Anij Ej pād ilo Jōbwe eo

Ilo Pāpode 2nd in iiō in, Sister Meurs im n̄a kar loļo̧k Warrnambool, Australia, n̄an ejaake eo an Warrnambool Branch jān Geelong ward group. Ekar juon raan ekam̧ōņōņō n̄an jepļaakļo̧k n̄an ļām̧oren eo aō n̄an loe an branch eo iaar jar ie ke iaar juon ļaddik edik, bar ejaaak. 

Ruo wiik tokālik, kōm kar kōnono n̄an mijenede ro ilo Pacific Eria MTC ilo Auckland. Em̧m̧an ippam̧ iioon mijened ro rekāāl im en̄jake aer itok limo im tōmak ilo aer jino wūjlepļo̧k jerbal in jipan̄ eo aer. Iien in ekar lukkuun jenoļo̧k kōnke ļaddik eo jibum̧, Harrison Snow, ekar kūr n̄an jerbal ilo Australia Melbourne Mission—im ekar juon iaan mijenede ro. 

Ippān tok m̧ōņōņō eo am, Elder Snow kar jitōn̄e n̄an Warrnambool āinwōt eria eo an jinointata. Iaar ļōmņak in jilkinļo̧k n̄an e jidik bwebwenato kōn ewi wāween an baam̧le eo am̧ kar kobatok ilo Kabun̄ in ijeņ. En̄in ej jidikin ta eo iaar kwaļo̧ke: 

Jemān jim̧aam̧, Frederick Michael Wilhelm Meurs, ekar ļotak ilo Holland ilo 1926. Ekar juon iaan ajri ro 12. Jinen ekar juon eo ekajoor ilo Catholic eo ekkā an bōkļo̧k ajri ro nejin n̄an jar aolep Jabōt. Fred ekar kobaļo̧k ilo jikuuļ ko an Catholic im kar ejaake juon tōmak em̧wilaļ ilo Jisōs Kraist im juon iakwe n̄an jeje ko rekwojarjar. 

Jinen jibum̧, Lois Ellen Meurs, ekar bar ļo̧tak ilo 1926 ilo Warrnambool. Ewōr ruo an būratōr, Ralph im David, ro rekar rūttoļo̧k ilo juon m̧ōn Methodist. Ekar nōbar jerbal in jouj eo an ro jinen im jemān im ekar ejaake juon tōmak eo ekajoor. 

Fred im Lois rekar m̧are ilo Warrnambool ilo Jānode 1954. Julie ekar ļotak ilo iiō eo, im Peter (n̄a) ilo Tijem̧ba 1956. 

Ilo mour in m̧are eo aerro, Fred im Lois raar kōņaan juon wōt ilo tōmak eo aer. Raar jim̧or kobaļo̧k ilo kabun̄ ko an Catholic im Methodist im rekar jim̧or ekkatak kōn Kallim̧ur Ekāāl. Ke rej riit, raar je elōn̄ kajjitōk ko—kōn piktokin doulul in Anij, jerkakpeje, mālim eo an priesthood, karōkin Kabun̄ in, im peptaij kōn tulo̧k ilo dān. 

Raar pukot uwaak ko jān ritōl ro an kabun̄ ijo rej jokwe ie, ak elōn̄ raar ba kōn men ko raorōk āinwōt “kabwilōn̄lōn̄” ak epen n̄an loi. Aer pukot m̧ool eo ekōm̧m̧an bwe ren bar etal n̄an Kabun̄ ko jet ilo Warrnambool. An jan̄in kar ju buruōer, raar oktaļo̧k n̄an Anij ilo jar, kajjitōk Ippān n̄an jilkintok uwaak n̄an er. 

Ilo iien eo, Elder Jones (jān Utah) im Elder Erickson (jān Canada) kar jilkintok er jān Būreejtōn Thomas S. Bingham n̄an kōpeļļo̧k jerbal in mijenede ilo Warrnambool. Rūkaki in kabun̄ ko rekar kakkōļ ribukwōn eo n̄an jab kōnono ippāer, ba ke remaron̄ “ukōt ļōmņak ko an ro nejimi.” 

Elder Jones im Elder Erickson raar kaļļaļļaļ ilo kōjem ko enan̄in jilu allōn̄ im kar en̄jake ke ejjeļo̧k tokjen. Raar ebbweer im mijak. Tōmak eo aer eaar jako. Raar jejeļo̧k n̄an Būreejtōn Bingham im kajjitōk bwe ren em̧m̧akūt jān Warrnambool. 

Innām, juon leta eaar itok juon jān Būreejtōn Bingham. Ālkin lukkuun jar kake, eaar je, ewōr juon en̄jake ekajoor ke armej ro ilo Warrnambool repojak in bōk Kabun̄ in eo em̧ōj an jepļaaktok. Eaar rōjan̄ er n̄an bar ro̧o̧l im jerbal n̄an loļo̧k jikin ko rejjan̄in kar pād ie jinoin. 

Elder ro raar bōk leta eo ejja ilo iien eo wōt Fred im Lois raar jar n̄an bōk uwaak. Jet raan tokālik, raar kaḷḷaḷḷaḷ ilo kōjem eo an baam̧le eo an Meurs ilo 68 Jamieson Street, Warrnambool. Lois eaar uwaak, im elder ro raar ba ewōr juon ennaan ejenoļo̧k kōn Jisōs Kraist im Kabun̄ eo An n̄an kwaļo̧k. 

Lois eaar uwaak, “Jaar jar bwe komin itok--ak komiro ban kijōr in deļo̧n̄tok. Ajri ro nejūm̧ (Julie ruo an iiō im Peter eo jiljino an allōn̄) rekar nan̄inmej in chickenpox, im remaron̄ kōm̧m̧an menin amiro nan̄inmej.” Eaar kajjitōk ippāer n̄an ro̧o̧ļtok juon wiik. 

Lois eaar ba n̄an Fred kōn lotok eo aer, im raar jar wōt bwe mijenede ro ren jab meļo̧kļo̧k in bar ro̧o̧lļo̧k. Rejjab jeļā wōn ro rej iiaio̧ ippāer. 

Elder Jones im Elder Erickson raar ro̧o̧lļo̧k wiik eo tok juon im kar jino katakin Lois im Fred. Ke rej kwaļo̧k, raar uwaaki aolepān laajrak in kajjitōk ko an Fred im Lois. Raar kwaļo̧k piktokin doulul in Anij, mālim eo an priesthood, Jerkakpeje im mour ālkin mej, jibadbad eo an mour in, kōļapļo̧k tōmak, im kain̄i eo an peptaij im kwojkwoj eo. 

Fred im Lois raar kōpeļļo̧k jeje ko aer rekwojarjar—em̧ōj aer kar jino kōkaļļeiki ilo aer kar jino ekkatak--im kar loe kam̧ool in aolep men ko mijenede ro rekar katakin er kaki. 

Iiō ko tokālik, ke iaar kūr āinwōt juon Eria Jiljilimjuonn̄oul, iaar kōnono ippān Elder Bruce Jones kōn en̄jake in. Eaar jiron̄ eō bwe iien eo aer ilo Warrnambool, jān tōre eo raar iioon jinō im jema, eaar juon teej eļap n̄an tōmak eo an. Ak ilo iien ekkatak eo ippān Fred im Lois, ilo aer uwaaki kam̧ool ko jān jeje ko rekwojarjar jān Kallim̧ur Ekāāl, oktak ukōt tōmak eo an im jino ukōt mour eo an. 

Lois im Fred raar peptaij im kar kapen ilo 5 Juļae 1957—jilu wiik ālkin aer kar iioon mijenede ro. Tokālik, jet bar baam̧le raar kobatok ilo Kabun̄ in, im branch eo ekāāl eaar jino kōm̧m̧ani kweilo̧k ko ilo m̧weeo im̧ōn Meurs ilo Jamieson Street. 

Kōj aolep jemaron̄ etale ad tōmak n̄an juon bwebwenato in oktak—emaron̄ kōj make ak ro uwaan baam̧le eo raar bōk gospel eo an Jisōs Kraist eo em̧ōj an kar jepļaaktok. Ej kakeememej eō kōn naan kein jān jebta eo jinointata ilo Kwaļo̧k Gospel eo Aō. 

“Kwoj jepooļ jān armej ro . . . pukot tokjān mour in. . . . Er rej kōņaan “aenōm̧m̧an ilo laļ in, mour indeeo ilo laļ eo ej itok” (Katak im Bujen Ko 59:23). 

Elōn̄ rej “dāpiji er jān m̧ool eo kōnke rej jab jeļā ia eo ren pukote ie” (Katak im Bujen Ko 123:12). 

Rainin, jejeļā bwe karuwaineneik ro m̧ōttad n̄an itok im jar ippād ej letok en̄jake eo em̧m̧antata remaron̄ bōke. Renaaj ekkatak eļapļo̧k kōn Jisōs Kraist, lo uwaak ko n̄an kajjitōk ko aer, im en̄jake ruwainene jān membōr āinwōt kwe. Renaaj en̄jake juon jetōb eo ejenoļo̧k ilo aer bōk koņaer ilo kwojkwoj eo. Renaaj kōņaan katak eļapļo̧k—n̄an jino iaļ in aer ilo iaļan bujen in kōn peptaij. 

Inaaj aolep iien kam̧m̧oolol n̄an Elder Jones im Elder Erickson—kōn meram eo ro jinō im jema raar en̄jake ilo aer kar lo Kabun̄ eo em̧ōj an jepļaaktok ilo Kallim̧ur Mokta, em̧ool ej Kabun̄ eo an Jisōs Kraist im Armej ro Rekwojarjar ilo Raan ko Āliktata.