Nasayop Ba Ang Akong Tawag sa Misyon?

Duha ka tuig sa akong praktikal nga kurso sa matematika sa panalapi, duna koy kusog nga pag-aghat nga magmisyon. Gipili nako nga moserbisyo, bisan og posibleng mawad-an ko og pipila ka kredito sa kolehiyo nga kinahanglang sunodsunod nga kuhaon.

Wala madugay, samtang nagbasa ko sa akong mission call ngadto sa Utah Salt Lake City Central Mission, ang higayon gibati nga sama sa damgo. Wala koy nailhan nga nagserbisyo sa Siyudad sa Salt Lake. Naghunahuna ko nga tingali sayop ang akong naablihan nga tawag sa misyon. Dihang miabot ko sa Siyudad sa Salt Lake, gibati nako nga ang tanan lahi ra kay sa akong naandan. Nakaplagan nako ang akong kaugalingon nga nagbisikleta sa snow nga walay ideya kon unsaon nga mahimong misyonaryo. Kay lahi ang kultura ug klima niini, ang Siyudad sa Salt Lake maingon og layo kaayo sa Habagatang Africa kutob sa akong naadtoan.

Sa akong unang area, ang akong kauban ug ako mibisita sa usa ka miyembro nga ginganlan og Chris Ruppel alang sa panihapon. Nangutana siya kon bisan kinsa namong duha maantigo ba sa musika. Misulti ang akong kauban nga makatukar ko og piyano ug mokanta, mao nga mikanta ko alang sa pamilya. Dayon usa ka espesyal nga butang ang nahitabo. Si Brother Ruppel mitan-aw nako ug misulti, “Elder Vizzini, kon kanunay kang mokanta og ingon niana, mahimo kang malamposon nga misyonaryo.” Naghunahuna ko nga mabination kaayo siya sa pagsulti niana apan akong gibaliwala.

Paglabay sa pipila ka bulan, kauban ni Brother Ruppel, mitabang ko sa pag-organisar og musical nga missionary fireside. Sa kada area nga akong giserbisyohan human niadto, among gigamit kadtong susamang pamaagi sa pag-fireside. Daghang tawo ang miapil namo, gikan sa mga sakop sa stake ngadto sa ilado nga lokal nga mga musikero ug mga miyembro sa ubang pagtuo. Nagtudlo mi mahitungod sa Manluluwas pinaagi sa musika ngadto sa mga tawo nga kon sa laing paagi dili unta ganahan nga maminaw sa leksiyon. Akong nakat-onan nga ang musika makatandog sa kabos ug sa dato, sa edukado ug sa dili edukado.

Ang akong misyon nagtudlo nako nga makahimo ko og malisod nga mga butang. Samtang nagserbisyo ko sa dapit nga layo kaayo ug lahi kaayo kaysa among panimalay, nakat-onan nako nga ang tanang tawo anak sa Dios. Nakakita ko og mga milagro sa kinabuhi sa mga tawo sa laing habig sa kalibotan didto sa Utah, ug nakakita ko niini dinhi sa Habagatang Africa. Nasayod ko nga kon magbaton lamang kita og pagtuo, mahitabo ang mga milagro sa matag usa sa atong kinabuhi (tan-awa sa Mormon 9:15–21).