“Inona avy ireo fahamarinana ampianarin’ilay Fanambarana momba ny Famerenana amin’ny laoniny?,” Liahona, jan. 2025.

Avia, hanaraka Ahy

Ny Famerenana amin’ny Laoniny

Inona avy ireo fahamarinana ampianarin’ny Fanambarana momba ny Famerenana amin’ny laoniny?

Joseph Smith mandohalika ao anaty alakely

Nandritra ny fihaonamben’ny Fiangonana maneran-tany tamin’ny aprily 2020, ny Filoha Russell M. Nelson dia namaky ny “Ny Famerenana amin’ny laoniny ny fahafenoan’ny filazantsaran’i Jesoa Kristy: Fanambarana ho an’izao tontolo izao nandritra ny fankalazana ny faha-roanjato taona.” Nilaza izy tamin’izay hoe: “Halalino manokana sy miaraka amin’ny fianakavianareo sy namanareo izany. Saintsaino ireo fahamarinana ary eritrereto ny fiantraikan’ireo fahamarinana ireo eo amin’ny fiainanareo raha toa ka handre, sy hihaino azy ireny ianareo, ary hanaraka ireo didy sy fanekempihavanana izay miaraka amin’izy ireny.”

Ity tabilao manaraka ity dia hanampy anao hanaraka ny torohevitry ny mpaminany mba handalina ilay fanambarana. Rehefa manao izany ianao dia hevero ny tsy hanamarika fotsiny ireo zava-nitranga ara-tantaran’ny Famerenana amin’ny laoniny fa ny tanan’ny Tompo nitarika ireo zava-nitranga ireo ihany koa. (Ny lahatsoratr’ilay fanambarana dia hita ao amin’ny Médiathèque de l’Évangile na any amin’ny fiafaran’ny lesona Avia, hanaraka Ahy voalohany amin’ity taona ity.)

Andalan-tsoratra	Halalino: Inona avy ireo fahamarinana hitanao?	Saintsaino: Inona no ampianarin’ireo fahamarinana ireo anao?	Araho: Ahoana no ahafahanao mampihatra ireo fitsipika ireo eo amin’ny fiainanao?	Zarao : Ahoana no ahafahanao mizara ireo fahamarinana ireo amin’ny fianakavianao sy ny namanao?
1
2
3
4
5
6
7
8
9

Nahoana no misy fanambarana?

Fantatrao ve fa fanambarana enina monja no navoakan’ Ny Fiangonan’i Jesoa Kristy ho an’ny Olomasin’ny Andro Farany? Navoaka teo anelanelan’ny taona 1841 sy 1865 ireo telo voalohany. Navoaka hatramin’ny 1980 ireo fanambarana telo farany:

“Fanambarana avy amin’ny Fiadidiana Voalohany sy ny Kôlejin’ny Apôstôly Roambinifololahy an’ ny Fiangonan’i Jesoa Kristy ho an’ny Olomasin’ny Andro Farany” (1980), izay nankatoavan’ny Filoha Spencer W. Kimball (1895–1985) ary novakian’ny Loholona Gordon B. Hinckley tamin’izany tamin’ny faha-150 taonan’ny fanorenana ny Fiangonana.
“Ny Fianakaviana: Fanambarana ho an’izao tontolo izao” (1995), novakian’ny Filoha Gordon B. Hinckley tamin’ny Fivorian’ny Fikambanana Ifanampiana Maneran-tany mba hizarana ny fanambarana ôfisialin’ny Fiangonana momba ny fotopampianaran’ny fianakaviana.
“Ny Famerenana amin’ny laoniny ny fahafenoan’ny Filazantsaran’i Jesoa Kristy: Fanambarana ho an’izao tontolo izao nandritra ny fankalazana ny faha-roanjato taona” (2020), novakian’ny Filoha Russell M. Nelson nandritra ny fihaonamben’ny Fiangonana maneran-tany aprily 2020—200 taona taorian’ny Fahitana Voalohany. Nanamafy izany fa mpaminanin’ Andriamanitra i Joseph Smith ary Ny Fiangonan’i Jesoa Kristy ho an’ny Olomasin’ny Andro Farany dia fiangonan’i Jesoa Kristy naverina tamin’ny laoniny.

Ny fanambarana dia natao ho an’ny olona rehetra manerana izao tontolo izao. Izy ireo dia “manana toetra manan-kaja sy masina ary … navoaka miaraka amin’ny faniriana hamoaka, hanorina, ary handrindra ny raharahan’ny Fiangonana amin’ny maha-fanjakan’ Andriamanitra eto an-tany azy.” Ny fanambarana dia vavolombelona mahalana sy mahery vaika fa isika dia manana mpaminany velona izay mitarika ny Fiangonana sy izao tontolo izao ankehitriny.