“Mga Kasulatan sa Swahili,” Higala, Enero 2025, 36–37.
Mga Kasulatan sa Swahili
Maayo unta og ako adunay mabuhat sa pagtabang, naghunahuna si Jared.
Usa ka tinuod nga istorya gikan sa Australia.
Misulod sa Sunday School si Jared ug milingkod tupad sa iyang mga kauban sa klase. Namatikdan niya ang usa ka batang lalaki nga wala niya mailhi nga misulod ug milingkod sa pipila ka lingkoranan ang gilay-on.
Ang magtutudlo ni Jared, si Brother Trudgen, mipahiyom sa klase. “Kini si Emmanuel,” miingon siya. “Siya ug ang iyang pamilya bag-ohay lang mibalhin sa Australia. Kini mao ang ilang unang Dominggo sa atong ward!”
Naghunahuna si Jared nga tingali lisod nga moadto sa usa ka bag-o nga ward. Paningkamotan niya nga mahimong higala ni Emmanuel.
Gipagawas ni Brother Trudgen ang iyang mga kasulatan. “Mopakli kitang tanan ngadto sa 3 Nephi,” miingon siya.
Giablihan ni Jared ang iyang kasulatan ug mitan-aw kang Emmanuel. Wala siyay bisan unsa nga mga kasulatan.
Si Jared mipahiyom kaniya og dako ug miakbo. “Hi, ako si Jared,” miingon siya. “Gusto ka bang makigsalo og mga kasulatan kanako?”
Mibalos og pahiyom si Emmanuel. “Ah, dili kaayo ko kahibalo og Iningles,” miingon siya. “Pasaylo.”
“Unsa nga pinulongan ang imong gisulti?”
“Swahili.”
Walay nahibaloan nga bisan unsa nga Swahili si Jared. Siya ug si Emmanuel wala kaayo nag-istoryahanay sa tibuok klase.
Nianang gabhiona sa panihapon, gisultihan ni Jared ang iyang pamilya mahitungod kang Emmanuel.
“Murag buotan kaayo siya,” miingon si Jared. “Apan dili kaayo kami magkasinabtanay sa usag usa.”
Miyango si Mama. “Si Emmanuel ug ang iyang pamilya nakasinati og daghang lisod nga mga pagsulay karon,” miingon siya. “Gikinahanglan nila nga kalit-kalit nga mobiya sa ilang nasod tungod dili maayo nga mga butang ang nagahitabo didto. Gibiyaan nila ang tanan.”
Nagmagul-anon ang nawong ni Jared. Sama sa unsa kaha nga mobiya sa panimalay ugma ug mobalhin ngadto sa bag-o gayod nga nasod? Lisod gayod kaayo kana!
Maayo unta og ako adunay butang nga mabuhat sa pagtabang ni Emmanuel, naghunahuna siya. Apan unsa man?
Dili makahunong si Jared sa paghunahuna kang Emmanuel samtang nangandam siya nga matulog. Milingkod siya atubangan sa iyang lamesa dala ang iyang Basahon ni Mormon ug mibasa og pipila ka bersikulo. Ang pagbasa sa mga kasulatan kanunay nga makapaarang-arang sa iyang gibati. Karong gabhiona, gipahinumdoman usab siya niini nga si Emmanuel walay bisan unsa nga mga kasulatan nga mabasa. Gisira ni Jared ang iyang mga kasulatan ug gitutokan ang hapin. Dayon dali siyang mibarog gikan sa iyang lingkoranan ug nagdali og gawas paingon sa pasilyo.
“Ma!” nanawag siya. “Mura og nakahibalo ko kon unsaon pagtabang si Emmanuel!”
Pagkasunod Dominggo, dili makahulat si Jared nga makakita ni Emmanuel. Milingkod siya kuyog sa ubang mga deacon diha sa atubangan sa chapel ug naghulat dala ang usa ka bag-ong Basahon ni Mormon nga anaa diha sa iyang sabakan. Ang mga misyonaryo mitabang kaniya nga makakuha niining espesyal nga kopya alang lamang kang Emmanuel.
Sa diha nga si Emmanuel misulod sa chapel uban sa iyang pamilya, si Jared mipahiyom ug nangamay kaniya. Ingon og naglibog si Emmanuel samtang milingkod siya tupad kang Jared. Apan midako ang iyang mga mata samtang gitunol ni Jared ang Basahon ni Mormon ngadto kaniya.
“Para nako?” Nangutana si Emmanuel.
Mitando si Jared.
Misanag ang mga mata ni Emmanuel. Gipakli niya ang mga pahina sa iyang bag-o nga Basahon ni Mormon. “Swahili!” miingon siya. Mipahiyom siya kang Jared ug gigakos ang basahon diha sa iyang dughan. “Salamat!”
Ang kasingkasing ni Jared mibati og kainit samtang mibalos siya og pahiyom. Nasayod siya nga dili siya makahimo sa tanan nga mga butang nga mahimong mas maayo alang kang Emmanuel, ug dili pa usab kaayo sila magkaistoryahanay sa usag-usa. Apan OK ra kana. Dili nila kinahanglan nga mosulti sa samang pinulongan aron mahimong manag-higala!
Paghulagway pinaagi ni Keith Negley