Ang Simbahan sa Mongolia

Ang Simbahan ni Jesukristo sa mga Santos sa Ulahing mga Adlaw padayon nga nagtubo sa Mongolia sukad sa unang pag-abot sa senior nga misyonaryo nga magtiayon niadtong 1992. Ang unang mga kinabig sa Mongolia gibunyagan niadtong 1993, ug ang unang branch naorganisar nianang samang tuig. Niadtong 1995, ang unang misyon natukod. Karon, ang Simbahan sa Mongolia adunay:

• 12,400 ka miyembro (bana-bana)

• 2 ka stake, 24 ka ward ug mga branch, 1 ka misyon

• 1 ka templo (pagatukoron sa Ulaanbaatar)

Espirituwal nga mga Panalangin

Si Munkh-Od Altansukh (ibabaw sa tuo) gikan sa Ulaanbaatar East Stake miingon, “Nakaangkon ko og bililhon nga espirituwal nga mga kasinatian pinaagi sa lain-laing mga buhat sama sa pagtuon sa kasulatan, pagserbisyo sa uban, ug pagsimba sa templo. Nasayod ko nga ang gagmay ug yanong mga butang sa ebanghelyo kon buhaton kanunay makatabang nato nga molambo ngadto sa kahimayaan isip usa ka pamilya.”