Mapasalamaton sa Pagpundok

Kauban sa akong Kaigsoonan sa Unang Kapangulohan ug sa Korum sa Napulog Duha ka Apostoles, kami mopahayag: “Kini nga Simbahan nakaangkla sa hingpit nga kinabuhi sa ulohang bato sa pamag-ang niini, si Jesukristo, ug diha sa Iyang walay kinutoban nga Pag-ula ug literal nga Pagkabanhaw. … Midapit Siya kanatong tanan sa pagduol ngadto Kaniya ug sa Iyang Simbahan, sa pagdawat sa Espiritu Santo, sa mga ordinansa sa kaluwasan, ug sa pag-angkon og malungtarong kalipay.”

Tungod kay ang Pagpahiuli nagpadayon pinaagi sa nagpadayon nga pagpadayag, “ang kalibotan dili na gayod mapareha pag-usab, kay ang Dios ‘[mohiusa sa] tanang binuhat diha sa langit ug sa yuta ubos sa pagpangulo ni Kristo’ (Mga Taga-Efeso 1:10).”

“Tanang binuhat” naglakip sa Iyang karnero. Ang Manluluwas nanawag kanato sa pagbiya sa pagkadaotan sa kalibotan ug magpundok ngadto Kaniya. Gusto Niya nga ang Iyang karnero nga mahimong kahayag nga mohayag pag-ayo, magpakita og sumbanan alang sa uban sa kalibotan pinaagi sa pagpamalandong kon sa unsa nga paagi magpuyo ang tinuod nga mga disipulo, lakip kon sa unsa nga paagi masinati nila ang tinuod nga kamaya samtang ilang itutok ang ilang mga kinabuhi diha sa Manluluwas.

Kita magpundok ngadto sa Manluluwas kon moduol kita ngadto Kaniya (tan-awa sa Mateo 11:28) pinaagi sa pagpakita og hugot nga pagtuo ngadto sa paghinulsol, pagdawat sa bunyag ngadto sa Iyang Simbahan, ug pagdawat sa gasa sa Espiritu Santo.

Magpundok kita ngadto sa Manluluwas kon kita makasinati sa espirituwal nga pagkaayo nga moabot tungod sa pag-ambit sa sakramento, pagsaksi nga kita andam sa pagdala sa atong kaugalingon sa ngalan sa Manluluwas, sa kanunay mohinumdom Kaniya, ug motuman sa Iyang mga sugo (tan-awa sa Doktrina ug mga Pakigsaad 20:77, 79).

Magpundok kita ngadto sa Manluluwas kon kada adlaw kitang mopuno sa atong mga kinabuhi sa Iyang mga pulong ug kamatuoran, lakip sa mga pagtulun-an sa Iyang mga propeta, mga manalagna, ug mga tigpadayag.

Magpundok kita ngadto sa Manluluwas kon kita mopalambo sa atong abilidad sa pagpaminaw Kaniya, takos nga magsunod sa mga hunghong sa Espiritu Santo.

Magpundok kita ngadto sa Manluluwas samtang atong lig-onon ang atong pagkakabig, palamboon ang atong hugot nga pagtuo, palawman ang atong pagkadisipulo, mosunod sa Iyang ehemplo, ug maningkamot nga mahimong mas maayo og gamay matag adlaw.

Magpundok kita ngadto sa Manluluwas samtang maghimo kita og sagrado nga mga pakigsaad ug modawat sa balaan nga mga ordinansa sa templo.

Magpundok kita ngadto sa Manluluwas kon itugyan nato ang atong mga kaugalingon nga may pailob ug kaisog “sa tanan nga butang diin ang Ginoo makakita nga angay ipahamtang [ngari kanato]” (Mosiah 3:19).

Sa kataposan, magpundok kita ngadto sa Manluluwas samtang kita motudlo ug mopamatuod bahin Kaniya, magdapit sa atong mga pamilya, mga higala, ug mga silingan nga magpundok uban nato ngadto “sa kahayag, sa kinabuhi, ug sa paglaom sa kalibotan.”

Kon kita magpundok ug maghiusa isip mga miyembro sa Ang Simbahan ni Jesukristo sa mga Santos sa Ulahing mga Adlaw, mosulod kita ngadto sa pakigdait ug panag-uban sa usag usa. Kita mopaluyo, motudlo, ug mobalaan sa usag usa. Maningkamot kita, sa mga pulong sa Manluluwas, nga “ma[hi]usa” (Juan 17:21; tan-awa usab sa Doktrina ug mga Pakigsaad 38:27) ug sa “paghigugmaay kamo” (Juan 13:34).

Si Presidente Dallin H. Oaks, Unang Magtatambag sa Unang Kapangulohan mitudlo, “ang pagtambong sa Simbahan maghatag kanato og kusog ug pagpalambo sa hugot nga pagtuo nga moabot gikan sa pakigkuyog sa ubang mga tumutuo ug sa pagsimba og dungan niadtong kinsa naningkamot nga magpabilin sa dalan sa pakigsaad ug mahimong mas maayo nga mga disipulo ni Kristo.”

Sa Simbahan makaplagan nato ang espirituwal nga kapahulayan ug pagbag-o. Makaplagan nato ang mga ordinansa ug ang awtoridad sa pagkapari nga mangalagad ngadto kanila. Makaplagan nato ang gipahiuli nga kamatuoran, lunsay nga doktrina, ug personal nga pagpadayag. Makaplagan nato ang maabiabihong mga bukton, makahupay nga mga kasingkasing, ug makaawhag nga mga tingog. Makakaplag kita og mga oportunidad sa pagsunod sa duha ka dagko nga mga sugo (tan-awa sa Marcos 12:30–31).

Ang Ginoo mipasidaan nato nga “ang kaaway naghiusa” (Doktrina ug mga Pakigsaad 38:12). Aron mapanalipdan ang atong mga pamilya ug mapakgang ang nagtubo nga impluwensya ni Satanas, ang pagsimba nga magpundok isip mga Santos mas gikinahanglan pa.

Ang “panaghiusa,” mitudlo si Propeta Joseph Smith, “usa ka gahom.”

Si Propeta Joseph miingon usab, “Ang adlaw nagkaduol na nga ang paghiuli sa tanang butang mangatuman, nga ang tanan nga balaang propeta nakapanagna, bisan ang pagpundok sa balay ni Israel.” Usa niadtong kinsa nanagna mao si Jeremias sa Daang Tugon:

“Moabot ang panahon nga wala nay manumpa sa akong ngalan ingon nga buhing Dios nga nagkuha sa katawhan sa Israel gikan sa Ehipto;

“Hinuon manumpa sila sa akong ngalan ingon nga mao ang buhing Dios nga nagdala sa katawhan sa Israel gikan sa nasod sa amihanan ug sa tanang nasod diin ko sila patibulaaga” (Jeremias 16:14–15).

Si Propeta Joseph mipahayag pa og dugang, “Kita ang pinalabi nga mga tawo nga gipili sa Dios aron sa pagdala sa Ulahing adlaw nga himaya; gibilin kini alang kanato aron makakita, makaapil ug makatabang sa pagpadayon sa Ulahing adlaw nga himaya, … nga ang mga Santos sa Dios magkapundok nga maghiusa gikan sa tanang kanasoran, ug kaliwatan, ug katawhan, ug pinulongan.”

Sa pagtuman niana nga buhat, “Ipakuha ko ang daghang mga mananagat aron pagdakop niining maong katawhan. Padad-an ko silag mangangayam aron pag-ayam kanila gikan sa tanang bukid ug bungtod ug bisan pa sa mga lungib sa kapangpangan” (Jeremias 16:16).

Kaigsoonan, isip ulahing adlaw nga Israel sa pakigsaad—mga miyembro sa gipahiuli nga Simbahan ni Jesukristo—kita ang mga mananagat ug mga mangangayam sa Ginoo. Gitawag kita sa pagpundok sa pinili sa Ginoo gikan sa matag bukid, bungtod, ug sa gagmay nga sityo. Gitawag kita sa paghatag sa mga anak sa Dios og oportunidad nga mahimong hingpit nga manununod sa tanan Niyang gisaad sa Iyang matinud-anong mga anak. Mao kana ang labing dako nga pagserbisyo nga atong ikahatag.

Matuman nato kanang balaanong sugo pinaagi sa pagpundok sa Israel sa duha ka habig sa tabil—pagpakigbahin sa maayong mga balita sa Pagpahiuli ngadto sa uban, pagpangita sa atong namatay na nga mga katigulangan, ug pagpahigayon sa puli nga mga ordinansa alang kanila diha sa templo. Matuman usab nato kana nga sugo kon kita mopakigbahin sa gugma sa Manluluwas pinaagi sa atong pagserbisyo, ehemplo, pagpamatuod, ug pagdapit sa uban nga moapil kanato.

“Ang Ginoo naggiya sa Pagpahiuli sa Iyang ebanghelyo ug sa Iyang Simbahan,” miingon si Presidente Henry B. Eyring, Ikaduhang Magtatambag sa Unang Kapangulohan. “Siya nag-una kanato. Siya hingpit nga nahibalo sa umaabot. Siya nagdapit ninyo ngadto sa buhat. Siya makig-uban ninyo niini.”

Unsay nahitabo sa relo nga igasulod ra sa bulsa ni Lolo Nelson? Pipila ka tuig ang milabay, gipasa nako kini ngadto sa akong anak nga lalaki. Sama sa nahimo niini kanako, kana nga relo nagsumpay niya karon sa iyang mga kagikanan ug nagpahinumdom niya sa iyang katungdanan sa iyang kaliwatan.

Ug kini magpadayon. Ang matag henerasyon sa pakigsaad nagpadayon sa buhat sa Ginoo, naghimo sa iyang bahin sa pag-andam sa kalibotan alang sa Ikaduhang Pag-anhi ni Jesukristo.

Hinaot nga kanunay kita nga mapasalamaton sa pribilihiyo ug pagsalig nga gihatag sa Ginoo kanato samtang kita magpundok ngadto sa Manluluwas, magpundok kauban sa mga Santos, ug magpundok pinaagi sa pagserbisyo Kaniya.