“Eļan̄n̄e Eaar Wōr juon an Anij Kabun̄ ioon Laļ,” Liaona, Jept. 2025.
Pija ko kōn Tōmak
Eļan̄n̄e Eaar Wōr juon an Anij Kabun̄ ioon Laļ
Ikar jiron̄ mijenede ro n̄an jab joļo̧k aer iien, bwe ewōr aō make tōmak. Ak ālkin iaar loe bwe katakin ko aer rejejjet n̄an tōmak ko aō kōn baam̧le, juon Jemedwōj Ilan̄ eo iakwe, im Kabun̄ eo an Rilo̧mo̧o̧r.
Ke ikar dik, baam̧le eo aō ekar bōk ļo̧k eō n̄an elōn̄ kain kabun̄ ko. Tokālik, āinwōt juon jodikdik, ikar jino in oktak n̄an Anij im jino kar riiti Baibōļ eo. Ekar em̧m̧an aō en̄jake.
Ke ij ļōmņak kōn Anij im unin mour in, ikar loe bwe eaar eaorōk n̄an bōk juon baam̧le. Ikar tōmak bwe ritōl ro an kabun̄ rej aikuj in katakin jen waanjon̄ak, ak ilo kabun̄ eo ikar pād ie, pris ro rekar jab m̧are. Ekar jab alikkar n̄an eō. Ikar tōmak menin eaar em̧m̧an n̄an m̧are im wōr juon baam̧le.
Eaar 16 iiō detta tōre eo. Ekar wōr juon mōtta leddik eo me ikar lukkuun iakwe, ak eaar joļo̧k n̄a. Ekar pen n̄an n̄a. Iaar en̄taan enan̄in juon iiō. Kōn wōt en̄jake eo, ikar kōņaan meļeļe ia eo iaar itok jene, etke iaar pād ioon laļin, ta unleplep eo an mour in, im ta ej waļo̧k ālkin mej. Ikōņaan pukōt uwaak eo n̄an kajjitōk kein ippa make. Ak ālkin ļōmņak kōn kajjitōk ko ilo juon iien eo eaitok, ikar oktak n̄an Anij bar juon alen im ba n̄an n̄a make, “Rikōm̧anm̧an mour bwe ejeļā ļo̧k jen n̄a. Iaikuj pukōt uwaak ko jān E.”
Riiti Baibōļ eo, ij loe bwe Jisōs eaar kūr jon̄oulruo Rijilōk ro. “Eļan̄n̄e eaar wōr juon an Anij kabun̄ rainin,” ij ļōmņak, ”aikuj in kar wōr Rijilōk.” Ikar jino ikdeelel eļapļo̧k kōn kabun̄, im ikar kōņaan bwe in peptaij.
Ke ikar kōnono kōn Anij ippen jema, eaar jiron̄ eō ke Anij ejjab kalijekļo̧k. Eaar ba kwoj peptaij bwe kwon mour ke, ak kwoj mej ilo hell n̄an indeeo. Ikar jab kōņaan tōmak bwe juon Jemed Ilan̄ eo ej iakwe enaaj kōņaan jilkin ļo̧k ajri ro Nejin n̄an hell indeeo kōnke raar jab peptaij. Akō ro me rekar jab bōk juon iien em̧m̧an n̄an maron̄ peptaij?
Ilo France, ewōr jejjo ri tōmak. Ewōr jet ro mōtta me rekar em̧m̧an, ak rekar jab peptaij. Ij kobaiktok bwe eaar jab jim̧we n̄an ļōmņak bwe renaaj aolep etal n̄an hell.
Kōn menin, ikar ļōmņak in ejaake aō make tōmak. Ij tōmak ilo juon Anij eo me an iakwe eweepān im enaaj kōm̧m̧an aolep men ilo kajoor eo An bwe en lo̧mo̧o̧ren ajri ro Nejin. Eļan̄n̄e ajri ro Nejin rejjab kōņaan bōk aiboojoj eo An, enaaj aer wōt pepe. Ak Enaaj leļo̧k n̄an er juon iien.
Juon Iaļ n̄an Oktak
Juon raan ruo mijenede rekar jerbal ilo bukwōn eo aō kar bōk im̧we n̄an bōk juon iaļ n̄an rool n̄an kapijuknen. Ilo iaļ eo aer n̄an m̧weeo, rej ioone jinō. Liin ekar kabōjrake er im kar kōm̧m̧ane juon iien bwebwenato n̄an aō ioon er. Ikar jab m̧ōņōņō kake. Iaar jab kōņaan kōnono ippāer. Ij ļōmņak renaaj kar ba, “Kwōn ron̄jake kōj. Kwoj aikuj tōmak ta eo jej tōn ba n̄an kwe.”
Ke mijenede ro rej tōprak tok n̄an kweilo̧k eo am, iaar ba n̄an er, “Jab joļo̧k ami iien. Ewōr aō make tōmak. Ta eo kwoj kōm̧m̧ane em̧m̧an, ak ij tōmak bwe baam̧le elukkuun aorōk. Ij tōmak bwe ritōl ro an kabun̄ rej aikuj in pālele. Ij tōmak bwe juon kabun̄ ej aikuj in wōr an jon̄oulruo Rijilōk ro. Ij tōmak bwe Anij enaaj lo̧mo̧o̧ren elōn̄ iaan ajri ro Nejin āinwōt n̄e Ej maron̄. Im ijjab tōmak ilo kabaatat im idaak kadek.”
Iaar bwilōn̄ n̄an jeļā bwe katakin ko aer raar jejjet n̄an tōmak eo aō. Rekar letok n̄an n̄a juon Bok in Mormon im kajjitōk ippa bwe in jar kake. Ikar en̄jake Jetōb eo ke ij riiti bok eo, im ikar en̄jake Jetōb eo ippān mijenede ro. Ak ikar ļōmņak, “Bōlen ij bajjek ejaake en̄jake kein rem̧m̧an.”
Iaar jar im kar bōk juon uwaak ilo juon ettōņak. Ilo ettōņak eo aō, ij kōppeļļo̧k juon Baibōļ. Ilowaan baibōļ eo ewōr peij ko ippen bok ko roktak an baibōļ eo. Peij eo āliktata ej ba “Mormon.” Ennaan in ekar jipan̄ n̄a meļeļe bwe Baibōļ eo im Bok in Momon eo epād ie ejja gospel eo wōt (lale Ezekiel 37:15–19).
Naan in kam̧ool eo aō eaar kajoorļo̧k kōn en̄jake ko jet in riit im katak kōn Bok in Mormon eo. Ke mijenede ro rekar karuwaineneik eō n̄an peptaij, iaar m̧ōņōņō. Ikar peptaij juon iiō ālkin an leddik eo mōtta kar ilo̧k jen n̄a. Peptaij eo aō ekar kōm̧m̧ane juon oktak ilo mour eo aō. Eaar ejeļo̧k ļo̧k mōtta ke ikar deļo̧n̄e Kabun̄ in, ijoke ikar loe jet ilo branch eo ikar pād ie.
“Gospel eo ekar bōktok n̄an n̄a eļap meram im m̧ōņōņō,” Nicolas ej ba. “Anij ekar kōjeraam̧m̧an n̄a. Iaar ioon juon kōrā em̧m̧an, im ewōr jilu nejimro leddik.”
Gospel eo ekar bōktok n̄an n̄a eļap meram im m̧ōņōņō. Iaar obrak kōn Jetōb eo im kōn lan̄lōn̄. Ikar ļōmņak, “Aolep en̄taan ko ikar būki mokta emōj aer bōktok eō n̄an jekjek in mour in kiiō.
Anij ekar kōjeraam̧m̧an n̄a. Iaar ioon juon kōrā em̧m̧an, im ewōr jilu nejimro leddik. Ruo iaer emōj aer jerbale mijen ko, jipan̄ ro jet meļeļe ta eo iaar meļeļe kake iiō ko ļo̧k: “Baam̧le eo ej dilepen karōk eo an Rikōm̧anm̧an eo n̄an jipadpad eo n̄an mour indeeo an ajri ro Nejin,” “ro remej im rej ukeļo̧k renaaj bōk lo̧mo̧o̧r, kōn pokake n̄an kain̄i ko an m̧weo im̧ōn Anij” (Katak im Bujen Ko 138:58), im bwe Irooj ej kūr rijilōk ro im rikanaan ro ilo raan kein ad n̄an tōl Kabun̄ eo An (lale Epesōs 2:20).