“Ang COVID Hapit Makababag sa Iyang Damgo sa Tabernacle Choir,” Liahona, Sept. 2025.
Ang COVID Hapit Makababag sa Iyang Damgo nga Mokanta sa Tabernacle Choir
Ang pagkabulag tungod sa kuwarentena nagtudlo og tiunay nga leksiyon: Kristohanong gugma alang sa magul-anon.
Sa tinglarag niadtong 2024, nga sa wala madugay gitawag nga mahimong tigtambag sa organisasyon sa area organization sa Europe Central Area, si Laura Echarri Hermoso mibiyahe og sobra sa 5,000 ka milya (8,047 km) gikan sa iyang panimalay sa Pamplona, Spain, aron mokanta isip usa ka bisita sa The Tabernacle Choir sat Temple Square.
Tulo pa lang siya ka adlaw didto sa Siyudad sa Salt Lake Utah, USA, sa dihang siya positibo nga natestingan og COVID-19 ug mikwarentena sa iyang kaugalingon. Ang iyang oportunidad sa pagkanta sa choir alang sa umaabot nga kinatibuk-ang komperensiya ingon og dili na mahimo.
Sa kamagul-anon ug pagkanag-inusara diha sa iyang kwarto sa hotel, miluhod siya ug nag-ampo. Naglaom siya og pagkaayo. Naglaom siya nga makakanta. Nagpadayon ang iyang hugot nga pagtuo.
Usa ka Tuig sa Sayo Pa
Sa usa ka malisod nga panahon sa kapakyasan sa dihang ang mga pagtambal aron siya magmabdos wala magmalamposon ug ang iyang inahan nag-antos tungod sa Alzheimer, nawala ang tinguha ni Sister Echarri sa pagkanta nga diha sa una. Lisod kadto tungod kay ang musika kanunay nga importante nga bahin sa iyang kinabuhi. “Usa kini ka kanunay nga panginahanglan nga sukad pa sa akong pagkagamay nga bata,” miingon siya.
Si Sister Echarri (sa wala) uban sa iyang inahan, si María.
Samtang nag-ampo, usa ka hunahuna ang miabot nga siya kinahanglan nga mokanta uban sa mas daghan nga tawo. Paglabay sa usa ka semana, gikontak siya sa awtoridad sa Simbahan nga miinterbiyo niya. “Mihisgot siya mahitungod sa usa ka proyekto sa musika nga gisugdan sa Simbahan ug nga sila nangita og mga mag-aawit,” miingon si Sister Echarri.
Wala siya mosulti sa piho nga katuyoan, apan human sa ikaduha nga interbiyo, ang awtoridad mipadayag nga ang Simbahan gusto og bisita nga mga mag-aawit alang sa The Tabernacle Choir’s Global Participant Program nga mokanta sa kinatibuk-ang komperensiya.
“Ug nagsugod ko sa paghilak tungod kay wala ko masayod unsay mahitabo, apan gibati nako nga ang Ginoo diha ug nga ang Ginoo nakahibalo nako, ug butang kadto nga wala gayod nako damha,” miingon siya.
Ang Dalan ngadto sa Kinatibuk-ang Komperensiya
Ang interbiyo mao lamang ang pasiuna ug gisundan sa ikaduha nga interbiyo sa uban. Si Sister Echarri kinahanglan usab nga morekord sa iyang kaugalingon nga nagkanta ug mosumiter og pipila ka rekording. Dayon siya adunay kataposan, birtuwal nga interbiyo sa kaubanan sa Tabernacle Choir nga direktor sa musika nga si Ryan Murphy. “Gikulbaan gyod ko pag-ayo,” miingon siya.
Sa kataposan, napili siya kauban sa laing 13 sa tibuok kalibotan nga mokanta sa kinatibuk-ang komperensiya, ug niadtong Septiyembre 2024, misakay siya og eroplano paingon sa Estados Unidos. Pag-abot, nadayagnos siya og COVID-19 ug kana ang sinugdanan sa iyang kwarentena.
Ang nag-inusara nga gibulag layo gikan sa panimalay nagtudlo og tiunay nga leksiyon: Ang Manluluwas mohatag og kahupayan sa iyang labing magul-anon nga mga higayon (tan-awa sa Juan 14:26–27). “Nagtuo ko nga dili na ko makapadayon,” miingon siya. “Medyo nawad-an nako og paglaom, apan aduna koy hugot nga pagtuo. Sa samang higayon, gibati nako nga himsog ra. Karon ang usa sa akong dakong tumong mao ang pagpangita niadtong kinsa tingali mibati nga nag-inusara ug mosulay sa paghatag nila og kahupayan.”
Human sa walo ka adlaw sa pagkanag-inusara, ang iyang kahimsog ug tingog naulian, ug nagpraktis uban sa choir. Nakakanta siya uban sa gatosan diha sa pulpito sa Conference Center ug mikanta sa Oktubre 2024 nga kinatibuk-ang komperensiya.
“Ang Dios buhi. Siya nakahibalo kanato, sa matag usa kanato,” miingon siya. “Ang musika makapaayo, adunay makaayo nga gahom, ug kinahanglan natong pun-on ang atong mga kinabuhi og musika. Importante kaayo. Gibati nako ang butang nga gusto sa Ginoo nga isulti kanako: Pun-a ang imong kinabuhi og musika.”