Jar im juon Menin Letok Ekwojarjar

Tina Fealofani, juon eo 15 rūttoon im ej jān Sydney Australia Mordale Stake, ej āinwōt juon iaan ro rellōn̄ rōm̧m̧an eo ej kajjieon̄ in mour kake gospel in ilo laļin obrak kōn abwilōn̄lōn̄ ko. Kōjekdo̧o̧n apan̄ ko ej iiooni, ej lo kajoor ilo an keememej bwe ej juon leddik nejin Anij. Eaar ba, “ijeļā bwe Jisōs Kraist im Jemedwōj Ilan̄ rej aolep iien pād ijeņ n̄an kōj . . . n̄e jej aikuj jipan̄.” Tōmak in eaar tōl e ilo kāālet ko reppen ilo jikin jikuuļ, ippān baam̧le eo an, im ilo iaļ in an make.

Juon iaan apan̄ ko reļļap Tina ej iiooni ej kōjekdo̧o̧n ro m̧ōttan. Ilo jikin jikuuļ eo an, elōn̄ rijikuuļ ro rej bōk koņaer ilo m̧akūtkūt ko rej jum̧ae pedped in katak ko an gospel in, āinwōt vape. Tina ekar kwaļo̧k, “ke iaar jino high school, iaar jab jeļā n̄e inaaj m̧ōttā ippān jet armej kōnke aolep iien rejjab kōm̧m̧ani kāālet ko rem̧m̧an.” Ijelo̧kin leļo̧k an, eaar kāālet n̄an make iaio̧ ippān ro m̧ōttan ro renaaj jipan̄ e kōn jon̄ak ko. “Iaar kōņaan pād ilo juon mejatoto eo me ejipan̄ eō kāālet men eo ejim̧we. Eaar ba, ijjab kōņaan inepata kōn men ko me ijeļā rejjab jim̧we.”

Bar juon wāween ilo an lo kajoor ej kōn kōjeraam̧m̧an ko an priesthood eo jemen eaar leļo̧k n̄an e ilo jinoin jikuuļ kajjojo iiō. “Kajjojo iien n̄e ij en̄jake m̧ōjņo̧, ij ļōmņak kōn kōjeraam̧m̧an eo an jema. Eaar ba, ij keememej an ba, ‘kwonaaj maron̄ in kōm̧m̧an men ko reppen ilo iiō in,’ im ekar jipan̄ eō.” Kōjeraam̧m̧an kein rej kakeememej e bwe Anij ej kea kake e im enaaj tōl e ilo apan̄ ko an.

Jar ej juon iaan en̄jake ko rej kōkajoorļo̧k naan in kam̧ool eo an Tina. Juon raan, Tim im ro jatin raar ikkure ilo jikin kallib eo an kabun̄ in ej eaar waļo̧k juon jorrāān ke raar ļak ilowaan m̧ōnjar eo. “Kōm kar bajjōk ikkure, innām kar kile ke eļak kōjem eo, im kōm kar jab diwōj. Tina ej keememej, kōm kar jino lōļn̄o̧n̄ kōnke ejjeļo̧k juon ilowaan m̧ōnjar eo emaron̄ ron̄ ainikiem̧.” Ļaddik eo jatin, ekar jeļā ke raikuj juon jipan̄ ekwojarjar, rekar pepe n̄an jar. “Eaar ba, ‘Jemedwōj Ilan̄, jouj jipan̄ juon eo enaaj ron̄jake ainikiem̧ im kōpeļļo̧k kōjem eo.’ Innām, ejjab to, bisop eo etetal tok im ron̄ ainikiem̧!” eaar ba. Bisop eo eaar m̧ōkaj an kōpeļļo̧k kōjem eo, innām kōm kar diwōj. Tina ej keememejļo̧k, “en̄jake in ekar kōm̧m̧an menin aō kile bwe Jemedwōj Ilan̄ ej ron̄jake kōj.”

En̄jake in eaar kam̧wilaļļo̧k jeļā eo an Tina kōn kajoor in jar. Eaar kile bwe Jemedwōj Ilan̄ eaar jipan̄ er ilo iien eo, Ej aolep iien pojak n̄an letok tōl im aenōm̧m̧an n̄e ej oktaļo̧k n̄an E. “Raan eo, iaar jeļā bwe jar ejjab men bajjōk. Ej kōn aolep men. Eaar kwaļo̧k, men̄e men edik, Jemedwōj Ilan̄ ej ron̄jake.” Jen iien eo, eaar kōm̧m̧an bwe jar en m̧ōttan ilo mour eo an, jeļā bwe ej juon iaan men ko rōm̧m̧an āinwōt juon ajri nejin Anij.

Jemdo̧o̧n eo an Tina ippān ļaddik eo jatin eaar kajoorļo̧k kōn en̄jake in. Eaar lo tōmak eo an, im eaar im̧we bwe en kōļapļo̧k lōke eo an ilo Anij. “Lo an ļaddik eo jatū jar kōn eļap tōmak eaar kakeememej eō bwe jeban make dipuk apan̄ ko ad make. Eaar ba, “jemaron̄ oktaļo̧k n̄an Irooj.” Aer ippān doon ekar wōnm̧aanļo̧k wōt, eļaptata ilo kijejeto ko aer n̄an pen wōt ilo gospel in. Ke juon iaer eaar jab kōņaan etal im jar ak jemenere, ro jet rej itok im kōkajoor im lōn̄aj. “N̄e ijjab kōņaan etal, ļaddik eo jatū ej ba, ‘jemoot, jen etal.’ Im n̄e ejjab kōņaan, ij ba n̄an e ejja men eo wōt,” eaar ba.

Kōn apan̄ im en̄jake ko an, Tina eaar jeļā bwe e ej nejin Anij eļapļo̧k jen baj ļōm̧ņake—ej juon unjen kajoor. Ekar ba, “ejipan̄ eō jeļā ke imaron̄ kōm̧m̧ani kāālet ko rōm̧m̧an, imaron̄ jar aolep iien, im bwe ewōr aō baam̧le n̄an jipan̄ eō. Naan in kam̧m̧oolol eo an eaar kajoorļo̧k ilo an kile bwe mour kake gospel in ej bōktok eļap kōjeraam̧m̧an, eļaptata n̄e ej oktakļo̧k n̄an Jemedwōj Ilan̄ ilo tōmak. N̄an kaorōk kwojarjar eo an juon make im kōn kajoor in jar, Tina ejeļā bwe ejjab make iaan ilo iaļ in.

Bwebwenato eo an Tina ej juon menin kakeememej kōj aolep jodikdik ro bwe tōmak ilo Anij ej letok tōl im aenōm̧m̧an ilo iien ko jejjab jeļā kaki. En̄jake eo an ilo jikin kallib eo, an pedped ioon kōjeraam̧m̧an ko an priesthood, im an jar kajjojo raan ekapen tōmak bwe Jemedwōj Ilan̄ ej aolep iien epaak. Ilo an Tina kōkajoorļo̧k tōmak eo an, ej kōjatdikdik bwe ro jet renaaj bar jeļā kōn m̧ōņōņō eo n̄an kile aorōk eo aer make im kōn iakwe eo ejjeļo̧k jem̧ļo̧kin kōn Jemedwōj Ilan̄.