Anij ekar Letok n̄an N̄a Aenōm̧m̧an

Jān Olivia Araya, Richile, Chile

Ekkeijelļo̧k in iaar bōke ippān Jemedwōj Ilan̄ ekar jipan̄ n̄a ilo juon iien elukkuun pen.

Ilo ad maanjabpopo in al ilo juon m̧wen̄an in aje an Tampeļ eo ilo Concepción Chile ilo 2018, aolep membōr in kumi in al eo an rūm̧m̧an ded ro ejeļo̧k pāleer im iaar tōl e rekar bōk ejja kōttōbar eo: kōm̧m̧ane al eo im jerbal an jetōb im emenin aikuj n̄an leļo̧k n̄an Anij jon̄an eo jemaron̄ leļo̧k emmantata.

Ippān membōr ro an kumi in al eo, jen ruo stake ko ilo jikin kweilo̧k an Richile, Iaar wūjlepļo̧k eō make n̄an maron̄ erreo jon̄an wōt aō maron̄. Ikar kōņaan kōjekļo̧kjeņ kōn Meram eo an Kraist ilo mour eo aō. Ikar kōņaan joortak eo jej leļo̧k n̄an Anij ilo Tampeļ bwe en weepān n̄e emaron̄. Ijeļā bwe eļan̄n̄e jekar kōm̧m̧ane ijo kuņaad, Jemedwōj Ilan̄ emaron̄ jipan̄ kōj, im jemaron̄ al n̄e Enaaj kar kōm̧m̧an bwe jen al.

Tōrein aje ļo̧k eo, kōm kar al kōn ainikiem im būruwōm. Ij ļōmņak enjeļ ro raar al ippem. Anikien kumi al eo eaar po ļōmān. Kōm kar en̄jake an jouj eo an Anij kar pād ippem im bwe Ekar m̧ōņōņō kōn mennin leļo̧k eo am. En̄jake ekar pād wōt ippa ilo juon iien eo aitok.

Ālkin aje eo an tampeļ eo, ikar en̄jake aō m̧ōn̄ā ilo jetōb im ilo juon wōt ippān Jemedwōj Ilan̄. Ikar en̄jake juon ekkeijelļo̧k eo ekajoor n̄an E eo me ijjan̄in kar loe. Ekkeijelļok eo eaar lukkuun kajoor bwe ikar en̄jake tōl ilo jetōb kōn ta eo n̄an kajjitōk kake ke ikar jar (lale 3 Nipai 19:24).

Jān iien aje eo an tampeļ eo, ekar wōr ļalem wiik in aō bōro̧ro̧. Jejjo allōn̄ tokālik, nin̄nin̄ eo nejū ear mij mokta jen an ļotak. Ekar juon iien eo enana. Ikar lukkuun būrom̧ōj, eļaptata tōre eo ij jeļā bwe ijjab maron̄ in kar bar neji ajri.

Ak en̄jake in epen ekar waļo̧k ilo juon iien ke ikar en̄jake eļap kajoor ilo jetōb. Imeļeļe bwe ikar pojak n̄an iien in kōnono kōn joortak eo kōm ekar leļo̧k ilo tampeļ eo. Kajoor in jetōb eo ikar en̄jake ekar jipan̄ eō anjo ion mālijjon̄ in kōnke kōn an Jemedwōj Ilan̄ kar pād ippa im letok aenōm̧m̧an.

Ālkin jidik iien, Anij eaar kōjeraam̧m̧an ļeo ippa im n̄a kōn juon kabwilōn̄lōn̄. Kōm kar lukkuun m̧ōņōņō ke ļaddik eo nejim, Arturo, ekar bōk juon jatin leddik, Daniela.

Ijjab kar maron̄ in kalimjek en̄jake eo im n̄e eaar jab ekkeijelļok eo epaaktata ikar bōke ippān Jemedwōj Ilan̄. Ijeļā bwe aolep men renaaj EM̧M̧AN im ilo an ekkar n̄an Ankilaan. Keememej an men kein kobrak wōt būruwō kōn lan̄lōn̄ im kam̧oolol.