Pagdapit sa Gahom sa Basahon ni Mormon ngadto sa atong Inadlaw-adlaw nga Kinabuhi

Isip usa ka tigdumala sa lasang sa sayong bahin sa mga tuig 1990 ug 2000, akong nakat-onan ang mahinungdanon nga bili sa paggamit og mapa ug kompas sa pagplano ug sa pagpahigayon og ekspedisyon. Kini nga mga himan nakatabang nako sa pagdiskobre ug pagprotekta sa lasang gikan sa kadaot. Sa sama gayod nga paagi, nagasalig ko sa Basahon ni Mormon nga mogiya nako sa akong espirituwal nga panaw ug sa mga hagit sa kinabuhi.

Kana nga panaw nagsugod sa dihang ang Basahon ni Mormon nahimong instrumento nga migiya sa pagkakabig sa akong mga ginikanan ngadto sa Ang Simbahan ni Jesukristo sa mga Santos sa Ulahing mga Adlaw didto sa Pagadian City, Mindanao, niadtong Hunyo 7, 1970. Kwatro anyos pa lamang ko niadto. Sa pag-edad nako og otso anyos, gibunyagan ko sa akong amahan, nga maoy sinugdanan sa akong kaugalingong dalan sa pakigsaad. Sa tibuok nakong pagkabata, ang akong panaw nalambigit sa akong mga ginikanan kay gipadako man nila kami sa ebanghelyo. Gitudloan nila kami—pinaagi sa pulong ug ehemplo—sa importansiya sa Igpapahulay, sa sakramento, ikapulo, mga panalangin sa pagkapari, ug sa kanunay nga pagtuon sa kasulatan.

Isip usa ka batan-on nga estudyante sa seminary, nakakat-on ko og bililhon nga pagtulun-an: sama nga ang usa ka tawo dili gyod hingpit nga makatugkad sa lami sa asin kon dili siya makatilaw niini, ang usa ka tawo dili gayod hingpit nga makasabot sa kamatuoran sa Basahon ni Mormon kon dili siya mobasa, mamalandong, ug mag-ampo bahin niini. Sa dihang nakompleto nako sa pagbasa ang Basahon ni Mormon sa unang higayon, nakalitan ko sa balik-balik nga pagkahimong matarong ug pagkahimong daotan sa mga tawo ug sa kataposan sa pagkapukan sa mga Nephita. Nakahukom dayon ko nianang higayona nga maningkamot sa pagkamatarong ug sa pagtuman sa paghinulsol sa akong pagkabatan-on.

Ang akong pagpamatuod mahitungod sa Dios ug sa gugma sa Basahon ni Mormon napaladman sa dihang nadawat nako ang akong patriyarkal nga panalangin sa edad nga 15 anyos. Bisan tuod niadto pa lamang adlawa nahimamat nako ang patriyarka, gibati nako nga nakaila kaayo siya nako. Ang iyang dinasig nga tambag nakahatag nako og klaro nga dalan nga angay sundon ug mipamatuod nga ang Dios personal nga nakaila nako. Kana nga dalan naglakip sa abunda nga pagdawat sa pulong sa Dios pinaagi sa paghigugma sa mga kasulatan.

Kini nga tambag nahimong usa ka espirituwal nga angkla sa dihang, pagka 16 anyos, mibiya ko sa among panimalay aron moeskuwela og kolehiyo didto sa Los Baños, Laguna. Kay nalayo sa pamilya ug gilibotan sa pipila ra ka mga miyembro sa simbahan, nakakaplag ko og kalig-on pinaagi sa akong nabatasan nga pagbasa sa Basahon ni Mormon kada adlaw. Nakapalig-on kini sa akong pagpamatuod, nakatabang nako nga mohawod sa akong pagtuon, ug nakapalig-on sa akong tinguha nga moserbisyo og full-time nga misyon human sa pagradwar.

Sa sayong bahin sa akong misyon, akong naamgohan nga ang tanan nga atong gitudlo ug gituhoan isip mga Santos sa Ulahing mga Adlaw nakagamot diha sa Basahon ni Mormon. Sukad niadtong panahona, nakahukom ko nga ipaila kini sa matag oportunidad.

Usa sa maong oportunidad miabot nga wala damha. Usa ka higayon ang akong kompanyon ug ako “nakorner” sa usa ka lawak nga gilibotan sa mga ministro sa laing simbahan kinsa misulay sa pagdaot sa atong mga pagtulun-an. Wala mi makiglalis nila ug hilom nga nag-ampo og paagi nga makalingkawas. Dayon, ang usa ka leksiyon sa seminary misantop sa akong hunahuna. Ako silang gipangutana, “Unsaon ninyo pagsulti kon unsay lami sa asin ngadto sa usa ka tawo nga wala pa gayod makatilaw niini?” Ang uban misulay og tubag apan wala mainsakto, hangtod nga adunay usa nga miingon, “Simple ra—tilawan kini!” Dayon akong giisa ang akong kopya sa Basahon ni Mormon ug nangutana, “Aduna bay usa kaninyo nga nakabasa niini?” Walay usa nga miisa sa iyang kamot o mitubag nga nakabuhat sila niini. Ang kahilom lamang ang mipatigbabaw. Nakahatag kadto kanamo og oportunidad sa paghatag sa among pagpamatuod ug midapit kanila nga sila mismo mobasa niini. Kadto nga panagtagbo natapos sa malinawon nga paagi, ug ang balita mahitungod niini nasabwag sa komunidad, nag-abli sa mga pultahan nga kanhi sirado.

Gimahal nako ang Basahon ni Mormon. Kini ang pundasyon ug ang sukaranang bato sa akong pagpamatuod sa Langitnong Amahan, ni Jesukristo, ug sa kamatuoran sa Iyang ebanghelyo. Ang akong personal nga pagpamatuod nga si Propeta Joseph Smith tinuod nga gitawag sa Dios ug ang Simbahan ni Jesukristo napahiuli niining ulahing mga adlaw. Sulod sa 40 ka tuig na karon, naningkamot ko ug nagpadayon sa pagpaningkamot nga mobasa sa Basahon ni Mormon kada adlaw. Ang pagtuman sa mga pagtulun-an niini nakapaduol nako ngadto sa Dios ug nakapalig-on nako sa akong mga tahas isip bana, amahan, lider sa Simbahan, ug disipulo ni Kristo.

Akong gidapit ang tanan sa pagdapit sa gahom sa Basahon ni Mormon aron makahimo sa labing dakong kausaban sa atong kinabuhi kada adlaw. Atong higugmaon ang pagbasa ug pagtuon niini matag adlaw. Akong ipalanog ang saad ni Presidente Russell M. Nelson:

“Kon mainampoon [kita] nga magtuon sa Basahon ni Mormon kada adlaw, makahimo [kita] og mas maayong mga desisyon—kada adlaw. . . . Kon mamalandong [kita] unsay [atong] gitun-an, ang mga bintana sa langit mobukas, ug makadawat [kita] sa mga tubag sa [atong] mga pangutana ug direksyon sa [atong] kinabuhi.”

Atong buhaton, nga pinaagi sa Basahon ni Mormon, “magbusog [kita] sa mga pulong ni Kristo; kay tan-awa, ang mga pulong ni Kristo motug-an kaninyo sa tanang butang unsay inyong angay nga buhaton” (2 Nephi 32:3). Ug “kon [kita] mopadayon sa unahan, magpakabusog sa pulong ni Kristo, ug molahutay hangtod sa kataposan, tan-awa, sa ingon niana miingon ang Amahan: Makabaton [kita] og kinabuhing dayon” (2 Nephi 31:20).