailob.
Ang pagpatigbabaw sa Dios labaw sa tanan maglakip sa pagdapit Kaniya nga manginlabot sa tukmang panahon sa atong mga pagpili.
Mapasalamaton ko sa kahangtoran nga nakadawat og inspirasyon gikan sa Ginoo ug giya gikan sa mga propeta sa pagtabang sa akong bana ug nako diha sa tukmang panahon sa among pagpili nga magbaton na og mga anak. Mapasalamaton kaayo ko nga gibuhat nako ang mga pag-aghat ug wala tugoti ang kalibotanong mga impluwensya, kakomportable, dungog, o kwarta nga mobabag sa pagpili aron matuman ang akong balaanong potensiyal nga manganak ug magpadako sa mga anak.
Women with and without Children [Mga Babaye nga adunay mga Anak ug walay mga Anak], ni Caitlin Connolly, dili mahimong pakopyahan
Ang Katuyoan sa Atong Pagkalalang
Kon ang mga lalaki ug mga babaye mohunong sa pagbaton ug pag-amuma sa mga anak, kining mortal nga kasinatian matapos. Mao nga, importante kaayo nga dili nato ibaliwala o ihunong ang sagrado nga responsibilidad sa pagkaginikanan.
Daghang datos sa social science ang nagpakita og hilabihan kadako, negatibo nga epekto ngadto sa mga nasod ug sibilisasyon nga mihunong sa pagbaton og mga anak. Sa daghang bahin sa kalibotan, ang sagad nga gidaghanon sa gihimugso matag babaye mas menos sa duha. Kana nagpasabot nga kita walay gipuli sa atong kaugalingon.
Isip mga lider sa Simbahan, nabalaka kami sa bag-ong uso sa kaminyoon ug pagpanganak. Sa Estados Unidos, sobra na sa 30 ka tuig ang milabay, atong nakita nga otso ngadto sa nuybe porsiyento ang pagkunhod sa mga lumulupyo nga nagminyo. Kini nga mga paghulagway “nagrepresentar sa problema sa tibuok kalibotan.” Kon ang mga tawo dili magminyo, magkadiyotay ang mga bata nga matawo.
Ang Estados Unidos bag-ohay lang nga anaa na sa “punto nga, sa mga hamtong nga nag-edad og 18–55, mas daghan na karon ang mga single adult nga walay anak kaysa minyo nga mga hamtong nga adunay mga anak.”
Ang mga anak mahinungdanon aron magpadayon ang sibilisasyon. Mahinungdanon sila sa mahimayaong plano sa kalipay. Ang sugo alang nato sa pagdaghan ug pagpuno sa yuta nagpabilin nga ipatuman.”
Detalye gikan sa Us with Them and Them with Us [Kita uban Kanila ug Sila uban Kanato], ni Caitlin Connolly, dili mahimong pakopyahan
Tugoti ang Ginoo nga Mosulat sa Inyong Sugilanon
Nasayod ko sa sinsero nga tinguha sa daghang tawo nga gustong magminyo ug magpadako og mga anak. Apan daghan ang wala maminyo o nag-antos sa pagkabaog. Ang akong labing suod nga higala, nga wala gayod maminyo ug walay iyang kaugalingong mga anak, mihigugma ug mipangga sa akong mga anak. Dili kini puli sa iyang kaugalingong mga anak. Timailhan kini nga ang iyang tinguha nagpabilin paingon sa pagkainahan.
Ang akong anak nga lalaki ug iyang asawa nanglimbasog sa hagit sa balik-balik nga nakuhaan. Ang ilang tinguha matarong. Nagtinguha sila nga ipatigbabaw ang Dios labaw sa tanan sa ilang kinabuhi. Hinumdomi, sa higayon nga kita mangayo inubanan sa hugot nga pagtuo ni Jesukristo nga maoy mosulat ug motiwas sa atong sugilanon, kinahanglan nga andam kita nga mosinati sa dili komportable nga asoy sa pagpangandoy nianang usa nga, bisan og sakit, sa kaulahian halangdon ug mas celestial kaysa atong mahunahuna.
Usa sa akong minahal nga mga higala mao ang magtiayon nga walay anak nga dugayng nagminyo sa kinabuhi ug nagsagubang sa pagkabaog. Nangutana sila inubanan sa hugot nga pagtuo kon managop ba sila og mga bata. Imbes gamayng bata, gibati nila nga sagopon ang upat ka magnagsoong babaye—mga edad 5 ngadto sa 17. Sa pagkatinuod, sa positibong paagi, dili mao ang asoy nga ilang gisulat alang sa ilang kaugalingon. Apan, pagkanindot sa sugilanon nga Iyang gisulat uban nila.
Bisan unsa pa man ang atong personal nga mga kahimtang, kitang tanan kabahin sa pamilya sa Dios, mga sakop sa yutan-ong pamilya, ug nangandam nga mahimong mahangtorong mga ginikanan. Ang mga panalangin sa kahimayaan nga maangkon nato pinaagi sa atong Manluluwas, si Jesukristo, naglakip sa kaliwatan. Ug mao nga, maselyo man kita ug makabaton og mga anak niini nga kinabuhi o sa sunod, ang atong tumong mao ang kahimayaan—nga maangkon nato kon kita mohimo ug motuman sa mga pakigsaad. Kon kita mosulod og relasyon sa pakigsaad uban sa Dios, kita nakabugkos ngadto Kaniya, ug wala kita mag-inusara. Kita napanalanginan og “naghingapin sa [Iyang] gugma ug kaluoy.”
Isip katawhan sa pakigsaad, kita nagplano ug nangandam alang sa kaminyoon ug sa pagbaton ug pag-amuma sa mga anak. Pagkasagrado ug pagkabalaan nga calling! Kita mohigugma ug mogiya ug mangalagad ug magpakaginikanan aron ipakita ang atong gugma alang sa Dios ug sa Iyang mga anak—tungod kay gusto kita nga Siya ipatigbabaw labaw sa tanan sa atong kinabuhi.
Usa kini ka mahimayaong panahon nga mabuhi ug mohimo og mga pakigsaad diha sa Ang Simbahan ni Jesukristo sa mga Santos sa Ulahing mga Adlaw. Ang pagsabot sa atong tahas, katuyoan, ug responsibilidad diha sa plano sa kalipay kay madunggganon, makadasig, ug makalipay. Ang pagkahibalo nga kita adunay buhing propeta nga nag-andam nato sa unsay anaa sa umaabot naghatag nako og kalinaw ug gani pagkamalaomon taliwala sa kawalay kaseguroan. Ang akong relasyon sa pakigsaad uban sa Dios naghatag nako og pagsalig. Anga akong pagsalig sa pakigsaad anaa kang Jesukristo.
Ako mopamatuod nga Siya buhi, nga ang Iyang gugma alang nato makita diha sa Iyang kaandam sa paghalad sa Iyang kinabuhi ug Pag-ula alang sa matag usa nato.