“Ang Nawala nga Anteyohos,” Higala, Enero 2025, 44–45.

Ang Nawala nga Anteyohos

Ni Carolina Maldonado

Usa ka tinuod nga istorya gikan sa Bolivia.

Mao kadto ang unang adlaw sa eskwelahan. Mahinamon kaayo si Andrés! Anaa na siya sa unang grado karon. Dako na siya nga bata!

Mama ug batang lalaki naglakaw paingon sa eskwelahan

Apan sa dihang miabot siya sa eskwelahan, kini daw dako kaayo ug makahadlok, bisan alang sa usa ka dako nga bata. Gikuptan niya og maayo ang kamot ni Mami.

“Ma-OK ra ang tanan.” Mipahiyom si Mami. “Kumustaha ang imong magtutudlo. Pagbinuotan ngadto sa imong mga kauban sa klase. Ug ayaw kalimot nga ampingan ang imong mga anteyohos.”

Nagpahiyom nga batang lalaki nga nagsul-ob og anteyohos

Usa ka semana ang milabay, si Andrés nakadawat sa iyang unang pares sa anteyohos. Kanunay siyang gipahinumdoman sa iyang mga ginikanan sa pag-amping niini.

Si Mami miwara-wara aron sa pagpanamilit. “Ayo-ayo!”

Apan, wala nahimong nindot ang adlaw ni Andrés. Usa ka dili maayo nga butang ang nahitabo!

Midagan siya ngadto ni Mami human sa eskwela. “Nawala nako ang akong anteyohos!” mihilak siya. “Gipangita nako sa tanang dapit, apan wala nako kini makit-i!”

“Hala!” Makita nga nabalaka si Mami. “Mangayo kita og tabang sa Langitnong Amahan.”

“Mahimong epektibo kaha na?” nangutana siya.

“Sulayan nato kini ug tan-awon kon epektibo ba. Ang Langitnong Amahan kanunay nga maminaw sa atong mga pag-ampo,” miingon si Mami.

Nag-ampo si Andrés ug si Mami. Mihangyo sila sa Langitnong Amahan nga tabangan si Andrés sa pagpangita sa iyang anteyohos.

Pagkasunod adlaw sa eskwelahan, magul-anon gihapon si Andrés. Dayon usa ka batang lalaki ang miduol kaniya.

Usa ka batang lalaki nga miuli sa anteyohos ngadto sa tag-iya niini

“Tan-aw nako imoha kini.” Gipagawas sa batang lalaki ang usa ka paresan sa anteyohos. “Nakit-an nako kini sa football field.”

Gikuha ni Andrés ang anteyohos. Iyaha kini! Dili siya makatuo niini.

Batang lalaki nga nagsul-ob og anteyohos diha sa nataran sa eskwelahan

Human sa klase, midagan siya paingon ngadto ni Mami ug gigakos siya og maayo.

“Nakit-an nimo ang imong anteyohos!” miingon siya. “Tingali malipayon kaayo ka nga anaa na nimo kini.”

“Oo!” Miingon si Andrés. “Apan mas malipayon ko tungod sa unsay akong nakat-onan.”

“Ug unsa man kana?”

Mipahiyom og maayo si Andrés. “Epektibo gayod ang pag-ampo!”