“Ewi Kōjeraam̧m̧an ko Aō kar Kallim̧uri jān Kōļļā Juon Mōttan Jon̄oul?,” Liaona, Jept. 2025.
Ewi Kōjeraam̧m̧an ko Aō kar Kallim̧uri jān Kōļļā Juon Mōttan jān Kōļļā Juon Mōttan Jon̄oul?
Jemed Ilan̄ ej letok “kōjeram̧m̧an ko raorōk ak epen tōpare” ijjelo̧kin kabwilōn̄lōn̄ ko rejidimkij n̄e jej kōļļā juon mōttan jon̄oul eo ad.
Kōmeļeļe jān Dilleen Marsh
Malakai eaar kannaan bwe eļan̄n̄e jej leļo̧k joortak ko ad n̄an Anij, innem E enaaj kōpeļļo̧k wūntō ko an lan̄, im lutōkļo̧k juon jeraam̧m̧an, “m̧ae iien enaaj ejjeļo̧k aikuj” (Malakai 3:10).
Kōn kallim̧ur eo, emakijkij ad ron̄ bwebwenato ko rekabwilōn̄lōn̄ im kōjeraam̧m̧an ko rejidimkij im rej itok n̄an ro kautiej kien eo n̄an kōļļā juon mōttan jon̄oul eo aer. Ak ta eo ej waļo̧k n̄e jejjab bōk ejja kōjeraam̧m̧an ko ilo iien lukkuun aikuj ko an kanniōk? Jab loe ejja kōjeraam̧m̧an ko rej itok ilo mour ko ad emaron̄ in kabūrom̧ōjm̧ōj Jemaron̄ bar kajjitōk, “N̄a ij jab jeraam̧m̧an ke?”
Elder Neil L. Andersen jān Doulul eo an Jon̄oulruo Rijilōk ro ej bar kakemeemej kōj bwe “wūntō ko an lan̄ rej peļļo̧k ilo elōn̄ wāween ko. Jet rej ilo kanniōk, bōtaab elōn̄ rej ilo jetōb. Jet rej mera im pidodo n̄an jejļo̧k jāni. Lōke ilo iien eo an Irooj; kōjeraam̧m̧an ko rej aolep iien itok.”
Katakin ko jān Elder David A. Bednar jān doulul eo an Rijilōk ro Jon̄oulruo emaron̄ bar katakin kōj loe bwe kōjeraam̧m̧an ko jej būki remaron̄ itok ilo wāween ko rellōn̄ me jemaron̄ in jab kar ļōmņake. Ekar ba, “Jet iaan kōjeram̧m̧an ko roktak jej buki ilo ad pokake kein in rellōn̄ ak epen tōpari. Kōjeraam̧m̧an kein remaron̄ wōt itok elan̄n̄e jej jimor niknik ilo mour in jetōb im pokake (lale 1 Korint 2:14).”
Kalimjōke im kile aorōk eo ak kōjeraam̧m̧an ko remera an kōļļā juon mōttan jon̄oul emaron̄ jipan̄ kōj meļeļe bwe Anij ej ļōmņak kōn kōj im ej kōjeraam̧m̧an kōj.
Kōjeraam̧m̧an ko raorōk ak epen tōpari
Ankilaan Anij ejjab iien otemjej āinwōt eo ad (lale Aiseia 55:8–9). Kōn wōt menin, Kōjeraam̧m̧an ko an Anij remaron̄ in jab itok n̄an kōj ilo wāween eo jej kōņaan ak kōtmāne. N̄an waanjon̄ak, Elder Bednar ekar letok jet waanjon̄ak in kōjeraam̧m̧an ko jab kōtmāne bwe remaron̄ itok jān kōļļā juon mōttan jon̄oul: “Jet iien jemaron̄ kajitok bwe Anij en jipan̄, bwe En letok n̄an kōj kajoor ilo ānbwin im kōļmenļo̧kjeņ. Jemaron̄ kūr n̄an jeraam̧m̧an, im jej lo eddōkļo̧k im ļapļo̧k ad jeļā kijenmej, ak jej kajitok kōn eddōkļo̧k im jej jeram̧m̧an kōn menin letok eo ej jouj. E emaron̄ letok iiod jorrāān im lōke ilo ad kate kōj m̧aanļo̧k ilo jibadōk mejen kajik eo ilo wānōk. Im eļan̄n̄e jej kūr n̄an kōjoor jen apan̄ ko an ānbwin, kōmālij im an jetōb, E maron̄ kōļapļo̧k bōklekōt im niknik eo ad.”
Elder Bednar ekar bar ba bwe jet iien “jeram̧m̧an eo tok n̄an kōj ilo wintō ko in lan̄ emaron̄ ļap ļo̧k aorokiier n̄an jerbal im ukōt wāween ko ad jen ad kōtmāne bwe wāween ko ad ren oktak kake juon armej ak bar juon men.” Lale, n̄an waanjon̄ak, ewi wāween an ļeo im lio pālele jān Argentina kar en̄jaake menin ilo mour eo aer ilo bwebwenato in “Why Do You Still Pay Tithing?” (Liaona, M̧ar. 2013, 37).
Iien eo an Anij
Jemaron̄ bar ekkatak n̄an lōke kōjeraam̧m̧an ko rej itok ilo iien eo an Anij make im ilo wāween eo An make.
Elder Michael John U. Teh jān Jiljilimjuonn̄oul eo ekar ba: “N̄e jej pokake kien juon mōttan jon̄oul, jej …jab aikuj in leļo̧k n̄an Irooj juon iien kālet. Ewōr juon kōņaan n̄an jet bwe ren kōtmāne kōjeraam̧m̧an ko kōn men ko an laļ n̄an itok ilo juon iien ejejjet in aer make aņto̧o̧ne. En̄in ej wāween an elōn̄ jerwaane lōke eo aer ilo kallim̧ur ko An. Rej lukkuun tiljek ilo jinoin innem bōjrak n̄an pokake ālkin jet iien n̄e kōtmāne ko aer rej jab tōpare. Jej aikuj kile bwe menotemjej rej kōm̧m̧an ekkar n̄an ankilaan Irooj im iien eo make im jab ko ad.”
Jeļā bwe iien eo an Anij make eoktak jen ko ad emaron̄ in jipan̄ kōj kōkm̧anm̧anļo̧k ad kile bwe kōnke jekar jab bōk juon kabiwlōn̄lōn̄ ejidimkij, ejjab meļeļein bwe jejjab jeraam̧m̧an.
Māletlet an Anij
Būreejtōn Dallin H. Oaks, Rikakpilōklōk eo Kajuon ilo Būreejtōnji eo Kein Kajuon, ekar katakin: “Juon eo ekar ba bwe mour ej ta eo ej waļo̧k n̄an kōj n̄e jej kōm̧m̧ane būļāān ko jet. Kōn wōt men ko me ejjeļo̧k ad maron̄ ie, jejjab maron̄ būļāān im bōktok aolep men jej kōņaan ilo mour ko ad. Elōn̄ men ko raorōk renaaj waļo̧k ilo mour ko ad me jekar jab būļāān e, im jab aoleper naaj ruwainene.”
Ilo iaļ in ad ilo mour in, men̄e ro rej poake n̄an kien juon mōttan jon̄oul remaron̄ en̄jaake apan̄ ko kōn jāān kōn jikin jerbal, idin̄ ko jab jeļā kake, bōd in jab tōlarōk jāān ko, ak an likjab oneān. Jeļā bwe Anij ej eo ej kōjeikik emaron̄ jipan̄ kōj eddōkļo̧k ilo tōmak im kijenmej n̄e jej kappok aorōk in im mera in kōjeraam̧m̧an ko an juon mōttan jon̄oul. Emaron̄ kōn wōt men kein repen im rej lukkuun kōjeraam̧m̧an ko me renaaj jipan̄ kōj eddōk kōn mālijjon̄ make.
Elder Hugh B. Brown jān doulul eo an Rijilōk ro Jon̄oulruo (1883–1975) ekar juon iien kwaļo̧k juon katak ekar ekatak kake ilo jepe juon mar currant ilo juon jikin kallib ilo Canada.
Ke ej etal in karreo im kōm̧m̧ane men ko m̧weien, ekar loe juon mar currant ekar eddōk ļo̧k n̄an jiljino ne aitokan im kar bōjrak an kalle berri. Kōn menin, ekar jepe liktak, likūt wōt jidik, bween kāān ion laļ. Jāde in eaar kōm̧m̧an an waļo̧k āinwōt n̄e mad currant eo eaar jan̄, im Elder Brown eaar ļōmņak ekar ron̄ an mar eo ba:
“Ekōjkan am̧ kōm̧m̧ane menin n̄an n̄a? Iaar kōm̧m̧an aiboojoj im eddōkļo̧k. … Im kiiō emōj am̧ jeke eō. … Ikar ļōmņak kwaar juon eo ej kallib ijin.”
Elder Brown ekar uwaak, “Reitok, mar currant jidik, N̄a ij juon rikallib ijin im ijeļā ta eo ij kōņaan bwe kwon einwōt. Eļan̄n̄e ij kōtļo̧k am etal ilo wāween eo kwōj kōņaan etal ie, Kwojjamin naaj kōtōprak jabdewōt men. Ak juon raan, n̄e kwoj ban kōn leen, kwōnaj ļōmņak likļo̧k im ba, ‘Kom̧m̧o̧ol, Mr. Rikallib, kōn am̧ kar jeke eō, kōn am̧ kar iakwe eō.’”
N̄e jej apan̄ ilo jāān im jab loe kōjeraam̧m̧an ko kar kallim̧uri kōn kōļļā juon mōttan jon̄oul, jej maron̄ ilo denin kemjaaļaļ kajjitōk ippān Anij ilo ejja wāween eo wōt, “Ekōjkan am̧ kōm̧m̧ane menin n̄an n̄a? N̄a ij kōm̧m̧an aolep men kwaar kajjitōk. Im kiiō emōj am̧ jeke eō.”
Ilo iien kein, jej maron̄ bōk juon iien n̄an ļōmņak eļan̄n̄e mālijjon̄ ko jej iooni renaaj lukkuun bōktok eļap kōjeraam̧m̧an ko jān katak ko jej katak kake ilo iaļ in. Jej maron̄ katak n̄an lōke eļap Rikallib eo im kōjeraam̧m̧an ko Ekar kōjeparoke n̄an n̄e jej pād epaakeļo̧k E.
Wōnmaanļo̧k ilo Kōjatdikdik im Jar.
Emera ak aorōk kōjeraam̧m̧an ko Anij ej letok n̄an kōj jān kōļļā juon mōttan jon̄oul me emaron̄ jipan̄ kōj pād ilōn̄in elōn̄ men ko reppen an laļin. Jemedwōj Ilan̄ enaaj koweepān kōjeraam̧m̧an kein n̄an jipan̄ kōj eddōkļok im erom̧ eļapļo̧k einwōt E. Ilo ad ekatak tōmak ilo kile im bōk aolep kōjeraam̧m̧an ko rej itok, jej maron̄ loe juon kūrm̧ool in kallim̧ur eo an Malakai.
N̄e jej pere im ebweer ej waļo̧k jān apan̄ ko ilo jāān, n̄e jej dānin kemjaaļaļ im kajjitōk eļan̄n̄e jej jeraam̧m̧an, jen jab joļo̧k kōjātdikdik! Ijello̧kin, jej maron̄ jar n̄an loe mera eo im aorōkin kōjeraam̧m̧an ko Irooj eaar lutōktok iood im tōmak ilo karōk eo an Jemedwōj Ilan̄ n̄an kōj.
Āinwōt an Elder Andersen kar kam̧ool, “Ij kallim̧uri eok bwe ilo am̧ lōke Irooj, kōjeraam̧m̧an ko an lan̄ rej itok iļokan tok.”