“Kampo sa Ulanon nga Adlaw,” Higala, Enero 2025, 16–17.
Kampo sa Ulanon nga Adlaw
Nganong wala man tubaga sa Langitnong Amahan ang iyang mga pag-ampo?
Usa ka tinuod nga istorya gikan sa USA.
“Ugma ang akong dula, di ba?” Si Lucy nangutana samtang gihabolan siya ni Mama diha sa higdaanan.
Mitando si Mama. “Oo! Ugma sa gabii sa alas 6:00.”
Si Lucy hapit dili na makapaabot. Mga semana na nga nagpaabot siya sa unang dula sa softball sa iyang team. Ug karong tuiga pink ang ilang mga jersey! Mahinamon kaayo siya nga lisod na nga makatulog.
Apan pagkasunod buntag, mitambo si Lucy sa gawas sa bentana ug nagmug-ot. Matilimad-on nga mga panganod ang naglutaw-lutaw sa kalangitan, ug adunay mga lam-aw bisan asa. Nag-ulan kadto tibuok gabii.
Miluhod siya aron sa pagsulti sa iyang pag-ampo sa buntag. “Minahal nga Langitnong Amahan, palihog tabangi nga ang panahon mamahimong maayo alang sa akong dula sa softball karong gabii.”
Tibuok adlaw sa eskwelahan, si Lucy naghunahuna mahitungod sa dula. Gihunahuna niya ang iyang kaugalingon nga nagsul-ob sa iyang bag-ong pink nga jersey, nga nagkab-ot aron makahimo og usa ka mananaog nga pagsalo. Apan sa gawas, nag-ulan-ulan ug basa pa gihapon.
Misulti si Lucy og mubo nga pag-ampo sa iyang hunahuna. Langitnong Amahan, palihog tabangi ang adlaw nga mogawas sa dili madugay aron makadula kami karong gabhiona.
Sa dihang mibagting ang kampana sa eskwelahan, gikuha ni Lucy ang iyang backpack ug midagan sa gawas. Makita niya ang adlaw nga nagsugod sa pagsidlak gikan sa luyo sa mga panganod!
Apan sa dihang miabot si Mama aron kuhaon siya, duna siyay dili maayong balita. “Gikanselar ang dula karong gabhiona,” miingon siya. “Gikasubo ko.”
Gitan-aw ni Lucy ang kalangitan. “Pero, mogawasay na ang adlaw. Tingali mohunong ang ulan.”
“Kahibalo ko,” miingon si Mama. “Apan gibaha ang softball field gikan sa tanang tubig. Busa bisan kon mohunong ang ulan, basa ug lapok kaayo kini aron madulaan. Gi-eskedyul nila og usab ang dula ngadto sa laing panahon.”
Init-init nga mga luha ang naporma diha sa mga mata ni Lucy. Nasagmuyo gayod siya og maayo! Gusto gayod siyang modula karong gabhiona. Nganong wala man tubaga sa Langitnong Amahan ang iyang mga pag-ampo?
Sa panimalay, si Lucy mibati nga masulub-on ug sapoton sama sa mga panganod sa ulan. Wala siya ganahi sa pagbasa sa iyang paborito nga libro. Ug bisan og si Mama naghimo sa iyang paborito nga pasta alang sa panihapon, dili kini ingon niana ka lami.
Pagkahuman sa panihapon, ang labing gamay nga igsoong babaye ni Lucy, si Ellie, mikamang paingon sa iyang paa. “Makigdula ba ikaw kanako?” nangutana siya.
Nanghupaw si Lucy. “Sige,” siya miingon. Dayon nakaideya siya. “Nagkinahanglan kita og makalingaw nga butang nga buhaton.”
Gikuha niya ang usa ka silhig ug gihigot ang usa ka panyo sa tumoy niini aron mahimo nga usa ka bandila. Dayon gipundok niya ang tanan niyang igsoong mga babaye. Gipataas niya ang bandila ug miingon, “Welcome sa Kampo sa Ulanon nga Adlaw! Kini mao ang dapit kon asa kamo moadto aron maglingaw-lingaw kon dili kamo makadula sa gawas.”
Miabiba ang iyang mga igsoong babaye.
“Una,” miingon si Lucy, “kantahon nato ang atong awit sa kampo.”
Ang mga batang babaye miagik-ik samtang naghimo sila og usa ka makalingaw nga awit ug sa mga pulong nga mobagay niini. Dayon nagmartsa sila libot sa lawak dala ang ilang bandila, nga nag-awit sa makusog kutob sa ilang mahimo.
“Karon gikinahanglan natong pabarogon ang atong tolda!” Gitabangan ni Lucy ang iyang mga igsoong babaye nga mangolekta og mga habol ug mga unlan aron makahimo og usa ka kuta. Natumba kini sa pipila ka higayon. Apan sa dihang giayo nila kini, silang tanan nagtapok sulod sa kuta aron magdula.
Sa wala madugay oras na aron matulog. “Nanghinaot ko nga mag-ulan og usab ugma,” miingon si Liza, ang igsoong babaye ni Lucy. “Gusto kong magdula og Kampo sa Ulanon nga Adlaw pag-usab!”
“Salamat sa pagpakigdula sa imong mga igsoon nga babaye,” miingon si Mama samtang gigakos niya si Lucy aron matulog na. “Naghimo ka og maayo nga mga butang bisan pa man sa dili maayo nga kahimtang. Mapasigarbohon ako kanimo.”
Mibati nga malipayon si Lucy samtang mihigda siya. Ang iyang mga pag-ampo wala matubag sa paagi nga iyang gusto. Apan ang Langitnong Amahan nakatabang gihapon kaniya sa pagpangita og usa ka butang nga makalingaw nga buhaton uban sa iyang pamilya—ug kana sama ka makalingaw sa pagsul-ob og pink sa iyang unang dula sa softball.
Mga Paghulagway pinaagi ni Apryl Stott