Ang Tanan Gikinahanglan sa Lawas ni Kristo

Ang dako-dako nga doktor sa E.U., ang hepe sa tig-edukar sa kahimsog alang sa Estados Unidos, mipakigbahin niini nga pamahayag mahitungod sa kaimportante sa mga relasyon: “Ang atong epidemya sa kamingaw ug pag-inusara wala kaayo makit-i nga krisis sa kahimsog sa publiko nga nakadaot sa kahimsog sa indibidwal ug sa katilingban. Ang atong mga relasyon mao ang tinubdan sa pagkaayo ug pagkatawo nga tataw nga wala makit-i. … Nahibaloan ang klaro nga mga sangpotanan sa kamingaw ug pag-inusara, kinahanglan nga atong unahon sa pagpalig-on ang sosyal nga koneksyon sa samang paagi nga atong giuna ang ubang kritikal nga mga isyu sa kahimsog sa publiko. … Magkauban, makatukod kita og [katilingban] nga mas himsog, mas lig-on, dili kaayo mingawon, ug mas konektado.”

Magkauban makatabang kita sa pagtukod og tibuok kalibotan nga panag-inigsoonay sa kababayen-an sa tanang edad nga mas himsog, mas lig-on, dili kaayo mingawon, ug mas konektado tungod sa atong relasyon sa pakigsaad ngadto sa Dios ug sa atong responsibilidad sa usag usa isip mga disipulo ni Jesukristo.

Sama sa gisulti sa Manluluwas, “Kon maghigugmaay kamo, mahibalo ang tanan nga kamo akong mga tinun-an.” (Juan 13:35).

Makatabang kita sa pagpahinay sa epidemya sa kamingaw pinaagi sa paghimo og maabiabihon ug luwas nga lugar diha sa atong mga kongregasyon ug ilabi na diha sa atong mga Relief Society, diin ang tanan mobati sa gugma sa Ginoo tungod kay gilibotan sila sa atong gugma.

Ang atong kasinatian sa simbahan gihimo aron sa paghatag niadtong importante nga mga koneksyon ngadto sa Ginoo ug ngadto sa usag usa nga gikinahanglan kaayo alang sa atong pisikal, emosyonal, ug espirituwal nga pagkatawo. Adunay dako nga kalig-on sa panaghiusa ug kaanindot sa pagkadaiya; ang tanan gikinahanglan sa lawas ni Kristo (tan-awa sa 1 Mga Taga-Corinto 12:12–27). Sama sa dagko kaayong mga kahoy nga redwood nga nagkapot ang mga ugat ug makasugakod sa gahom sa kinaiyahan tungod kay sila nagkahiusa sa pagbarog, kinahanglang magkinuptanay kita sa atong mga bukton, magkahiusa sa pagbarog, ug maglig-on sa usag usa taliwala sa mga hagit sa kinabuhi.

Kon atoa gayod mailhan kadtong paminaw nato lahi kay kanato, maamgohan nato nga aduna diay kitay mas daghang kapareha kay sa atong gituohan. Ang matag tawo adunay daghan kaayo nga ikatampo, daghan kaayog maanindot ug nagkadaiya nga mga kasinatian sa kinabuhi nga makapanalangin sa atong mga kinabuhi. Ang pagpaminaw sa mga istorya sa uban ug ang pagpaningkamot sa pagsabot kanila mousab sa atong mga kasingkasing, ug ang paghukom ug kahadlok nga atong gibati ngadto sa pipila mahimong kapulihan og mga pagpabati sa pasalamat nga anaa sila sa atong mga kinabuhi.

Ang Ginoo makatabang nato nga makakita sa ubang tawo sama sa Iyang pagkakita kanila, ug Siya makapuno sa atong mga kasingkasing og gugma, makapahimo nato sa pagbayaw, paghupay, pagkatawa, paghilak, ug pagtabang sa pagpabati og pagkanahisakop niadtong anaa sa atong palibot. Motabang Siya kanato unsa ang gikinahanglan ug unsaon sa pagpanalangin sa uban sa ilang panaw.

Dayag lang, adunay Usa lamang ang makasabot sa hingpit ug hingpit nga makasimpatiya. Isip kabahin sa Iyang maulaong sakripisyo, Siya nag-antos sa “mga sakit ug mga kasakit ug mga pagtintal sa matag matang; … moantos sa mga sakit ug mga balatian sa iyang katawhan” (Alma 7:11) aron nga kita makapaneguro nga dili gayod kita mag-inusara.

Ang matag usa kanato gitawag sa paghigugma ug sa pagpangalagad sa mga anak sa atong Langitnong Amahan sama sa buhaton sa Manluluwas. Makig-uban kita Kaniya sa pagpanalangin sa uban aron nga sila ug kita hingpit nga mobati sa gugma sa atong Manluluwas. Magkinuptanay kita sa atong mga bukton ug malipayong mamauli ngadto sa atong panimalay. Ako mopamatuod nga kini usa ka sagrado nga buhat diin kitang tanan gitawag sa pagbuhat.