Sama Lang ni Joseph

Si Lhensay mipauntol diha sa iyang gilingkoran tupad sa iyang mama samtang ang ilang jeepney nga gisakyan nagmaneho paingon sa lungsod. Ang Dominggo mao ang paborito nga adlaw ni Lhensay sa semana! Ganahan siya nga mosulod sa Primary ug magkat-on mahitungod ni Jesukristo.

Mihunong ang jeepney ngadto sa ilang hunonganan. Gigunitan ni Mama ang kamot ni Lhensay samtang sila naglakaw padulong sa simbahan.

Human sa miting sa sakramento, si Lhensay misulod sa Primary uban sa iyang higala nga si Maria. Diha sa pisara adunay hulagway sa usa ka batan-ong lalaki nga nag-ampo sa kakahoyan.

“Maayong Buntag!” Ang ilang magtutudlo, si Sister Cruz, mitudlo sa hulagway. “Aduna bay nakaila kon kinsa kini siya?”

“Mao kana si Joseph Smith!” Miingon si Lhensay.

Mipahiyom si Sister Cruz. “Oo, husto kana. Ug unsa man ang gibuhat ni Joseph Smith?”

Mitan-aw si Lhensay og balik sa hulagway. Nasayod siya nga si Joseph Smith usa ka propeta, apan wala kaayo siya’y laing nahibaloan.

“Siya ang unang propeta sa atong simbahan,” miingon si Maria.

“Husto na usab!” miingon si Sister Cruz. “Sa dihang si Joseph batan-on pa, wala siya nakahibalo kon hain nga simbahan ang apilan. Miadto siya sa kakahoyan ug nag-ampo ngadto sa Dios aron masayod hain niini ang tinuod. Nangayo usab siya og kapasayloan sa iyang mga sala. Samtang nag-ampo siya, usa ka hayag kaayo ang mipakita. Nakahibalo ba kamo kon kinsa ang anaa sa kahayag?”

Si Lhensay ug ang tanan sa iyang klase naghulat.

Si Sister Cruz nagbutang og laing hulagway diha sa pisara. Kini nagpakita og duha ka binuhat nga nagbarog ibabaw ni Joseph Smith sa kahanginan. Nagsul-ob sila og puti nga mga kupo ug hayag kaayo nga misanag.

“Ang Langitnong Amahan ug si Jesukristo mipakita sa ilang mga kaugalingon ngadto ni Joseph,” Miingon si Sister Cruz. “Sila misulti kaniya nga siya ang mopahiuli sa Simbahan ni Jesus. Gitawag nato kini nga ang Unang Panan-awon.”

Giisa ni Lhensay ang iyang kamot, nga masanagon ang mga mata. “Tinuod ba kini?” nangutana siya.

Mitando si Sister Cruz. “Oo, tinuod kini!”

Ang kasingkasing ni Lhensay mibati og kainit. Nahibalo siya nga ang gisulti ni Sister Cruz tinuod.

Nianang gabhiona, si Lhensay nagsige og hunahuna mahitungod ni Joseph Smith. “Ma, unsaon man nako pagkakita sa Langitnong Amahan ug ni Jesus, sama ni Joseph Smith?” nangutana siya.

Gigakos ni Mama si Lhensay. “Kadaghanan nato dili makakita sa Langitnong Amahan ug ni Jesus sama ni Joseph Smith. Apan Sila makigsulti ngari kanato pinaagi sa mga hunahuna ug sa mga pagbati gikan sa Espiritu Santo. Dayon makahibalo ka nga Sila kanunayng magauban kanimo.”

Gihunahuna ni Lhensay ang init nga gibati sa iyang kasingkasing sa dihang gisultihan sila ni Sister Cruz mahitungod sa Unang Panan-awon. Mao kadto ang Espiritu Santo, nagpadala kaniya og mensahe gikan sa Langitnong Amahan ug ni Jesukristo! Siya mipahiyom, ug migakos og balik ni Mama. Sila nakigsulti kaniya, sama nga sila nakigsulti ni Joseph Smith!

Ablihan ang PDF

Mga paghulagway ni Shawna J. C. Tenney