“Bililhong Bonsai nga mga Kahoy ug Bililhong mga Pagpamatuod,” Liahona, Sept. 2025.
Bililhong Bonsai nga mga Kahoy ug Bililhong mga Pagpamatuod
Ang matag pagpamatuod usa ka bililhong gasa nga nagkinahanglan og hilabihan nga personal nga debosyon ug hugot nga pagtuo aron makalahutay kini isip usa ka butang sa katahom ug sa kalipay.
Litrato sa maayong kabubut-on sa tagsulat
Sa sentro sa Tokyo, Japan, aduna koy nakita sa usa ka matahom nga tanaman sa parke nga nakapahingangha nako. Sa kilid sa dalan paingon sa parke adunay usa ka paril diin gisab-it ang sobra sa dosena nga gagmay nga tamnanan [pot], matag usa gitamnan og bonsai nga kahoy. Matag talagsaon nga matahom nga kahoy adunay gamayng karatula nga mipakita sa edad niini. Kadaghanan sobra na sa 100 ka tuig.
Ang usa, 390 ka tuig, namunga lang gihapon. Ang lain dunay duha nga naglikos nga mga punoan—ang usa patay, ang usa buhi. Kadto usa ka makapahingangha nga 590 ka tuig.
Naghunahuna ko kon giunsa nga ang matag bonsai nga kahoy orihinal nga gipatubo ug gipul-ongan inubanan sa dakong garbo ug kalipay. Sa kaulahian, ang mga kahoy lagmit nahimong mga bahandi nga panulondon sa pamilya. Naghunahuna ko sa tigulang na nga mga ginikanan nga nagsangon sa ilang mga anak og responsibilidad nga malumong amumahon ang bonsai nga kahoy sa pamilya, ipabilin kining luwas gikan sa kadaot ug tipigan kini alang sa umaabot nga mga henerasyon.
Kining gagmay nga mga kahoy sa Tokyo nakasugakod latas sa makuyaw nga mga gubat ug mga panahon sa kalinaw, latas sa dagkong mga unos ug mga higayon nga kalma ang panahon. Usa kini ka talagsaong pamatuod sa debosyon, tradisyon, ug mahigugmaong pag-atiman.
Usa ka Bililhong Gasa
Sukad nga nakita kining bonsai nga mga kahoy, naintriga ko sa paghunahuna kon giunsa sa daghang henerasyon sa mga pamilya sa Ang Simbahan ni Jesukristo sa mga Santos sa Ulahing mga Adlaw sugod sa usa ka pioneer nga sakop sa pamilya sa pagbaton og usa ka bililhong pagpamatuod sa gipahiuli nga ebanghelyo.
Ang pagpamatuod sa matag bag-ong miyembro sa Simbahan magsugod kon kini “hatagan og luna” o itisok ang pulong sa Dios diha sa ilang mga kaisingkasing ug dayon amumahan kini (tan-awa sa Alma 32:28). Samtang ang pagpamatuod motubo, ang mga binuhatan nianang bag-o nga miyembro gihulma ug gipul-ongan ngadto sa lahi nga paagi sa kinabuhi.
Pinaagi sa daghang pagsulay ug mga unos sa kinabuhi, ang giamumahan nga pagpamatuod diha ni Jesukristo ug sa Iyang Simbahan mas molig-on. Sama sa bonsai nga kahoy, ang pagpamatuod ipakigbahin ug ipasa isip usa ka bililhong gasa alang sa sunod-sunod nga mga henerasyon aron patuboon ug amumahan usab.
Matag henerasyon adunay dakong responsibilidad sa pag-angkon niana nga pagpamatuod. Kini usa ka bililhon apan ampinganan nga gasa. Aron molahutay kini isip usa ka butang sa katahom ug kalipay nagkinahanglan kini og hilabihan nga personal nga debosyon ug hugot nga pagtuo.
Wala kita masayod kon unsa ka dako ang kahoy nga nakita ni Lehi sa iyang damgo. Apan kita nasayod nga hilabihan ang katahom niini ug naghinamhinam siya nga ipakigbahin ang mga bunga niini ngadto sa iyang pamilya (tan-awa sa 1 Nephi 8). Ang pamilya ni Lehi nahimong usa ka tataw nga ehemplo sa daghang henerasyon nga pamilya—usahay nagmalamposon sa pagpasa sa matarong nga mga tradisyon, ug usahay, makaguol lang, nakakita nga ang mga pagpamatuod nalawos ug namatay sa pag-atubang sa kalisdanan, pagkadili masulundon, ug mga pagsulay.
Nalipay kita niadtong kinsa, isip kinaunhan nga mga Santos sa Ulahing mga Adlaw sa ilang mga pamilya, nag-amuma sa ilang linghod nga mga pagpamatuod pinaagi sa paghimo ug pagtuman sa sagrado nga mga pakigsaad. Ug atong pasalamatan kadtong pioneer nga mga Santos kon giunsa nila pagpasa ang ilang gugma sa Dios ngadto sa umaabot nga mga henerasyon.
Ang mga ginikanan, mga magtutudlo, kabatan-onan, ug mga young adult nga naghatag og prayoridad sa mga miting sa Dominggo, sa pagserbisyo sa templo, ug pagtambong sa seminary, institute, ug mga komperensiya alang sa kabatan-onan ug mga young adult—miuna sa Manluluwas sa ilang kinabuhi—naghatag og espirituhanong luna ug pag-amuma aron ang linghod nga mga pagpamatuod molambo.
Sama sa bonsai nga mga kahoy nga akong nakita sa Tokyo, ang atong mga pagpamatuod kang Jesukristo ug sa Iyang gipahiuli nga ebanghelyo bililhon nga mga katigayonan nga mopanalangin niadtong atong gimahal. Kini mahimo natong kabilin samtang kita mainampingon nga moamuma, mopangga, ug mopakigbahin niini gikan sa henerasyon ngadto sa laing henerasyon.