Kajjitōk im Uwaak ko kōn nan̄inmej ilo kōļmenļo̧kjeņ

K: apan̄ ko aō ilo nan̄inmej ilo kōļmenļo̧kjeņ rej ke juon jerawiwi?

U: “Elukkuun aorōk n̄an kile bwe [nan̄inmej ilo kōļmenļo̧kjeņ] ejjab waļo̧k jān m̧ōjņo̧, ak bwe ej itok jān jerawiwi. … Ippān doon, jemaron̄ rupe kōdo̧ in make iaad im jook bwe eddo in jook ej walōn̄tak im kabwilōn̄ ko kōn mour rej waļo̧k.”

K: Etke ijjab em̧m̧anļo̧k n̄e ij kōm̧m̧ane ta eo ejim̧we?

U: Jab kōtmene komaron̄e kōm̧m̧an jabdewōt, ak kōm̧m̧ane ta eo komaron̄. Kōm̧m̧ane ta eo komaron̄e.Eļan̄n̄e rej iddik n̄an wōt kōm̧m̧ani ak kwon m̧ōņōņō kaki, im kwon kijenmej. Elōn̄ tōre ko ilo jeje ko rekwojarjar, Irooj eaar kakien ro jet n̄an ‘jutak wōt’ ‘lur’—im kōttar. Kijenmej im niknik ilo jet men ej m̧ōttan wōt jeļāļo̧kjeņ eo ad ilo mour in.”

K: Elmen aō maron̄ jeļā bwe ij bōk uwaak ko n̄an jar ko n̄e nan̄inmej ilo kōļmenļo̧kjeņ eo ej kōm̧m̧an aer pen bwe in kile?

U: Ilo elōn̄ iaan jab m̧ool ko im apan̄ ko jej ioone ilo mour ko ad, Anij eaikuj ad kōm̧m̧ane ijo em̧m̧antata ipped, n̄an kōm̧m̧ane im jab n̄an kōm̧m̧ane (lale 2 Nipai 2:26), im n̄an lōke ilo E. … Emakijkij ad maron̄ iunmaanļo̧k n̄an kōjātdikdik im jar—ak ilo ejeļo̧k lukkuun kam̧ool—bwe jej kōm̧m̧ane ilo ekkar n̄an ankilaan Anij. Ak ilo ad kautiej bujen ko ad im kōjeparok kien ko, ilo ad kajjieon̄ bar kōjātdikdik in kōm̧m̧an em̧m̧an im erom̧ em̧m̧anļo̧k, jej maron̄ etetal kōn kōjātdikdik bwe Anij enaaj tōl bun̄tōn ne ko ad.”

K: Elmen aō maron̄ en̄jaake lan̄lōn̄ ilo gospel eo n̄e inepata ej kōm̧m̧an bwe en pen n̄an en̄jaake lan̄lōn̄?

U: “ilo ami kappukot naan ko an Anij n̄an juon meļeļe eo em̧ūlaļ kōn karōk eo an Anij indeeo … im kajjieon̄ etetal ilo Iaļ ko An, kwonej en̄jake ‘aenōṃṃan jān Anij, eo ej eḷḷā jān jeḷā otemjej’ [Pillipai 4:7], jekdoon ilo iien būrom̧ōj. Kwonaaj en̄jake juon jon̄an eo eļapļo̧k im ejjeļo̧k jem̧ļo̧kin kōn iakwe an Anij ilo būruōm̧. Meram an laļ eo an celestial enaaj teļļo̧n̄e aelōrlōr in mālijjon̄ ko am̧, im kwonaaj en̄jake aiboojoj in jikin eo kwojjab maron̄ kōmeļeļeiki im menin bwilōn̄ ko me kwojjan̄in kar loi, rewānōk, im ekwojarjar. Kwonaaj en̄jake an jetōb eo am̧ bōk lōn̄ļo̧k eok jān kajoor in laļ.”

K: Elmen aō maron̄ katak n̄an lōke im pedped ion Kraist n̄e ij en̄jaake aō jab maron̄ lōke eō make kōn wōt aō apan̄ in nan̄inmej ilo kōļmenļo̧kjeņ?

U: “Ilo an ļapļo̧k am̧ ekkatak kōn Rilo̧mo̧o̧r, enaaj pidodoļo̧k n̄an lōke tūriam̧o̧ eo An, iakwe eo An eļap, im An kōkajoorļo̧k, kōmour, im kajoor in lo̧mo̧o̧r. …

“… Eļan̄n̄e men otemjej im aolep ro jet ilo laļ in ro kwoj lōke rej wōtlo̧k ak likjab, Jisōs Kraist im Kabun̄ eo An re jāmin likjab jān eok.”

K: Jisōs Kraist ejeļā ke elmen aō en̄jake?

U: “Emaron̄ ejjeļo̧k ro uwaan baam̧le, m̧ōttad, ak priesthood ritōl—ijoke lale im kajjieon̄ kōm̧m̧ane kajjojo emaron̄e—wōn elukkuun jeļā ta eo kwoj en̄jake ak naan ko n̄an jipan̄ eok mour. Ak jeļā menin: ewōr Juon eo eweppān an meļeļe en̄jake, eo ej “kajoor jān aolep lal’ [1 Nipai 4:1], im eo ej ‘maroñ in kōṃanṃan kōn men otemjej e kanooj utiejḷọk jān [am̧] kajjitōk ak ḷōmṇak’ [Epesōs 3:20].”

K: Anij ej ke iakwe wōt eō mekarta ewōr aō apan̄ in nan̄inmej ilo kōļmenļo̧kjeņ?

U: “Bōlen ewōr juon ainikien kabbwereer im marok me ej kaddoik ļōmņak ko am̧, naan ko rej jiron̄ eok ke kojebwābwe im pok, m̧ōjņo im ejjeļo̧k tokjem̧, oktak ak jakpeel kōn iakwe eo an lan̄ ilo wāween eo em̧ool. N̄e kwoj ron̄ meļeļe rot kein, innām jouj im ron̄jake: ainikien kein relukkun bwōd. Jemaron̄ joļo̧k rubbōro ko ad ilo jabdewōt wāween ko renaaj kabōjrak kōj jān iakwe eo an lan̄.”

K: Etke Anij ejjab bōkļo̧k apan̄ in?

U: “N̄an kajieon̄ pukot aenōm̧m̧an eo im meļeļe eo ilo iien kein reppen, eaorōk bwe jen kememej bwe jej mour―im kālet n̄an mour―ilo juon laļ eo ejebābwe ijo kōn un ko ad ñan tōmak eweppen im kwojarjar jenaaj elolo mālejjon̄ jen iien nan iien. Kōn juon jeļāļo̧kjeņ eļap ilo karōk eo an eaar kalimuur kōn juon Rilo̧mo̧o̧r, juon Ripinmuur, eo kōn tōmak eo ad ilo E emaron̄ letok ad anjo̧ jen idajon̄jon̄ ko im apan̄ ko, men̄e tokjeņ n̄an kōm̧m̧ani epen jim̧or ñan Jemen eo eaar jilkintok E im Nejin eo eaar itok. Ej juon wōt kam̧oolol kōn iakwe in ekwojarjar me enaaj kōm̧m̧an bwe en dik ad en̄taan jinoin, innām meļeļe ļo̧k, im āliktata bōk lo̧mo̧o̧r.”

K: Eļan̄n̄e ijeļā bwe enaaj em̧m̧an mour eo tokālik, etke ij aikuj wōnmaanļo̧k in mour kōn menin?

U: “N̄an jabdewōt jodikdik ro nejid jekane rej ioon apan̄, jekdo̧o̧n n̄ūrbōktak ko ak apan̄ ko, mej ilo aer make bōk mour ko aer ejjab uwaak eo ekkar. Eban joļo̧k metak eo kwoj en̄jake ak men eo kwoj ļōmņake ekar waļo̧k. Ilo juon laļ eo eļap aikuj aolep meram ko remaron̄ tōpari, jouj jab kowaane meram eo indeeo an Anij likūti ilo jetōb eo am̧ m̧okta jān an kar ejaak laļ in. Kōnono n̄an jabdewōt. Kajjitōk kōn jipan̄. Jab kakkure juon mour me Kraist ekar aje mour eo An n̄an kōjparoke. Kwomaron̄ anjo̧ ioon apan̄ ko an mour in kōnke jenaaj jipan̄ kom̧ kotaki.”

“Jekdo̧o̧n apan̄ rot eo am, ro jeiū im jatū—ilo kōmālij ak en̄jake ak ānbwiin ak ko eierļo̧k wōt―jab iriki im kowan men eo eaorōk an mour! Lōke Anij. Dāpdāp wōt ilo iakwe eo An. Jeļā bwe juon raan abwilōn̄lōn̄ in enaaj jako kōn eļap kōjatdikdik ko an mour wabanban in naaj jako.

K: Elmen aō maron̄ jipan̄ juon eo ejitōn bōro ippa ej jelm̧ae nan̄inmej ilo kōļmenļo̧kjeņ?

U: “Katakin kōj make kōn nan̄inmej ilo kōlmenļo̧kijeņ ej kōpooj kōj n̄an jipan̄ kōj make im ro jet ro remaron̄ en̄taan kake. Kōm̧m̧ao eo ad ippān doon rem̧ool im ejjeļo̧k nokjak ie renaaj jipan̄ bwe en ļap ad leļo̧k ad im ļōmņak n̄an unin kōnono in eļap an aōrōk. Āliktata, meļeļe ko rej tōl n̄an bōk im̧we im revelesōn. Apan̄ kein emakijkij ad jab loi remaron̄ jelōt jabdewōt armej, im n̄e jej iooni, rej waļo̧k āinwōt jet men ko reļļap n̄an anjo̧ jāni.

“Juon iaan men ko m̧oktata jej aikuji n̄an ekkatak ej bwe jejjab make iaad. Ij karuwaineneik eok n̄an ekkatak kōn unin kōnono in kōn nan̄inmej in kōļmenļo̧kjeņ ilo Life Help jekjen eo ilo Gospel Library app eo. Ekkatak enaaj tōl n̄an meļeļe eļapļo̧k, kile eļapļo̧k, tūriam̧o eļapļo̧k, im iakwe eļapļo̧k. Emaron̄ kadikļo̧k jorrāān ilo an jipan̄ kōj eddōkļo̧k im jeļā kōm̧adm̧ōde men ko jej kōtmeni n̄an ājmour im iaiieo ko rājmour.

K: Juon eo ejitōn bōro ippa em̧ōj an mej jen bōk mour eo an kōn wōt apan̄ in nan̄inmej ilo kōļmenļo̧kjeņ. Ta eo enaaj waļo̧k n̄an er

U: “Ewōr juon kōļmenļo̧kjeņ em̧or an kabun̄ ko bwe bōk mour ej juon jerawiwi im bwe juon eo me [ej mej jān] an make bōk mour ej ilo̧k n̄an hell n̄an indeeo. Menin elukkuun riab. Ij tōmak bwe elōn̄ wōt iaan keej ko renaaj loe bwe armej rein kajojo raar mour jet mour ko reperan bwe make bōk mour ejjāmin kōm̧eļeļeik m̧wilier ilo indeeo ko aer.”

Wōnm̧aanļo̧k im Reilōn̄ļo̧k

Jet iien uwaak Anij ej letok n̄an kōj roktak jān ta eo jej kōjātdikdik kake, im jet uwaak rejjab itok ilo mour in. Ilo ad jab jeļā kōn aolep men kiiō etke elōn̄ iaad jej tariņaeik apan̄ ko an nan̄inmej ilo kōļmenļo̧kjeņ, jemaron̄ bōk aenōm̧m̧an jān kallim̧ur eo bwe juon raan jenaaj bōk juon jeļā kōn men otemjej. Kijejeto ko ad—jekdoon ejeļo̧k leen aer maron̄ en̄jaake ilo iien ko—aolep naaj ke wōr tokjān (lale Galetia 6:9; Katak im Bujen Ko 58:3).

Elder Dieter F. Uchtdorf jān Doulul eo an Jon̄oulruo Rijjilōk ro ekar katakin: “Tōmak ej aiboojoj kōnke ej dim jekdo̧o̧n n̄e kōjeraam̧m̧an ko rejjab itok āinwōt kar kōjatdikdik kake. Jeban maron̄ lo jōkļaj, jejjab jeļā aolep uwaak ko, bōtaab jeamron̄ lōke Jisōs Kraist ilo ad bun̄ m̧aanļo̧k wōt im lōn̄ļo̧k kōnke E ej ad Rilo̧mo̧o̧r im Ripimuur.”

Ilo am im ro jet kwoj kōņaan jerbale jekjek ko raepokpok an nan̄inmej ilo kōļmenļo̧kjeņ, kemeemej bwe aolep men ko rejjab jokkuun wōt juon kōn mour naaj kajim̧wi kōnwōt Pinmuur eo an Jisōs Kraist. Wōnm̧aanļo̧k im pukōt emmanļo̧k—kōn An pād iturājetim, komaron̄ iienotemjej kōjātdikdik.