Moadto sa Simbahan uban ni Ghuka

Ni Kelvin Njenga Mungai

Si Kelvin wala pa gayod makakita og simbahan nga sama niini sukad.

Usa ka tinuod nga istorya gikan sa Kenya.

Mainampingon nga gibutang ni Kelvin ang sinaw nga bildong botelya sa gatas diha sa estante. Bag-ohay lang siya mibalhin aron magpuyo uban sa iyang mga apohan sa usa ka baryo sa gawas sa siyudad. Nanag-iya sila og usa ka tindahan sa gatas, ug si Kelvin ganahan nga motabang.

“Karong gabhiona moadto kami sa usa ka kalihokan sa among simbahan,” miingon si Ghuka (Lolo). “Ganahan ka ba nga mokuyog namo? Makalingaw gyod kini.”

Ganahan si Kelvin nga maglingaw-lingaw. “Oo!” miingon siya. “Mokuyog ko ninyo.”

Human sila nanira sa tindahan, si Kelvin ug ang iyang mga apohan nanlakaw padulong sa kalihokan. Miagi sila sa ubang mga tindahan nga namaligya og mga panapton, prutas, ug gikaang nga mga tanom. Wala madugay, miabot sila sa simbahan.

Batang lalaki ug iyang apohan nga anaa sa gawas sa bilding sa simbahan

Si Kelvin nagtindog nga nagsiga ang mata sa pagkakita sa maanindot nga bilding. Wala pa gayod siya makakita og simbahan nga sama niini sukad. Kadaghanan sa mga simbahan adunay krus sa ibabaw, apan kini wala.

Sa sulod, ang apohan ni Kelvin mipaila-ila kaniya ngadto sa daghang buotan nga mga tawo. Nangaon sila og lamian nga pagkaon ug nagdula-dula.

Apan nakuryoso si Kelvin. Mao nga milibot siya sa mga hawanan sa simbahan. Nakakita siya og mga hulagway ni Jesukristo nga gi-painting. Dayon misulod siya sa usa ka lawak klasehanan ug nakamatikod sa pipila ka mga litrato diha sa bongbong.

Kinsa man kadtong mga tawhana? Naghunahuna si Kelvin.

Human siya mibiya sa kwarto, iyang nakita ang duha ka batan-ong lalaki sa hawanan. Nagsul-ob sila og puti nga polo ug nagkorbata. “Kumusta,” usa kanila miingon. “Mga misyonaryo kami. Unsay imong ngalan?”

Mipaila-ila si Kelvin sa iyang kaugalingon. Dayon nangutana siya, “Kinsa man ang tawo niana nga litrato?” Mitudlo siya ngadto sa usa ka litrato diha sa kwarto.

“Mao kana ang propeta,” miingon ang laing misyonaryo. “Nakahibalo ka ba kon unsa ang propeta?”

Mipahiyom si Kelvin ug milingo-lingo sa iyang ulo, wala.

“Ang propeta usa ka mensahero gikan sa Dios,” miingon ang misyonaryo. Nagtudlo siya kanato kon unsa ang gusto sa Dios nga atong mahibaloan.”

Sa dihang si Kelvin mipauli uban sa iyang mga apohan nianang gabhiona, nagkupot siya og kopya sa Basahon ni Mormon nga gihatag sa mga misyonaryo ngadto kaniya. Mahinamon siya nga makat-on pa og dugang mahitungod sa mga propeta ug niining bag-ong simbahan.

“Pwede ba nimo kining basahon ngari kanamo?” Nangutana si Ghuka sa dihang nakauli na sila. Ang mga apohan ni Kelvin dili makamao mobasa.

Batang lalaki nagbasa sa Basahon ni Mormon ngadto sa iyang mga apohan

“Oo!” Miingon si Kelvin. Giablihan niya ang Basahon ni Mormon ug gibasa og kusog. Wala siya makasabot sa tanan nga mga pulong, apan nakabati siya og espesyal nga pagbati.

Pagka-Dominggo, naglakaw si Kelvin kauban ang iyang mga apohan balik sa simbahan. Miadto siya sa usa ka klase alang sa tanang mga bata. Gitawag kini og Primary. Daghan kaayo siya og nahigala! Nakakat-on siya og daghan pa mahitungod sa mga propeta ug ni Jesus.

Ang mga misyonaryo miabot aron sa pagtudlo ni Kelvin og dugang pa. Usa ka adlaw sila nangutana kaniya. “Sundon ba nimo ang ehemplo sa Manluluwas ug magpabunyag?”

Mipahiyom og dako si Kelvin. “Oo!”

Sa adlaw sa iyang bunyag, si Kelvin miubog ngadto sa tubig. Tugnaw kadto. Apan samtang si Kelvin mitan-aw sa iyang palibot, nakita niya ang iyang mga apohan, ang mga misyonaryo, ug ang tanan niyang bag-ong mga higala gikan sa simbahan. Gibati niya nga gimahal kaayo siya!

Pinaagi sa pagpili sa pagsunod ni Jesukristo, si Kelvin usa ka pioneer sa iyang pamilya. Mahinamon kaayo siya sa pagpadayon sa pagsunod Kaniya—ug sa pagtabang sa uban nga mosunod usab Kaniya!