« កូវីដស្ទើរតែធ្វើឲ្យក្តីស្រមៃច្រៀងក្នុងក្រុមចម្រៀងរោងឧបោសថរបស់គាត់ត្រូវបានរលាយ » លីអាហូណា ខែកញ្ញា ឆ្នាំ២០២៥ ។
កូវីដស្ទើរតែធ្វើឲ្យក្តីស្រមៃច្រៀងក្នុងក្រុមចម្រៀងរោងឧបោសថរបស់គាត់ត្រូវបានរលាយ
ភាពឯកោនៃការដាក់ឲ្យនៅដាច់ដោយឡែកបានបង្រៀនមេរៀនយ៉ាងជ្រាលជ្រៅមួយ ៖ សេចក្តីស្រឡាញ់ដូចជាព្រះគ្រីស្ទសម្រាប់អ្នកដែលឯកោ ។
នៅរដូវស្លឹកឈើជ្រុះឆ្នាំ២០២៤ មិនយូរប៉ុន្មានបន្ទាប់ពីត្រូវបានហៅឲ្យធ្វើជាទីប្រឹក្សាអង្គការប្រចាំតំបន់នៅក្នុងតំបន់អឺរ៉ុបកណ្តាល ឡូរ៉ា អ៊ីឆារី ហ៊ើម៉ូសូ បានធ្វើដំណើរជាង ៥០០០ ម៉ាយល៍ ( ៨០៤៧ គីឡូម៉ែត្រ ) ពីផ្ទះរបស់គាត់នៅ ទីក្រុងផែមភ្លូណា ប្រទេសអេស្ប៉ាញ ដើម្បីច្រៀងក្នុងនាមជាភ្ញៀវនៃសមាជិកនៃក្រុមចម្រៀងរោងឧបោសថនៅឯវិសាលដ្ឋាននៃព្រះវិហារបរិសុទ្ធ ។
គាត់បាននៅទីក្រុងសលត៍លេក រដ្ឋយូថាហ៍ សហរដ្ឋអាមេរិកត្រឹមតែបីថ្ងៃប៉ុណ្ណោះនៅពេលដែលគាត់ធ្វើតេស្តមានកូវីដ-១៩ ហើយត្រូវនៅដាច់ដោយឡែកពីគេ ។ ឱកាសរបស់គាត់ដើម្បីច្រៀងនៅក្នុងក្រុមចម្រៀងសម្រាប់សន្និសីទទូទៅនាពេលខាងមុខហាក់ដូចជានៅសែនឆ្ងាយ ។
នៅក្នុងភាពឯកោ និងនៅដាច់ដោយឡែកក្នុងបន្ទប់សណ្ឋាគាររបស់គាត់ គាត់បានលុតជង្គង់ ហើយអធិស្ឋាន ។ គាត់សង្ឃឹមថានឹងជាសះស្បើយ ។ គាត់ប្រាថ្នាថាអាចច្រៀងបាន ។ គាត់បានរក្សាសេចក្តីជំនឿរបស់គាត់ ។
កាលពីមួយឆ្នាំមុន
នៅក្នុងពេលវេលាដ៏លំបាកនៃការបាត់បង់ នៅពេលដែលការព្យាបាលដើម្បីអាចមានកូនបានបង្ហាញថាមិនជោគជ័យ ហើយម្តាយរបស់គាត់កំពុងមានជំងឺភ្លេចភ្លាំង ស៊ីស្ទើរ អ៊ីឆារី មិនមានបំណងប្រាថ្នាដើម្បីច្រៀងដូចដែលគាត់ធ្លាប់មានពីមុនមកទេ ។ វាពិបាកពីព្រោះតន្ត្រីតែងតែជាផ្នែកមួយដ៏សំខាន់ក្នុងជីវិតរបស់គាត់ ។ គាត់បាននិយាយ « វាជាចំណង់ចំណូលចិត្តដែលខ្ញុំតែងតែមានតាំងពីក្មេងមកម្ល៉េះ » ។
បងស្រី អ៊ីឆារី ( ខាងឆ្វេង ) ជាមួយម្តាយរបស់គាត់ ម៉ារី ។
ខណៈពេលកំពុងអធិស្ឋាន គំនិតមួយបានផុសឡើងថា គាត់ត្រូវច្រៀងជាមួយមនុស្សជាច្រើនទៀត ។ មួយសប្តាហ៍ក្រោយមក គាត់ត្រូវបានទាក់ទងដោយអ្នកមានសិទ្ធអំណាចក្នុងសាសនាចក្រដែលបានសម្ភាសគាត់ ។ បងស្រី អ៊ីឆារី បាននិយាយ « គាត់បាននិយាយអំពីគម្រោងតន្ត្រីមួយដែលសាសនាចក្របានកំពុងចាប់ផ្តើម ហើយថាពួកគេកំពុងស្វែងរកអ្នកច្រៀង » ។
គាត់មិនបាននិយាយពីគោលបំណងជាក់លាក់ទេ ប៉ុន្តែបន្ទាប់ពីបទសម្ភាសលើកទីពីរ អ្នកមានសិទ្ធអំណាចបានបង្ហាញថា សាសនាចក្រចង់បានអ្នកច្រៀងជាភ្ញៀវសម្រាប់កម្មវិធីអ្នកចូលរួមជាសកលរបស់ក្រុមចម្រៀងរោងឧបោសថ ដើម្បីច្រៀងនៅក្នុងសន្និសីទទូទៅ ។
គាត់បាននិយាយថា « ហើយខ្ញុំចាប់ផ្តើមយំដោយសារតែខ្ញុំមិនដឹងថា នឹងមានអ្វីកើតឡើងនោះទេ ប៉ុន្តែខ្ញុំមានអារម្មណ៍ថាព្រះអម្ចាស់គង់នៅទីនោះ ហើយថាព្រះអម្ចាស់បានជ្រាបដឹងពីខ្ញុំ ហើយវាគឺជាអ្វីដែលខ្ញុំមិនដែលធ្លាប់រំពឹងទុកពីមុនមកនោះទេ » ។
ផ្លូវទៅកាន់សន្និសីទទូទៅ
បទសម្ភាសនេះគ្រាន់តែជារឿងបឋមប៉ុណ្ណោះ ហើយបន្ទាប់មកក៏មានបទសម្ភាសជាលើកទីពីរជាមួយអ្នកដទៃទៀត ។ បងស្រី អ៊ីឆារី ក៏ត្រូវថតខ្លួនឯងច្រៀង និងដាក់បញ្ជូនការថតជាច្រើនផងដែរ ។ បន្ទាប់មកគាត់បានមានការសម្ភាសពីចម្ងាយចុងក្រោយជាមួយ រ៉ាយអិន ម៉ហ្វី ជាអ្នកគ្រប់គ្រងតន្រ្តីសម្រាប់ក្រុមចម្រៀងរោងឧបោសថ ។ គាត់បាននិយាយថា « ខ្ញុំបានមានការភ័យខ្លាចយ៉ាងខ្លាំង » ។
នៅទីបំផុត គាត់ត្រូវបានជ្រើសរើសឲ្យច្រៀងនៅក្នុងសន្និសីទទូទៅជាមួយនឹងមនុស្ស ១៣នាក់ផ្សេងទៀតមកពីជុំវិញពិភពលោក ហើយនៅខែកញ្ញា ឆ្នាំ២០២៤ គាត់បានឡើងយន្តហោះទៅកាន់សហរដ្ឋអាមេរិក ។ បន្ទាប់ពីបានមកដល់ គាត់ត្រូវបានគេធ្វើរោគវិនិច្ឆ័យថាមានជំងឺកូវីដ-១៩ ហើយនោះជាពេលដែលគាត់ត្រូវដាក់នៅដាច់ដោយឡែកពីគេចាប់ផ្តើម ។
ភាពឯកោនៅឆ្ងាយពីផ្ទះបានបង្រៀនមេរៀនដ៏ស៊ីជម្រៅមួយ ៖ ព្រះអង្គសង្គ្រោះនឹងផ្តល់ការលួងលោមក្នុងពេលដ៏ឯកោបំផុតរបស់គាត់ ( សូមមើល យ៉ូហាន ១៤:២៦–២៧ ) ។ គាត់បាននិយាយ « ខ្ញុំគិតថាខ្ញុំនឹងមិនអាចធ្វើវាបានទេ » ។ « ខ្ញុំបានបាក់ទឹកចិត្តជាខ្លាំង ប៉ុន្តែខ្ញុំមានជំនឿ ។ ក្នុងពេលជាមួយគ្នានោះ ខ្ញុំមានអារម្មណ៍មិនល្អទាល់តែសោះ ។ ឥឡូវនេះគោលបំណងចម្បងមួយរបស់ខ្ញុំគឺ ដើម្បីស្វែងរកអ្នកដែលអាចមានអារម្មណ៍ឯកោ ហើយព្យាយាមជួយឲ្យពួកគេបានធូរស្បើយ » ។
បន្ទាប់ពីប្រាំបីថ្ងៃនៃការនៅដាច់ដោយឡែកមក សុខភាព និងសំឡេងរបស់គាត់បានប្រសើរឡើងវិញ ហើយគាត់បានហាត់ច្រៀងជាមួយក្រុមចម្រៀង ។ គាត់អាចច្រៀងជាមួយមនុស្សរាប់រយនាក់នៅលើវេទិកានៅក្នុងមជ្ឈមណ្ឌលសន្និសីទ ហើយបានច្រៀងនៅឯសន្និសីទទូទៅខែតុលា ឆ្នាំ២០២៤ ។
គាត់បាននិយាយ « ព្រះមានព្រះជន្មរស់ ។ ទ្រង់ជ្រាបដឹងពីយើងម្នាក់ៗ » ។ « តន្ត្រីគឺជាការព្យាបាល មានអំណាចក្នុងការព្យាបាល ហើយយើងត្រូវបំពេញជីវិតរបស់យើងជាមួយនឹងតន្ត្រី ។ វាមានសារៈសំខាន់ខ្លាំងណាស់ ។ ខ្ញុំមានអារម្មណ៍ថានោះគឺជាអ្វីដែលព្រះអម្ចាស់កំពុងព្យាយាមប្រាប់ខ្ញុំ ៖ ចូរបំពេញជីវិតរបស់អ្នកជាមួយនឹងតន្ត្រី » ។