“Wōjke ko Raorōk Reinōknōk im Naan in Kam̧ool ko Raorōk,” Liaona, Jep. 2025.
Wōjke ko Raorōk Reinōknōk im Naan in Kam̧ool ko Raorōk
Kajjojo naan in kam̧ool ej juon menin letok eļap oneān me ej aikuji juon wujlepļo̧k ekajoor an juon make im tōmak n̄an an niknik āinwōt juon men eaiboojoj im elem̧ōņōņō.
Pija ko litok jān rijeje eo
Ilo jantōr eo an Tokyo, Japan, ikar loe juon men ilo juon atake eaiboojoj kar lo̧kjenaō kake. Ijello̧kin juon iaļ ilo paak eo idipin ioon juon wōrwōr ijo elōn̄ ļo̧k jen tōjin in pot jidik ko, kajjojo ewōr ie juon wōjke aorōk einōknōk. Kajjojo wōjke āinjuon aer aiboojoj ewōr juon an kakkaļļe ej kwaļo̧k rūttoon. Aolepāer raar 100 jima iiō rūttooier.
Juon, 390 iiō rūttoon, ej kalle wōt leen. Bar juon me ewōr ruo kāān rej in̄tōk—juon emej, eo juon emour. Ekar juon kabwilōn̄lōn̄ kōn an 590 iiō rūttoon.
Ij ļōmņak kōn ewi wāween an kajjojo wōjke aorōk im inōknōk kar m̧oktata eddōk im jepjep kōn eļap juwa im lan̄lōn̄. Tokālik, wōjke ko raar tin āinwōt men ko raorōk m̧weien baam̧le. Ij ļōmņak kōn ro rūtto ro jinen im jemān rej kappeik ro nejier n̄an bōk eddo in naajidik wōjke aorōk im inōknōk eo an baam̧le, kōjeparoke jen jorrāān im kakkoņe n̄an epeepen ko ilju im jekļaj.
Wōjke aorōk im inōknōk jidik kein ilo Tokyo raar mour ilo tariņae ko im iien aenōm̧m̧an ko, ilo ļan̄ ko reļļap im iien ko mejatoto ej lur. Rej juon kallim̧ur ekabwilōn̄lōn̄ in wujlepļo̧k, iminene, im iakwe.
Juon Menin Letok Aorōk
Jinoin loe wōjke kein raorōk reinōknōk, ekar itok limo̧in n̄a kōn ļōmņak eo kōn ewi wāween an baam̧le ko elōn̄ uwaan epepen ko aer ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata jino kōn juon uwaan baam̧le ej paineer im bōk juon naan in kam̧ool eaorōk kōn gospel eo emōj an bar jepļaaktok.
Naan in kam̧ool eo an kajjojo membōr in Kabun̄ in ej jino n̄e rej “na jikin” n̄an ak kalbwini naan eo an Anij ilo būruweer im naajidik e (lale Alma 32:28). Ilo an naan in kam̧ool eo eddōkļo̧k, jerbal ko membōr kāāl eo rej tōl im kareele n̄an juon wāween mour eoktak.
Jān elōn̄ idajon̄jon̄ ko im ļan̄ ko an mour in, juon naan in kam̧ool ej rūttoļo̧k kōn Jisōs Kraist im Kabun̄ eo An ej eddōk im kajoorļo̧k. Āinwōt wōjke eo eaorōk im inōknōk, juon naan in kam̧ool ej leto letak im laļtak āinwōt juon menin letok aorōk n̄an epepen ko re jeraam̧m̧an n̄an barāinwōt eddōk im naajidiki.
Kajjojo epepen ewōr juon an eddo eļap n̄an kōm̧m̧an an make naan in kam̧ool. Ej juon menin letok eļap oneān ak epidodo an jorrāān. Bwe menin en aitok an pād āinwōt juon men eaiboojoj im elem̧ōņōņō eaikuji wujlepļo̧k ekajoor an juon make im tōmak.
Jejjab jeļā ewi kilepen wōjke eo Liai eaar loe ilo ettōņak eo an. Ak jejeļā bwe eaar lukkuun aiboojoj im bwe eaar jab maron̄ kattar bwe en jeere leen ippen baam̧le eo an (lale 1 Nipai 8). Baam̧le eo an Liai eaar jino erom̧ juon waanjon̄ak n̄an baam̧le ko elōn̄ uwaan epepen ko aer—jet iien tōbrak ilo wōnmaanļo̧k ioon iminene ko rewānōk, im jet iien, ekabūrom̧ōjm̧ōj, loe an naan ko kam̧ool ko m̧adeon̄eon̄ im mij n̄e jelm̧aeik rikapo eo, jab pokake, im māllijon̄ ko.
N̄e jej lan̄lōn̄ ippen ro, āinwōt moktata, armej ro rekwojarjar ilo baam̧le ko aer, karrūtoļo̧k naan in kam̧ool ko aer redik jān kōm̧m̧ani im kōjparok bujen ko rekwojarjar. Im jej kam̧oolol paineer ro Rekwojarjar kōn wāween aer leļo̧k aer iakwe Anij n̄an epepen ko ilju im jekļaj.
Ro jinen im jemen, rūkaki ro, jodikdik ro, im rūm̧m̧an ded ro ejeļo̧k pāleer im rej kattōprak kweilo̧k ko an Jabōt, jerbal ilo tam̧peļ eo, im pād ilo seminary, institute, im kweilo̧k ko an jodikdik ro im rūm̧m̧an ded ro ejeļo̧k pāleer—likūt Rilo̧mo̧o̧r moktata ilo mour ko aer—rej kakke bwidej eo jetōb im ņa kijen naan in kam̧ool ko redik bwe ren eddōk.
Āinwōt wōjke ko raorōk reinōknōk me ikar loi ilo Tokyo, naan in kam̧ool ko ad kōn Jisōs Kraist im gospel eo An ekar bar jepļaaktok im rej men ko m̧weien reļļap oņeār renaaj kōjeraam̧m̧an ro jej iakwe er. Rej maron̄ erom̧ ad menin bwebwenato n̄e jej kōjeparok ad kaajiririk, kaorōk, im kwaļo̧k er jān epepen n̄an epepen.