Ang Gipahiuli nga Simbahan ni Jesukristo

Ang pagtuon sa Dali, Sunod Kanako karong tuiga sa Doktrina ug mga Pakigsaad mohatag og importansiya kon giunsa sa Ginoo pagpahiuli ang Iyang Simbahan ug ang ebanghelyo pinaagi sa mga propeta sa ulahing mga adlaw. Daghang mga artikulo sa isyu niining bulana ang magpakita og importansiya sa mga panalangin sa Pagpahiuli.

Pagkat-on gikan Niini nga Isyu

Moapil sa Pagpundok

Sa pahina 2, si Presidente Russell M. Nelson mipakigbahin og mga paagi nga kita makapundok ngadto sa Manluluwas, makapundok uban sa mga Santos, ug makapundok sa pagserbisyo sa Dios. Ikonsiderar ang paghimo og tumong karong bulana nga makatampo sa usa nianang tulo ka matang sa panagpundok.

Moserbisyo sa Gipahiuli nga Simbahan

Si Elder Patrick Kearon sa Korum sa Napulog Duha ka Apostoles namulong mahitungod sa mga oportunidad nga anaa kanato sa gipahiuli nga Simbahan ni Jesukristo sa “pag-alagad sa uban nga adunay gugma” (tan-awa sa pahina 8). Aduna bay mga tawo sa inyong ward o branch nga nagkalisod? Mahimo kang mag-ampo alang niining mga tawhana ug mangayo og inspirasyon kon unsaon sa pagserbisyo kanila.

Magkat-on Gikan sa Pamahayag sa Pagpahiuli

Niadtong 2020, ang Unang Kapangulohan ug ang Korum sa Napulog Duha ka Apostoles mimantala sa “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan” (tan-awa sa pahina 40). Samtang inyong rebyohon ang proklamasyon sa Pagpahiuli, mahimo ninyong ikonsiderar kini nga mga pangutana: Unsa ang mahinungdanong mga panghitabo ang gihisgotan niini, ug giunsa sa Ginoo paggiya niadtong mga panghitabo?

Dali, Sunod Kanako nga Kalingawan sa Pamilya

Doktrina ug mga Pakigsaad 1:30

Diha niini nga bersikulo, ang Ginoo naghisgot sa Iyang Simbahan isip “mao lamang ang tinuod ug buhi nga simbahan diha sa ibabaw sa tibuok yuta.” Ang mosunod nga mga ideya sa pagtudlo makatabang sa inyong mga anak aron makasabot kon unsa ang kahulogan sa “tinuod” ug “buhi”:

Sa Hunyo 2024 nga Liahona, si Elder J. Devn Cornish, usa ka emeritus General Authority Seventy, nagtubag sa pangutana nga “Unsay Gipasabot Nato kon Mosulti Kita nga ang Simbahan Tinuod?” Mahimo ninyong ipakigbahin sa inyong mga anak ang ubang importante nga mga punto gikan niana nga artikulo. Unsa ang inyong espirituwal nga mga kasinatian nga nakatabang ninyo aron masayod nga tinuod ang Simbahan—nga kini gipangulohan ni Jesukristo, nga kini adunay katungod sa pagkapari, nga kini gipangulohan sa mga propeta, nga kini nagpakigbahin sa ebanghelyo ni Jesukristo?
Kon mahimo, hangyoa ang inyong mga anak sa pagtabang kaninyo sa pagkuha og usa ka dahon o gamay nga sanga gikan sa usa ka kahoy o mga tanom sa duol. Hisgoti kon unsa ang mahitabo niini karon nga wala na kini magtapot sa kahoy. Nganong mamatay man ang maong dahon o sanga? Basaha sa Juan 15:4, diin ang Manluluwas nagkompara sa Iyang Kaugalingon ngadto sa usa ka punoan ug sa Iyang mga sumusunod ngadto sa mga sanga. Sa unsa pang paagi nga ang Simbahan ni Jesukristo makonsiderar nga buhing simbahan?