Ang Ginoo Migiya Nako nga Makapauli

Paghulagway pinaagi ni David Malan

Samtang nagtrabaho ko sa akong doctoral degree ug nagtudlo og musika didto sa Estados Unidos, naningkamot ko sa pagsunod sa ebanghelyo ug mibati sa impluwensiya sa Dios sa akong kinabuhi. Layo ko sa panimalay ug usahay mobati nga nag-inusara, apan gibati nako ang Iyang gugma ug tingog nga naggiya sa akong mga desisyon.

Usa ka adlaw ang pagbati miabot nga kinahanglan ko nga mopauli sa akong kaugalingong nasod sa Bolivia. Ang pagpauli dili usa ka desisyon nga sayon rang himoon. Maayo ra ang tanan. Apan human sa pag-ampo, kusganon nakong gibati nga kinahanglan ko nga mopauli tungod kay adunay importante nga butang nga nagpaabot nako.

Human sa akong pagpauli, usa ka bachelor’s program sa musika giablihan sa usa sa labing sikat nga mga unibersidad sa Bolivia, diin nakakaplag ko og trabaho isip usa ka propesor.

Sa akong kaugalingong ward, nakahimamat dayon ko og usa ka batan-ong babaye nga wala pa nako makit-i sukad. Ang iyang mga ginikanan nakabig sa Simbahan samtang nangandam ko sa pagbiya paingon sa Estados Unidos mga tuig ang milabay. Nagsugod kami og deyt ug nagminyo, nga nahimong dakong panalangin sa akong kinabuhi.

Duha ka tuig ang milabay, ang akong lola nahiling nga adunay kanser. Suod kaayo kami. Sa bata pa ko, sultihan ko niya, “Ubanan ko nimo kanunay, ug nahibalo ko nga atimanon ko nimo.”

Tungod kay nakapauli na man ko, anaa ko dihang nanginahanglan siya nako, migahin og panahon uban niya kada adlaw atol sa iyang kataposang mga bulan. Wala siya magpasakop sa Simbahan sa buhi pa siya apan ganahan siya sa Liahona nga magasin, sa Basahon ni Mormon, ug sa kinatibuk-ang komperensiya. “Mituo ko niining tanan,” siya miingon.

Sa kaulahian, napanalanginan ko nga makaadto sa Cochabamba Bolivia Temple uban sa akong mga ginikanan sa dihang ang akong lola naselyo ngadto sa iyang bana, kinsa batan-on pa nga namatay. Wala gayod siya magminyo pag-usab. Gibati nako nga anaa sila sa templo uban namo, malipayon ug nagkauban pag-usab. Nindot kaayong tan-awon nga makita ang akong mga ginikanan sa lawak sa pagselyo isip proxy alang nila.

Wala kita mahibalo kon unsa ang dangatan sa atong kinabuhi, apan ang Ginoo nahibalo kon asa kita kinahanglan nga anaa. Nahibalo usab Siya kon unsaon sa pagpanalangin nato, ug Siya mogiya nato sa paglihok agi og representante Niya aron sa pagpanalangin sa uban. Kon kita mosalig sa Iyang kaalam ug paggiya, nasayod ko nga Siya makahimo og daghan pa sa atong kinabuhi kaysa atong mahimo.