Ang Unang Panan-awon

Sa dihang batan-on pa si Joseph Smith, daghang mga simbahan ang nagtudlo og lain-laing mga butang mahitungod ni Jesukristo. Wala masayod si Joseph kon hain nga simbahan ang iyang apilan.

Usa ka adlaw, mibasa siya sa Santiago 1:5 diha sa Biblia. Kini nag-ingon nga kon kita nagkinahanglan og kaalam, kita makapangayo sa Dios. Si Joseph nakahukom nga buhaton kana.

Sa usa ka matahom nga adlaw sa tingpamulak, si Joseph misulod sa kakahoyan aron mag-ampo ngadto sa Langitnong Amahan.

Miluhod si Joseph ug misugod sa pag-ampo. Apan mibati siyag kangitngit sa iyang palibot. Nahadlok si Joseph. Nangayo siya og tabang sa Dios.

Sa kalit lang, si Joseph nakakita og kahayag nga nanaog gikan sa langit. Nakakita siya sa Langitnong Amahan ug ni Jesukristo nga nagbarog sa kahanginan. Ang Langitnong Amahan misangpit sa ngalan ni Joseph. Dayon Siya mitudlo ngadto ni Jesukristo ug miingon, “Kini mao ang Akong Hinigugmang Anak. Paminaw Kaniya!”

Si Jesus misulti ni Joseph nga siya kinahanglan nga dili moapil sa bisan unsa nga mga simbahan.

Si Joseph motabang sa pagpahiuli sa kahingpitan sa ebanghelyo sa yuta.

Si Joseph wala na naglibog. Siya napuno sa hingpit nga kalipay! Nasayod siya nga gihigugma siya sa Dios. Ang ubang mga tawo wala motuo nga siya nakakita sa Langitnong Amahan ug ni Jesukristo, apan siya nasayod nga kini tinuod.