Digital Lamang
Nganong Nagkinahanglan Kita og Organisado nga Relihiyon?
Ang pagkahimong kabahin sa Simbahan sa Ginoo makatabang nato sa paghinumdom ug mahimong sama ni Jesukristo.
Naghunahuna ba kamo ngano nga ang Dios miorganisar sa Iyang Simbahan sa paagi nga Iyang gihimo? Ngano nga kita adunay mga propeta, apostoles, ug mga calling sa Simbahan? Tingali naghunahuna ka ngano nga kita nagkinahanglan nga mohimo ug motuman og mga pakigsaad aron modawat sa kahimayaan, kay sa modawat niini lamang pinaagi sa pagkamaayong tawo.
Si Elder D. Todd Christofferson sa Korum sa Napulog Duha ka Apostoles miingon, “Wala kita maningkamot aron makabig ngadto sa simbahan apan ngadto kang Kristo ug sa Iyang ebanghelyo, pagkakabig nga giabagan sa Simbahan.” Aniay pipila ka paagi nga Ang Simbahan ni Jesukristo sa mga Santos sa Ulahing mga Adlaw makapalawom sa atong pagkakabig ngadto ni Jesukristo ug sa pagtabang nato nga mahimong sama Kaniya.
Paggamit sa mga Yawe sa Pagkapari ug sa Gahom
Si Presidente Russell M. Nelson miingon, “Kon wala ang mga yawe sa pagkapari, ang Simbahan magsilbi lamang nga usa ka importante nga pagtulon-an ug makitawhanon nga organisasyon apan dili na makahimo og daghan pa.” Ang mga yawe sa pagkapari mohimo og mga pakigsaad kauban sa Dios nga anaa alang sa mga lalaki ug mga babaye. Kon tumanon nato ang atong mga pakigsaad, kita adunay mas dakong higayon nga makagamit sa gahom sa Dios, nga makatabang nato sa pagtuman sa mga calling, paglahutay og mga pagsulay, pagpakigbatok sa tentasyon, ug pag-ila tali sa matarong ug sayop.
Pagdawat og Giya gikan sa Propeta
Ang mga propeta mao ang pundasyon nga bahin sa Simbahan ni Kristo. Sama sa mga tawo sa Biblia nga gigiyahan ni Abraham, Moises, ug sa ubang bantogang mga propeta, kita gigiyahan sa mga propeta sa ulahing mga adlaw. Ang mga propeta importante sa atong espirituwal nga pagtubo tungod kay, sama sa gitudlo ni Elder Ulisses Soares sa Korum sa Napulog Duha ka Apostoles, “Nagrepresentar sila sa hunahuna ug kasingkasing sa Ginoo ug gitawag nga morepresentar Kaniya ug motudlo kanato unsa ang angay natong buhaton aron makabalik pagpuyo sa presensya sa Dios ug sa Iyang Anak, si Jesukristo.” Sa usa ka kalibotan nga adunay daghang nagkasumpaki nga mga tingog, makapahulay nga makahibalo nga kita makatan-aw kanunay ngadto sa buhi nga mga propeta isip usa ka tinubdan sa kamatuoran.
Pagtubo pinaagi sa mga Calling
Laing paagi nga ang Simbahan makatabang nato nga mahimong sama ni Jesukristo mao ang paghatag og mga calling ngadto sa indibidwal nga mga miyembro. Ang atong pagserbisyo sa Simbahan dili lang sa pagtubag sa temporal nga mga panginahanglan apan sa pagtabang usab nga mahimong mas sama sa Manluluwas, ang hingpit nga ehemplo sa dili hinakog nga pagserbisyo. “Ang matag calling naghatag kanato og kahigayonan sa pag-alagad ug pag-kat-on,” miingon si Elder Dieter F. Uchtdorf sa Korum sa Napulog Duha ka Apostoles. “Ang Ginoo mitukod sa Simbahan sa paagi nga naghatag sa matag miyembro og kahigayonan sa pag-alagad, diin, agig balos, makahimo ngadto sa iyang kaugalingong espirituhanon nga kalig-on.”