“Ang mga Ordinansa sa Templo Mohiusa, Mokonektar, ug Moselyo,” Liahona, Sept. 2025.
Makasaysayanong mga Panglantaw bahin sa Balay sa Ginoo
Ang mga Ordinansa sa Templo Mohiusa, Mokonektar, ug Moselyo
Ang kasaysayan sa buhat sa templo sa ulahing mga adlaw nagpakita og kadasig ug pagtulun-an human sa laing pagtulun-an nga pagpadayag alang sa puli nga mga bunyag alang sa mga patay.
Paghulagway pinaagi ni Dan Burr
Si Betsy King Duzette miubog sa mabugnaw nga tubig sa Suba sa Mississippi. Ang 58 anyos nga biyuda ug kinabig nga gikan sa Connecticut gibunyagan alang sa iyang mga uyoan, ugangan nga mga babaye, ug ama-ama sa bana.
Si Propeta Joseph Smith bag-o lang mitudlo sa mga Santos, niadtong Agosto 1840, mahitungod sa doktrina sa bunyag alang sa mga patay. Sa ilang kadasig, gipahigayon nila ang mga bunyag diha sa suba, tungod kay ang Templo sa Nauvoo wala pa makompleto. Ang mga babaye gibunyagan alang sa mga lalaki ug ang mga lalaki gibunyagan alang sa mga babaye. Hinuon sa wala madugay, ang Ginoo mipadayag ngadto ni Joseph Smith nga ang mga bunyag alang sa patay na nga mga katigulangan kinahanglan nga himoon diha sa gipahinungod nga mga templo (tan-awa sa Doktrina ug mga Pakigsaad 124:28–35). Ug niadtong 1845, si Brigham Young mipahibalo nga ang mga babaye kinahanglan nga bunyagan alang sa mga babaye ug ang mga lalaki alang sa mga lalaki.
Ang bana ni Betsy, nga si Philemon Duzette, namatay unom ka tuig na ang nakalabay. Nagmaisogon siya nga miubog sa bugnaw nga katubigan aron bunyagan alang sa namatay nga mga kabanay sa iyang bana ingon man sa iyang kaugalingon. Kana naglakip sa bunyag alang sa ama-ama ni Philemon, nga si Jesse Peas, nga namatay 50 ka tuig na ang nakalabay sa dihang si Betsy usa pa ka batan-ong babaye. Wala tingali gayod niya mahimamat siya apan dakog kahigayonan nga nakaila kaniya ug nakaila sa iyang ngalan ug ang iyang relasyon ngadto ni Philemon ug sa iyang inahan nga si Martha Wing. Si Betsy nakaila ni Martha sa dihang buhi pa siya.
Si Betsy nabunyagan isip puli alang ni Jesse hapit diha-diha dayon human sa mga pagpadayag bahin sa bunyag alang sa mga patay. Ug siya ug ang iyang bana mihatag og ngalan sa usa sa ilang mga anak parehas og ngalan ni Jesse. Ang biyolohikanhong amahan ni Philemon, nga ginganlan usab og Philemon, namatay sa dihang siya usa pa ka masuso, ug si Jesse Peas nahimong ama-ama sa dihang si Philemon nag-edad og tres ug mitabang ni Martha sa pagpadako kaniya.
Ang pagkaama-ama o ina-ina komon sa ikanapulog walo ug ikanapulog siyam nga siglo sa Amerika. Ang taas nga gidaghanon sa nangamatay ug taas nga gidaghanon sa nagminyo pag-usab nagpasabot nga daghang tawo nagpuyo sa mga pamilya nga adunay ama-ama ug ina-ina o sagol-sagol nga mga pamilya. Sa ingon, ang Duzette-Peas nga koneksiyon sa pamilya makaduha natukod pag-usab: unang higayon sa dihang ang inahan ni Philemon naminyo ni Jesse Peas ug sa ikaduhang higayon pinaagi sa mga bunyag alang sa mga patay.
Drowing sa bunyaganan sa orihinal nga Templo sa Nauvoo
Pagtubos sa mga Tawo nga Gimahal
Ang puli nga bunyag nakahatag niadtong mortal nga mga koneksiyon sa usa ka paagi nga molahutay sa kahangtoran. Sama sa gisulat ni Joseph Smith, ang bunyag alang sa mga patay mao ang “makatakdo nga sumpay” nga nagbugkos sa mga buhi ngadto sa mga patay, “Kay kita kon wala sila dili mahimo nga hingpit; ni sila kon wala kita mahimong hingpit” (Doktrina ug mga Pakigsaad 128:18).
Si Joseph Smith mitudlo nga kon wala kining makatakdo nga sumpay, ang yuta hampakon sa tunglo, butang nga makapausik sa yuta, gilalang nga walay katuyoan (tan-awa sa Doktrina ug mga Pakigsaad 128:17–18). Sa samang higayon nga kini makapasubo nga pagpadayag mao ang mahimayaong pagpadayag ni Joseph mahitungod sa gahom nga mobugkos sa tanang anak sa Dios nga maghiusa sa kahangtoran.
Agi og dugang sa kaimportante sa puli nga mga ordinansa alang sa namatay nga mga sakop sa pamilya, si Joseph mihatag og gibug-aton nga ang mga buhi makabenepisyo usab: “Ug karon, akong hinigugmang mga igsoon nga lalaki ug babaye, ipasalig ko kaninyo nga kini ang mga baroganan kalabot sa mga patay ug sa mga buhi nga dili mahimong hatagan lamang og gamay nga pagtagad, kalabot sa atong kaluwasan.” (Doktrina ug mga Pakigsaad 128:15).
Alang ni Joseph Smith, kini nga mga pagpadayag hilabihan ka personal. Ang iyang kinamagulangan nga igsoon nga si Alvin, namatay niadtong 1823, ug si Joseph mibati nga adunay nawala sa iyang kinabuhi. Sa 1836 nga pagpadayag, si Joseph adunay usa ka panan-awon sa “celestial nga gingharian sa Dios, ug ang himaya diha niini” ug “ang talagsaon nga katahom sa ganghaan” ug “matahom nga mga dalan niana nga gingharian.” Sa tunga-tunga niining halangdon nga panan-awon mahitungod sa celestial nga gingharian, nakita usab niya ang indibidwal nga mga sakop sa pamilya nga iyang nailhan ug gimahal, lakip sa iyang igsoong lalaki nga si Alvin. Siya “natingala” nga si Alvin, nga wala gayod mabunyagi, usa ka manununod “sa celestial nga gingharian sa Dios.” (Tan-awa sa Doktrina ug mga Pakigsaad 137:1–6.)
Sa Wala pa ang Katukoran sa Kalibotan
Ang koneksiyon tali sa buhi ug namatay nga mga minahal nagpakita sa kahalandon sa sukod sa kaluwasan sa tawo, alang niadtong kinsa “namatay nga walay kahibalo sa ebanghelyo” (Doktrina ug mga Pakigsaad 128:5) nailhan ug ang usa ka dalan alang sa ilang katubsanan gihatag sa wala pa sila moanhi sa yuta. Sa pagkatinuod, ang bunyag alang sa mga patay natukod alang sa atong “kaluwasan gikan sa wala pa matukod ang kalibotan,” (Doktrina ug mga Pakigsaad 128:8). Ang mga pagpadayag mahitungod sa bunyag alang sa mga patay gisunod sa ulahing mga pagpadayag mahitungod sa mga ordinansa sa pagselyo. Ang pagselyo sa mga anak ngadto sa mga ginikanan nahimong kataposang ordinansa nga naghatag sa mga sumpay alang sa tanan kinsa nga nabuhi sukad (tan-awa sa Doktrina ug mga Pakigsaad 138:47–48).
Sa usa ka maanindot nga pakigpulong sa kinatibuk-ang komperensiya sa Abril 2018, si Elder Dale G. Renlund sa Korum sa Napulog Duha ka Apostoles mihulagway sa gahom niadtong mga koneksiyon sa pagselyo:
“Ang Dios, sa Iyang walay sukod nga kapasidad, moselyo ug moayo sa mga indibidwal ug mga pamilya bisan sa trahedya, kamatayon, ug kalisdanan. …
“… Pinaagi sa Iyang matubsanong sakripisyo, gihalad ni Jesukristo kining mga panalangin para sa tanan, alang sa mga patay ug sa buhi.”
Sama sa gituohan ug gisaligan ni Betsy King Duzette sa dihang siya miubog ngadto sa Suba sa Mississippi alang sa iyang ama-ama, kita, tanan kita, mahimong masumpay, maselyo, mabugkos, ug mahiusa sa kahangtoran.