Pag-ugmad og Mahangtorong Pamilya: Nagasalig kang Kristo Latas sa Dili Mahunahuna nga mga Pagsulay

Dihang una nakong nadunggan ang kanta sa Primary nga “Mga Pamilya Mahimong Manag-uban sa Hangtod,” nakita ko kini isip yano, makahupay nga kamatuoran. Apan human sa panaw nga among giatubang sa among kamagulangang anak nga babaye, si Eliza Annrie, kana nga mga pulong nahimong angkla sa among kalag—suporta sa kinabuhi nga gabayan diha sa unos sa dili mahunahuna nga kagul-anan.

Niadtong Oktubre 2024, si Eliza nahibaloan nga adunay Stage 3 nga Parapharyngeal Synovial Sarcoma—talagsa ra kaayo ug isog nga kanser. Ang paghiling sa iyang kahimsog usa ka milagro mismo, napamatud-an lamang human sa duha ka halos imposible nga biopsy nga operasyon. Ang pag-opera dili mahimo tungod sa nahimutangan sa tumor, mao nga ang chemoteraphy ug radiation mao ra ang paagi sa pagtambal niya. Bisan nakompleto na ang pito ka saykol sa isog kaayo nga chemotheraphy ug 36 ka sesyon sa radiation, ang kanser padayong misulod sa iyang mga bukog ug sa kataposan ngadto sa iyang utok. Miagi siya og dugang pang 10 ka kompleto nga radiation ubos sa panghupay nga pag-atiman. Latas niining tanan, si Eliza mipakita og talagsaong kaisog ug walay pagkapaling nga pagtuo, miatubang sa iyang kataposang mga adlaw nga may kalinaw ug pagsalig sa Manluluwas.

Ang pagtuo ni Eliza giamuma sa daghang paagi. Ganahan siya sa Strive to Be [Maningkamot nga Mahimo] nga musika, nga nakatabang niya aron mobati nga duol sa Manluluwas. Mahinamon siya nga moadto sa templo ug mitambong sa mga miting sa simbahan kutob sa mahimo. Ang panahon nga didto siya sa FSY 2025 nakapalig-on sa iyang pagpamatuod ug mipalawom sa iyang gugma sa Manluluwas. Mihatag siya sa iyang pagpamatuod nga nagbarog sa pulpito—wala maglingkod sa wheelchair—atol sa mga Dominggo sa Pagpamatuod. Bisan naospital ug dili makakita o makalihok, mipadala siya og voice recording sa iyang bishop. Ang iyang patriyarkal nga panalangin mipahinumdom niya sa iyang balaanong pagkatawo ug nakahatag niya og kalinaw, bisan sa mga takna sa labihang kasakit. Sa iyang kataposang mga semana, padayon siya nga nagmata aron kanunay nga makauban namo, nagpakita og gugma ug kaisog nga wala magsalig sa isog nga tambal.

Sa tibuok niya nga panaw, nakasaksi kami og dili maihap nga mga milagro. Ang among bata nga anak nga lalaki, si Daniel, adunay sagradong mga panan-awon sa Langitnong Amahan ug ni Jesukristo nga nagbantay ni Eliza, uban sa mga anghel. Kini nga mga panan-awon naghatag kanamo og kahupay, nasayod nga giatiman siya.

Niadtong Hunyo 18, 2025, mipauli si Eliza ngadto sa atong Langitnong Amahan. Niadtong adlawa nadugmok ang among mga kasingkasing, apan taliwala sa kasubo, ang Espiritu mihunghong nga ang iyang yutanon nga misyon nahuman na—ug ang among istorya uban niya layo pa sa kahumanan.

Paglabay sa pipila ka semana, niadtong Agosto 2, 2025, didto sa Manila Philippines Temple, ang akong asawa si Anna Marie mipahigayon sa initiatory ug pagtuga nga mga ordinansa alang ni Eliza. Mituman kini sa labing dako nga tinguha ni Eliza ug mipahinumdom kanamo nga pinaagi sa pakigsaad sa Dios, ang pamilya mabugkos pinaagi sa mahangtoron nga gugma.

Ang mga pakigsaad sa templo nahimong makahuloganon nga tinubdan sa paglaom. Ang kahibalo nga ang among pamilya naselyo alang sa kahangtoran nagdala og kahupay nga dili matukib sa mga pulong. Dili namo mapapas ang among kaguol, apan tungod ni Jesukristo, dili gayod mawala kanamo ang gugma—o ang saad sa panag-uban og usab.

Isip usa ka pamilya, gipili namo nga hugot nga magasalig ni Kristo. Among gisugdan pag-usab ang Dali, Sunod Kanako nga pagtuon, pag-ampo og dungan matag gabii, ug gihimo ang templo nga among kadangpan. Among gihunahuna kanunay ang paborito ni Eliza nga kasulatan, Doktrina ug mga Pakigsaad 6:36: “Tan-aw ngari kanako sa matag hunahuna; ayaw pagduhaduha, ayaw kahadlok.”

Ang pagtukod og mahangtorong pamilya wala magpasabot og kinabuhi nga walay kasakit. Nagpasabot kini nga moduol sa Manluluwas alang sa kalig-on sa higayon nga moabot ang mga pagsulay. Nagpasabot kini nga mosalig nga ang plano sa Langitnong Amahan mas labaw pa kay sa atong masabot. Bisan tuod mubo ra ang kinabuhi ni Eliza, puno kini sa kahayag, pagtuo, ug gugma. Tungod ni Jesukristo, kana nga kahayag nagpadayon sa pagdan-ag sulod sa among pamilya—ug magpadayon sa kahangtoran. Sama sa gisaad sa Manluluwas: “Kay ako buhi man, mabuhi usab kamo” (Juan 14:19).