Kon ang Dios Adunay Simbahan dinhi sa Yuta

Ni Nicolas Watbled, Salies de Béarn, France

Gisultihan nako ang mga misyonaryo nga dili mag-usik-usik sa ilang oras, nga ako adunay kaugalingong mga gituohan. Apan akong nahibaloan nga ang ilang mga pagtulun-an nagtukma sa akong mga gituohan mahitungod sa pamilya, sa usa ka mahigugmaong Amahan sa Langit, ug sa Simbahan sa Manluluwas.

Sa bata pa ko, dad-on ko sa akong mga ginikanan ngadto sa lain-laing simbahan. Unya, isip usa ka ten-edyer, misugod ko sa pagdangop sa Dios ug misugod sa pagbasa sa Biblia. Nindot ang akong gibati.

Samtang naghunahuna ko mahitungod sa Dios ug sa katuyoan sa kinabuhi, naamgohan nako nga importante nga makabaton og pamilya. Mituo ko nga ang mga lider sa simbahan kinahanglang motudlo pinaagi sa ehemplo, apan sa simbahan nga akong gitambongan, ang mga pari dili minyo. Wala ko makasabot niini. Mituo ko nga maayo ang maminyo ug makabaton og pamilya.

Ako 16 anyos nianang higayona. Ako adunay uyab nga gihigugma kaayo nako, apan gibiyaan ko niya. Lisod kadto alang nako. Grabe ang akong pag-antos sa hapit usa ka tuig. Tungod niana nga kasinatian, gusto kong mahibalo kon diin ko gikan, kon nganong ania ko sa yuta, kon unsay katuyoan sa kinabuhi, ug kon unsa ang mahitabo human sa kamatayon. Gusto ko nga akong makaplagan ang tubag niini nga mga pangutana sa akong kaugalingon. Apan human sa paghunahuna niini sulod sa dugay nga panahon, midangop ko sa Dios pag-usab ug misulti sa akong kaugalingon, “Ang Tiglalang sa kinabuhi mas nasayod sa kinabuhi kaysa kanako. Kinahanglan kong mangita sa tubag gikan Kaniya.”

Sa pagbasa sa Biblia, akong nakat-onan nga si Jesus mitawag og napulog duha ka Apostoles. “Kon ang Dios adunay simbahan karon,” naghunahuna ko, “kinahanglan nga kini adunay Apostoles.” Nag-anam ko kainteresado sa relihiyon, ug gusto ko nga magpabunyag.

Sa dihang naghisgot ko sa akong amahan mahitungod sa Dios, giingnan ko niya nga ang Dios makiangayon. Miingon siya nga magpabunyag ka aron maluwas, o pagatunglohon ka ngadto sa impyerno hangtod sa kahangtoran. Dili ko motuo nga ang usa ka mahigugmaong Amahan sa Langit malipay nga motugyan sa Iyang mga anak ngadto sa impyerno hangtod sa kahangtoran tungod lang kay wala sila magpabunyag. Unsaon man kadtong walay kahigayonan nga mabunyagan?

Sa France, diyotay lang ang mga tumutuo. Ako adunay buotan nga mga higala, apan wala sila mabunyagi. Nakaingon ko nga dili maayo nga hunahunaon nga maadto silang tanan sa impyerno.

Mao nga, nakadesisyon ko nga maghhimo og akong kaugalingong mga gituohan. Mituo ko sa usa ka Dios kansang gugma hingpit ug mobuhat sa tanan diha sa Iyang gahom sa pagluwas sa Iyang mga anak. Kon ang Iyang mga anak dili gusto nga modawat sa Iyang himaya, anaa ra kana kanila. Apan Siya mohatag nila og kahigayonan.

Laing Dalan sa Pagkakabig

Usa ka adlaw ang duha ka full-time nga mga misyonaryo nga nagtrabaho sa among baryo mibati nga naaghat nga moagi sa laing dalan pauli. Sa ilang pagpadulong sa pagpauli, nahimamat nila ang akong inahan. Gipahunong niya sila ug naghimo og panagsabot aron mahimamat ko nila. Wala ko malipay niana. Dili ko gusto makig-istorya nila. Nagtuo ko nga moingon sila og, “Kinahanglan ka nga maminaw namo. Kinahanglan ka nga motuo sa unsay among isulti nimo.”

Sa dihang ang mga misyonaryo miabot alang sa among pakighimamat, gisultihan ko sila nga, “Ayaw mo pag-usik-usik sa inyong oras. Duna na koy kaugalingong mga gituohan. Ang inyong gibuhat maayo, apan nagtuo ko nga ang pamilya importante kaayo. Nagtuo ko nga ang mga lider sa simbahan kinahanglan nga minyo. Nagtuo ko nga ang usa ka simbahan kinahanglan nga adunay napulog duha ka Apostoles. Nagtuo ko nga ang Dios moluwas sa daghan Niya nga mga anak kutob sa Iyang mahimo. Ug wala ko magtuo sa pagpanigarilyo ug pag-inom og makahubog.”

Nasurprisa ko sa pagkasayod nga ang ilang mga pagtulun-an nagkatukma sa akong mga gituohan. Gihatagan ko nila og Basahon ni Mormon ug mihangyo sa pag-ampo bahin niini. Gibati nako ang Espiritu sa dihang gibasa nako ang basahon, ug gibati nako ang Espiritu uban sa mga misyonaryo. Apan naghunahuna ko, “Basin ako lang ang nagmugna niining positibo nga mga pagbati.”

Nag-ampo ko ug nakadawat og tubag pinaagi sa damgo. Sa akong damgo, giablihan nako ang Biblia. Sa sulod sa Biblia adunay mga label sa lain-laing mga basahon sa Biblia. Ang kataposang label nag-ingon “Mormon.” Kini nga mensahe nakatabang nako nga makasabot nga ang Biblia ug ang Basahon ni Mormon adunay managsama nga ebanghelyo (tan-awa sa Ezequiel 37:15–19).

Ang akong pagpamatuod mas nalig-on pinaagi sa ubang mga kasinatian sa pagbasa ug pagtuon sa Basahon ni Mormon. Sa dihang ang mga misyonaryo midapit nako sa pagpabunyag, ako midawat uban sa kalipay. Nabunyagan ko eksaktong usa ka tuig human sa pagbiya sa akong uyab nako. Ang akong bunyag nagtimaan sa dakong kausaban sa akong kinabuhi. Nawala ang pipila sa akong mga higala sa dihang nagpasakop ko sa Simbahan, apan nakakaplag ko og bag-ong mga higala sa branch nga akong gitambongan.

Si Brother Watbled uban sa iyang pamilya — “Ang ebanghelyo naghatag nako og hilabihan nga kahayag ug kalipay,” nag-ingon si Nicolas. “Ang Dios mipanalangin nako. Nakahimamat ko og buotan nga babaye, ug kami adunay tulo ka buotan nga mga anak nga babaye.”

Ang ebanghelyo naghatag nako og hilabihan nga kahayag ug kalipay. Napuno ko sa Espiritu ug kalipay. Naghunahuna ko, “Ang tanan nakong mga pag-antos kaniadto mao ang nagdala nako dinhi.”

Ang Dios mipanalangin nako. Nakahimamat ko og buotan nga babaye, ug kami adunay tulo ka buotan nga mga anak nga babaye. Duha nila nagserbisyo og misyon, nagtabang sa uban nga makasabot sa unsay akong nasabtan sa milabayng katuigan: “Ang pamilya mahinungdanon sa plano sa Tiglalang alang sa walay kataposan nga destinasyon sa Iyang mga anak,” “ang mga patay nga naghinulsol matubos, pinaagi sa pagkamasulundon ngadto sa mga ordinansa sa balay sa Dios,” (Doktrina ug mga Pakigsaad 138:58), ug ang Ginoo nagtawag og apostoles ug mga propeta sa atong panahon aron mogiya sa Iyang Simbahan (tan-awa sa Mga Taga-Efeso 2:20).