Dali, Sunod Kanako nga mga Kalihokan

Aron mapahiuli ang usa ka butang nagpasabot kini sa pagbutang niini og balik sa orihinal nga kahimtang. Basaha “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan” diha sa Librarya sa Ebanghelyo aron makakat-on pa og dugang mahitungod kon giunsa pagpahiuli ang Simbahan. Dayon pagdula og usa ka dula sa pagpahiuli! Pangita o pagdrowing og usa ka hulagway ug guntinga kini ngadto sa mga piraso sa puzzle. Makigbinayloay og mga puzzle ngadto sa usa ka sakop sa pamilya ug iuli sa saktong porma ang mga hulagway sa puzzle ngadto usag usa. Nganong importante man nga ipahiuli ni Joseph Smith ang ebanghelyo ni Jesukristo?

Ang Langitnong Amahan makig-istorya kanato pinaagi sa Iyang mga propeta (tan-awa sa Doktrina ug mga Pakigsaad 1:38). Kinahanglan lang kita nga maminaw! Pagpraktis sa pagpaminaw pinaagi sa pagdula og usa ka dula. Usa ka tawo ang magpatukar og musika, ug ang tanan manayaw samtang ang musika nagtukar. Kon ang musika mohunong, ang tanan dili molihok. Bisan kinsa nga maulahing mohunong sa paglihok maoy mopakigbahin og usa ka rason nga iyang gihigugma ang mga propeta. Balik-balika hangtod ang matag bata makabaton og kahigayonan sa pagpakigbahin!

Ang Langitnong Amahan ug si Jesukristo nagpakita ngadto ni Joseph Smith (tan-awa sa Joseph Smith—Kasaysayan 1:15–20). Gitawag nato kini nga hitabo nga Unang Panan-awon. Paklia ngadto sa pahina 13 sa paghimo sa inyong kaugalingon nga Unang Panan-awon nga diorama, ug dayon gamita kini sa pagsulti ngadto sa laing tawo sa istorya.

Kon kita makakat-on og dugang mahitungod sa atong mga katigulangan, kita mobati nga mas suod ngadto kanila ug ngadto sa Langitnong Amahan (tan-awa sa Doktrina ug mga Pakigsaad 2). Hangyoa ang usa ka sakop sa pamilya sa pagsulti nimo og usa ka istorya gikan sa iyang kinabuhi o gikan sa kinabuhi sa usa sa imong mga katigulangan. Pagkahuman paghimo pag-usab sa istorya ingon sa usa ka dula o drowing!