Suko ra Kaayo aron Mag-ampo

“Walay nakasabot nako!” Misinggit si Gabriela samtang gilamba niya ang pultahan sa iyang kuwarto. Karon usa ka lisod nga adlaw. Dunay usa ka tawo sa eskwelahan nga nagbugal-bugal kaniya. Ug sa dihang miabot si Gabriela sa balay, gisapot siya ug nakaaway si Mutti (Mama).

Mihapla si Gabriela sa iyang higdaanan ug misugod sa paghilak. Ang mga luha midagayday sa iyang mga aping, ug mibati og kahuot ang iyang dughan tungod sa kasuko. Dili siya ganahan nga mobati og sama niini.

Nakahinumdom siya nga nagkat-on sa Primary nga mahimo siyang mag-ampo sa Langitnong Amahan bisan kanus-a nga nagkinahanglan siya og tabang. Gusto siyang mag-ampo aron matabangan siya nga moarang-arang ang pamati, apan nasagmuyo gayod siya pag-ayo aron sa pag-focus. Gipiyong niya ang iyang mga mata ug mihimo og pipila ka lawom nga pagginhawa. Unsa man ang iyang buhaton aron mokalma?

Human sa pipila ka segundo, usa ka hunahuna ang misantop sa iyang isipan.

Hunahunaa ang mga butang nga ikaw mapasalamaton.

Giablihan niya ang iyang mga mata ug mitan-aw sa palibot sa iyang lawak. Adunay usa ka litrato nila ni Mutti ug Vati (Papa) diha sa bungbong. Gihigugma ni Gabriela ang iyang pamilya, bisan kon siya nasagmuyo kanila.

“Mapasalamaton ko alang sa akong mga ginikanan,” miingon siya.

Dayon naghunahuna siya mahitungod sa iyang mga ig-agaw nga sila si Gwendolyn, Lydia, ug Thomas. Kanunay nilang gipakigbahin ang ilang mga dulaan ngadto kaniya ug mipakatawa kaniya. Ganahan siya nga makigdula kanila.

“Mapasalamaton ko alang sa akong mga ig-agaw,” miingon si Gabriela.

Dayon mitambo siya sa iyang bentana.

Ang adlaw misalop na, ug ang langit napuno sa maanindot nga mga kolor—kahil, pula, dalag, ug rosas.

“Mapasalamaton ko alang sa mga pagsalop sa adlaw” miingon si Gabriela.

Ug dayon naghunahuna siya og dugang pa nga mga butang. Mapasalamaton siya alang sa paniudto nga iyang gikaon didto sa eskwelahan karong adlawa. Mapasalamaton siya alang sa iyang mga higala. Mapasalamaton siya alang sa apartment nga iyang gipuy-an.

Makalingaw kadto nga maghunahuna sa mga butang nga mapasalamatan! Wala gayod sukad makaamgo si Gabriela kon unsa ka daghan nga maayo nga mga butang ang anaa sa iyang kinabuhi.

Nasayod siya nga ang Espiritu Santo mihatag kaniya og ideya sa paghunahuna sa iyang mga panalangin. Ang iyang kasingkasing malinawon na karon. Mibati siya nga andam na nga mag-ampo.

“Minahal nga Langitnong Amahan,” miingon siya. “Pasayloa ko nga nasuko ko kang Mutti. Salamat sa pagtabang Nimo kanako nga mobati og kakalma ug kalipay pag-usab. Salamat sa pagpadala Nimo sa Espiritu Santo aron sa pagpahinumdom kanako sa akong mga panalangin. Sa ngalan ni Jesukristo, amen.”

Migawas siya sa iyang kwarto. Sila si Mutti ug si Vati anaa sa kosina nagluto og panihapon. Gigakos niya si Mutti.

“Pasayloa ko nga nasuko ko nimo,” miingon si Gabriela.

“OK ra na,” miingon si Mutti. “Salamat sa pagpangayo og pasaylo.”

Milingkod sila palibot sa lamesa alang sa panihapon ug mipanalangin sa pagkaon. Dayon nakahunahuna og ideya si Gabriela!

“Magpuli-puli kita nga anaa dinhi sa lamesa ug ang matag usa mosulti og usa ka butang nga atong gipasalamatan,” miingon siya.

Mipahiyom si Vati. “Maayo kana nga ideya!”

“Mapasalamaton ko alang sa sabon” miingon si Mutti.

Naghunahuna og kadiyot sa Vati.

“Pizza” miingon siya. Miagik-ik silang tanan.

Dayon turno na ni Gabriela. Nasayod na siya daan kon unsa ang gusto niyang isulti.

“Mapasalamaton ko alang sa pag-ampo.”

Mga paghulagway pinaagi ni Simini Blocker