“Katak ko kar Ekkatak kaki ilo Kile Kraist Bwe En Rijeje kōn Bwebwenato in Mour eo Aō,” Liaona, Jebt. 2025.
Kōrā in Bujen ro
Katak ko kar Ekkatak kaki ilo Kile Kraist Bwe En Rijeje kōn Bwebwenato in Mour eo Aō
Aolep im oktak aer iminene, ijoke n̄e jej kōtļo̧k bwe Anij en anjo̧ ilo mour ko ad, jenaaj kajejjet lukkuun unin kōm̧anm̧an eo ad ilo wāween ko jejjab maron̄ kōtmāne.
Kōmeļeļe jān Protector by Day and by Night, jān Caitlin Connolly, jab maron̄ in kapeik
Ilo 2016—ilo ilubwiljin enan̄in jilu epepen ko in pālele, kiotak im kakaajriri ļaddik ro jilu nejim rejitoōn bōro, ekkatak kōn kien aolep raan, jerbal ilo kūr ko an Kabun̄, im lali menin aikuj ko an baam̧le ko jet ad—ļeo pālele, Doug, im n̄a kar kūr n̄an jerbal jilu iiō āinwōt ritōl ro an mijen ilo Arequipa, Peru. Kōm ekar emmakūt ālkin an ļaddik eo jibum̧ kar ļotak.
Kōm eaar rool n̄an kapijuknen ilo 2019 ippen ruo jibum̧ leddik rekar ļotak. Ruo iaan ļaddik ro rerūtto tata raar m̧are, im eo edik tata eaar jino jerā im epaak n̄an maron̄ m̧are. Ikar bar rool im ekkatak kōn kien, im kūr eo aō em̧m̧antata ej āinwōt Mama im Bubu.
Innām kūr eo eaar itok bwe in jerbal āinwōt Būreejtōn eo Eutiej an Būraimere. Mour eo ejokane iaar ļōmņake n̄an n̄a make eaar n̄an bōk aō iien ippān baam̧le eo aō, bar juon epepen in ekkatak kōn kien n̄an kanooj lale pojak ikijen jāān, im jerbal ilo ward eo aō ak ilo tampeļ eo.
Ta eo eļan̄n̄e iaar mour in jokane?
Inaaj kar joļo̧k eļapļo̧k iien ippān ajri ro jibū im imaron̄ kar kanooj lale bwe en pojak ikijen jet jāān. Im inaaj kar jerwane juon iien, kāājimourur jetōb, im en̄jake an eddōkļo̧k tōmak. Wōnmaanļo̧k? Aaet. Ewōr ke tokjān? O aaet!
Ij leļo̧k aō kam̧ool bwe “kōnke [Rilo̧mo̧o̧r] ewāppen An jeļā lukkuun wōn kōj, Enaaj bōk kōj n̄an jikin ko jejan̄in kar antooneļo̧k.” Ij kōjātdikdik bwe Enaaj bōk kom̧ n̄an jikin ko kom̧ij jan̄in kar antooneļo̧k, im jerbal eo ami enaaj kāājimourur-jetōb. Kōtļo̧k an Anij tōl kom̧ bwe kom̧in jipan̄ juon eo aikuji kom̧.
Kom̧ maron̄ loe ami make katakin rūtto ro n̄an riit. Ak bōlen jerbal n̄an ro rej em̧akūt jen joko jikier. Bōlen kom̧ maron̄ tōl juon kumi in jukjukinpād n̄an mije park ko bwe ren em̧m̧an n̄an baam̧le ko. N̄e jej kōtļo̧k bwe Anij en anjo̧, Enaaj bōk kōj n̄an ijo Ej aikuji kōj ie im n̄an jikin ko jejan̄in kar antooneļo̧k.
Būreejtōn Russell M. Nelson ekar ba bwe jej “bōk eļapļo̧k tōmak itok jān ad kōm̧m̧ane juon men enaaj aikuji eļapļo̧k tōmak.”
Ijeļā bwe em̧ool. Kōnke iaar kōtļo̧k bwe Anij en anjo̧ ilo mour eo aō, kōtļo̧k bwe En rijeje kōn bwebwenato in mour eo aō, tōmak eo aō ilo Jisōs Kraist eaar eddōkļo̧k.
Innām ilo wāween ta, kom̧ naaj kōtļo̧k bwe En anjo̧?
Ewi wāween an juon jodikdik eo ej pukōt jeļāļo̧kjeņ kōtļo̧k bwe Anij en anjo̧? Būreejtōn Dallin H. Oaks, Rikakipilōklōk eo Kein Kajuon ilo Būreejtōnji eo Kein Kajuon, kar kōmeļeļeik bwe kāālet eo ejjab pād ikōtaan baam̧le ak jeļāļo̧kjeņ ak jerbal. Ekar ba: “Iien ej ta eo jej aikuj in kālete, im n̄an kappukōt im̧we eo an Irooj im katak ko an ro Rikarejeran ilo ad kōm̧m̧ane menin.”
N̄an kōmeļeļe kōn un kōnono in, ikōņaan bwe en jejjet n̄an ro me ewōr juon aer ikdeelel em̧oo̧l im emour n̄an m̧are im neji ajri ilo mour in im ro ejeļo̧k pāleer. Ij kile bwe elōn̄ ro rej make iaer in neji kōn wōt mej ak jepel. Ijeļā elōn̄ ripālele ro raar m̧are im kōņaan nejier ajri im rej en̄taan kōn jab maron̄ bōro̧ro̧ im jerata ilo iien koļotak. Ijeļā kom̧ij en̄taan. Kom̧ij kōņaan bwe iien en oktak. Ejjab bwebwenato eo in kom̧in kar jeje kōn kom̧ make. Būruwō ej metak kōn kom̧.
Aolep Bwebwenato an armej im Oktak
Ij kōttōpar juon jeļāļo̧kjeņ, jim̧or undergraduate im juon degree in law. Iaar m̧are ilo lukwōnpen in aō jikuuļ in ekatak kōn kien. Iiō eo ālkin aō kar pass e teej eo ej wōr nejū maanje ļaddik. Ekar wōr nejū nin̄nin̄ ko, im ļeo ippa im n̄a kar lukkuun iakwe im kaajririik er ke kōm eaar jim̧or jerbal. Eļap kar poup, jet iien ejeļo̧k kōtaan poup; kōmij apan̄ im jet iien m̧ōk. Ij jipan̄ e, im ej jipan̄ eō. Baam̧le ekar, im ej wōt, kōtōpar eo am ilōn̄tata. Ļeo ippa im n̄a ekar kapukōt im̧we ilo kāālet kein im iien ko. En̄in kar ta eo kōm kar en̄jake n̄an kar kōm̧m̧ane. Kōm eaar kajjieon̄ kōtļo̧k bwe Anij en anjo̧.
Jān juon ļōmņak eweejepdik ikijen jāān, emaron̄ in kar meļeļe im mālij n̄an jab neji ajri mae iien eo iaar lukkuun pojak ilo jikin aō jerbal. Ijoke ilo kōtļo̧k bwe Irooj en rijeje kōn bwebwenato in mour ko ad, jet iien jej kōm̧m̧ani men ko laļ in eban mālij an kōmeļeļeiki. Iaar bōk eddoin bōro̧ro̧, kieotak ajri, kaajiririik ajri, ektak ajri, ikkure ko aer, eddo ko an Kabun̄ in, juon lio pālele ejeļā kūņaan, im kōttōpar jipadpad ko aō. Ekar juon kāto kātak ikōtaan jerbal eo ekam̧ōņōņō ij jāmin kar ukōte. Kōmro ekar en̄jake kōjātdikdik ilo am jerbal in emakūt kōnke kōm kar kōtļo̧k bwe Anij en anjo̧.
Jouj im jab pok. Ijjab ba bwe aolep ren aikuj ļoor jerbal in emakūt in aō. Bwebwenato ko ad rejjab āinwōt juon. Ikar kwaļo̧k eo aō kōnke ej ta eo ijeļā. Mekarta, juon men eo jej bōke ej ejaake ad ikdeelel: n̄an kōtļo̧k bwe Anij en anjo̧.
Āinwōt juon mama ej kattōpar eo aō eļaptata. En̄in ej lan̄lōn̄ eo aō eļap. Anij ekar kōjeraam̧m̧an ro jined im jemād moktata “kom̗in timoon, im orl̗o̗k, im kobrak lal̗” (Jenesis 1:28). Kien eo m̧oktata me Anij eaar leļok n̄an Adam im Iv “kar ikkijeen aer maron̄ ro jined im jemed .”
Kōņaan eo aō ej n̄an erom̧ juon mama. Kōņaan in eaar jab jokin wōt juon ippān kōttōpar eo aō kōn juon jeļāļo̧kjeņ. Em̧ōj kean̄ kōj n̄an kappukōt jeļā—jen ta ko rej itok ilo kōttōpar eo ad kōn jeļāļo̧kjeņ. Ej barāinwōt itok jen priesthood eo, ijo jej ekkatak n̄an erom̧ āinwōt-anij ilo ad ejaake iakwe, tūriamo, im kijenmej.
Kōtļo̧k bwe Anij en anjo̧ ekoba karuwainenetok E bwe en koba tok ilo iien kōm̧m̧ani kāālet ko ad.
Ij lukkuun kam̧oolol eļap indeeo n̄an kar bōk im̧we in jān Irooj im tōl jān rikanaan ro n̄an jipan̄ ļeo ippa im n̄a ilo iien kōm̧m̧ani kāālet ko am n̄an karuwainenetok ajri ro n̄an baam̧le eo am ke kōm kar kōm̧m̧ane. Ij lukkuun kam̧oolol bwe ikar makūtkūt ioon en̄jake ko im kar jab kōtļo̧k bwe kareel ko an laļin, jeraam̧m̧an, nebar, ak mani bwe ren pinej iaļan kālet eo n̄an kakūrm̧ool maron̄ eo aō ekwojarjar ilo kwaļo̧k im karrutoļo̧k ajri.
Kōrā ro ewōr im ejeļo̧k nejier ajri, jān Caitlin Connolly, jab maron̄ in kapeik
Jon̄o̧k in Kōm̧anm̧an eo Ad.
Eļan̄n̄e em̧m̧aan im kōrā ro rej bōjrak in bōk im karruttoļo̧k ajri ro, iminene in an armej ej jemļo̧k. Elukkuun aorōk, innem, bwe jen jab jim̧or jerwane ak joļo̧k eddo in ekwojarjar āinwōt mama im baba ro.
Juon ļap in meļeļe eo an ekkatak kōn mour ej kwaļo̧k juon jem̧ļo̧k, enana me ejelōt laļ ko im jekjekin mour ko rej kabōjrak an wōr ajri. Ilo elōn̄ m̧ōttan ko ilo laļ in, oraņ bōņbōņ in ro rej ļotak im mour jen juon kōrā eiiet jen ruo. Ej meļeļein jejjab pinej jenkwad make.
Āinwōt ritōl ro an Kabun̄ in, jej inepata kōn makūtktūt ko rej jemļo̧k ilo m̧are im keotak ajri. Ilo United States, elōn̄ ļo̧k jen 30 iiō ko, ritōl ro an kabun̄ raar loe an wōtlo̧k ralitōk ļo̧k n̄an ratimjuon bōjjāān in armej rein rejan̄in mare. Jekjek kein “rej pinej jenkwaņ juon jorrāān ļapļap ipeļaakin laļ.” N̄e armej rejjab m̧are, eiiet ajri rej ļotak.
United States ekar loe bwe, “enan̄in rūtto ro 18–55, kiiō ej juon jeer eļap an rūtto ro ejeļo̧k pāleer im ejeļo̧k nejier ajri jān rūtto ro emōj aer m̧are im ewōr ajri ippāer.”
Ajri ro raorōk n̄an dāpij jekjekin mour. Raorōk n̄an aiboojoj eo an karōk in m̧ōņōņō eļap. Kien eo n̄an kōj ej bwe jen timo̧n im orļok im kobrak laļ “ejjan̄in oktak.”
Kōmeļeļe jān Kōj Ippāer im Er Ippāmim, jān Caitlin Connolly, jab maron̄ in kapeik
Kōtļo̧k Bwe Irooj En Rijeje kōn Bwebwenato in Mour eo Am̧
Ijeļā kōn ikdeelel eo em̧ool an elōn̄ ej n̄an mare im neji ajri. Mekarta elōn̄ ro ejeļo̧k pāleer ak rej en̄taan kōn jab maron̄ bōro̧ro̧. Juon m̧ōtta eo ij epaake, eo im ejan̄in de m̧are im wōr nejin make, eaar iakwe im kar lale ro nejū. Ejjab juon kein pinej jenkwaņ n̄an ajri ro nejin make. Ej menin kam̧ool bwe kōņaan eo an ej pād wōt n̄an juon mama.
Ļaddik eo nejū im leddik eo ippān raar jerbal kōn apan̄ eo ekkā an mej nin̄nin̄ ilo iien kaļotak. Ikdeelel eo aer ejim̧we. Rej kapukōt bwe Anij en anjo̧ ilo mour ko aer. Keememej, n̄e jej kajjitōk ilo tōmak im kōtļo̧k bwe Jisōs Kraist en ri koweepān bwebwenato eo ad, jej aikuj pojak in en̄jake apan̄ ko rejelet eddōkļo̧k an jetōb ilo juon kōjātdikdik an juon eo ej, ilo an metak, elukkuun ļap an aorōk im eļapļo̧k an selestial jen ad maron̄ antoone.
Ilubwiljin ro jera jittōn bōro juon iaan ripālele ro ejeļo̧k nejier me raar tokālik en̄taan kōn aerro jab neji. Raar kajjitōk ilo tōmak eļan̄n̄e rej aikuj kakaajiriri ajri. Ijello̧kin juon nin̄nin̄, raar en̄jake aer kōņaan kakaajiriri emen leddik—5 n̄an 17 iiō. Ejjab kar kōtmāne eo in ilo mour ko aer, raar jeje n̄an erro make. Ak O, jon̄an an kabwilōn̄lōn̄ An kar je bwebwenato in aer.
Jekdo̧o̧n jekjek rōt ko ad, jej aolep mōttan baam̧le eo an Anij, ro uwaan juon baam̧le an laļ, im rej pojak in ro jinen im jemān indeeo. Kōjeraam̧m̧an ko an mour ijo ilōn̄tata raar kōm̧m̧ane n̄an kōj kōn Rilo̧mo̧o̧r, Jisōs Kraist, ekoba ineed. Im kanooj, mekarta jekar liāp im karrūtoļo̧k ajri ilo mour in ak eo juon, mejānkajjik eo ad ej mour ijo ilōn̄tata—me emaron̄ in ad n̄e jej kōm̧m̧ane im dāpij bujen ko. N̄e jej deļo̧n̄ juon bujen jemjerā ippān Anij, jej lukōj kōj make n̄an Ippān, im jejjab make iaad. Jej jeraam̧m̧an kōn “juon jon̄ak eļapļo̧k [An] iakwe im tūriam̧okake.”
Āinwōt armej in bujen, jej ļōmņak im maanjabpopo n̄an m̧are im neji im karrūtoļo̧k ajri. Eaar juon kūr kwojarjar! Jej kōņaan im tōl im kwaļo̧k im jinen im jemān n̄an kwaļo̧k iakwe eo ad n̄an Anij im ajri ro nejin—kōnke jej kōņaan bwe En anjo̧ ilo mour ko ad.
Ej juon iien eaiboojoj n̄an mour im kōm̧m̧ane bujen ko ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata. Meļeļe kōn jerbal eo ad, un, im bōk eddo ilo karōk in m̧ōņōņō eo eļapļo̧k, ej kokwojarjar eļapļo̧k, joļo̧k mijak, im elem̧ōņōņō. Jeļā bwe ewōr juon ad rikanaan emour ej kepooj kōj n̄an ta eo imaan im ej bōktok n̄an eō aenōm̧m̧an lo̧udin̄din̄ ilubwiljin pere ko. Bujen jemjerā eo aō ippān Anij ej letok n̄an eō kōjātdikdik. Aō Bujen Lōke ej ilo Jisōs Kraist.
Ij kam̧ool bwe Ej mour, bwe An iakwe n̄an kōj ej waļo̧k ilo An m̧ōņōņō in leļo̧k An mour im Pinm̧uur n̄an kōj kajjojo.