Ang Dios Mihatag Kanako og Kalinaw

Samtang nangandam kami sa pagkanta atol sa sesyon sa pagpahinungod sa Concepción Chile Temple niadtong 2018, ang tanang sakop sa young adult choir nga akong gipasiugdahan adunay managsama nga tumong: mohimo og musikal ug espirituwal nga buhat nga kinahanglanon aron ihatag sa Dios ang among labing maayo nga halad.

Uban sa mga sakop sa choir, gikan sa duha ka stake sa siyudad sa Chillán, gipahinungod nako ang akong kaugalingon nga mahimong putli kutob sa akong mahimo. Gusto nakong makita diha sa akong kinabuhi ang Kahayag ni Kristo. Gusto nako nga ang halad nga among ihatag sa Dios sa Iyang balaan nga balay mahimong ingon ka hingpit kutob sa mahimo. Nasayod ko nga kon among buhaton ang among bahin, ang Langitnong Amahan motabang namo, ug manganta kami sama sa unsay gusto Niya nga kami manganta.

Atol sa pagpahinungod, nanganta kami inubanan sa among mga tingog ug sa among kasingkasing. Ingon og ang mga anghel nanganta uban namo. Ang tingog sa choir perpekto. Gibati namo nga ang grasya sa Dios nag-uban namo ug nga Siya nahimuot sa among halad. Kana nga pagbati nagpabilin nako sulod sa dugay nga panahon.

Human sa pagpahinungod sa templo, gibati nako nga giamumahan sa espirituwal nga paagi ug nahiusa ngadto sa Langitnong Amahan. Mibati ko og mas lig-on nga koneksiyon ngadto Kaniya kaysa akong nasinati sukad. Kana nga koneksiyon hilabihan ka lig-on nga ako mibati nga gigiyahan sa espirituwal nga paagi sa unsay angay nga pangayoon sa dihang nag-ampo ko (tan-awa sa 3 Nephi 19:24).

Panahon sa pagpahinungod sa templo, lima ka semana ko nga mabdos. Human sa pipila ka bulan, nakuhaan ko. Lisod kaayo kadto nga panahon. Mibati ko og hilabihan nga kaguol, ilabi na sa dihang akong nahibaloan nga basin dili na ko makaanak.

Apan kining lisod nga kasinatian nahitabo sa panahon nga mibati ko nga hilabihan ka lig-on sa espirituwal nga paagi. Nasabtan nako nga giandam ko alang niining higayona pinaagi sa halad nga among gihatag didto sa templo. Ang espirituwal nga kalig-on nga akong nasinati nakatabang nako nga mabuntog kini nga pagsulay tungod kay ang Langitnong Amahan nag-uban nako ug mihatag nako og kalinaw.

Wala madugay, ang Dios mipanalangin sa akong bana ug nako og usa ka milagro. Hilabihan ang among kalipay sa dihang ang among anak nga lalaki, si Arturo, nakadawat og manghod nga babaye, si Daniela.

Dili unta ko makasugakod niana nga kasinatian kon wala pa ang suod nga koneksiyon nga akong natagamtam uban sa Langitnong Amahan. Nasayod ko nga ang tanan ma-OK ra ug sumala sa Iyang kabubut-on. Ang paghinumdom niini nga mga butang sa gihapon mopuno sa akong kasingkasing og kalipay ug pasalamat.