Malipayong mga Balita sa Gugma ug Hingpit nga Kalipay

Usa ka bag-ong adlaw ang mibanag-banag alang sa tawhanong pamilya diha sa usa ka kakahoyan, diin ang Dios nga Amahan ug ang Iyang Anak, si Jesukristo, mipakita ug misulti ngadto ni Joseph Smith agi og tubag ngadto sa pag-ampo sa batan-ong Joseph mahitungod sa hain nga simbahan kinahanglan siya magpasakop (tan-awa sa Joseph Smith—Kasaysayan 1:14–20). Misulti si Jesukristo ni Joseph sa dili pagpasakop sa bisan hain nga simbahan. Misaad Siya nga ang kahingpitan sa Iyang ebanghelyo ipadayag ngadto ni Joseph sa umaabot.

Alang sa kadaghanan, si Joseph ingon og ang labing walay kalagmitan nga pagatawgon ngadto sa mao nga importanteng buhat, ug sila husto. Siya walay edukasyon ug dili importante nga batang lalaki gikan sa gamay nga uma sa usa ka kabos nga lungsod. Sama sa gisulti sa uban kabahin sa Manluluwas sa Iyang panahon, “Aduna ba guy maayong butang gikan sa Nazaret?” (Juan 1:46), daghan ang nahibulong unsay kaayohang moabot gikan sa walay edukasyon nga 14 anyos ang panuigon diha sa Palmyra, New York. Apan pinaagi ni Joseph—ingon nga walay kalagmitan nga siya tingali ingon—ang Langitnong Amahan ug ang Ginoong Jesukristo mopahinabo sa tinuoray nga talagsaon. Kini kinahanglang modala kanato og paglaom nga sa atong gamay ug mapainubsanong paagi, kita usab makatampo sa makahuloganong mga paagi ngadto sa buhat sa Ginoo.

Sa wala madugay, ang Ginoo mitawag ni Joseph “ug namulong ngadto kaniya gikan sa langit, ug mihatag kaniya og mga sugo” (Doktrina ug mga Pakigsaad 1:17). Nadawat ni Joseph ang bililhong mga pagpadayag ug importanteng doktrina nga midala og bag-ong kahayag ngadto sa atong pagsabot kabahin sa mahigugmaong plano sa Langitnong Amahan ug sa matubsanong gugma ni Jesukristo ug sa gahom sa Iyang maulaong sakripisyo. Sa talagsaong paagi, kining malipayon nga mga balita miabot sa untop nga higayon sa dihang ang makahuloganong mga pag-uswag sa transportasyon, komunikasyon, ug sa ubang mga dapit nga motugot sa kahayag sa Dios sa pagdan-ag sa pagpanalangin og dugang pa sa Iyang mga anak.

Si Anghel Moroni Naghatag sa mga Palid ngadto ni Joseph Smith, ni C. C. A. Christensen

Usa ka Gamhanang Saksi sa Gugma sa Dios

Ang pagpakita ni anghel Moroni ngadto ni Joseph Smith importante ngadto sa Pagpahiuli ug gamhanan nga ebidensiya sa gugma sa Dios. Gisultihan ni Moroni si Joseph kabahin sa usa ka rekord, gisulat diha sa bulawan nga mga palid, gilubong sa duol (tan-awa sa Joseph Smith—Kasaysayan 1:33–34). Sa dili madugay, si Joseph Smith pagahatagan og “gahom gikan sa kahitas-an” (Doktrina ug mga Pakigsaad 20:8) sa paghubad niana nga rekord ngadto sa unsay mahimong ang Basahon ni Mormon, nga kauban sa Biblia ug mahimong lain nga tugon ni Jesukristo.

Sa tibuok Basahon ni Mormon, atong mabasa ang kabahin sa mga tawo kinsa, gatosan ka tuig sa wala pa si Kristo, nahibalo ug nanagna kabahin sa Iyang pag-anhi ug nangandoy alang niini. Ato usab nga makaplagan ang talagsaong istorya kabahin sa personal nga pagpakita ug pagpangalagad sa nabanhaw nga Manluluwas taliwala sa mga Nephita, atol niini Siya midapit sa tanan sa pagduol ngadto Kaniya ug sa paghikap sa mga marka diha sa Iyang kilid ug sa mga agi sa mga lansang diha sa iyang mga kamot ug mga tiil (tan-awa sa 3 Nephi 11:14–15). Siya miayo sa masakiton, sa bakol, sa buta—“tanan kanila nga gitakbuyan sa bisan unsa nga matang”—ug dayon mipanalangin sa gagmay nga mga bata ug miampo alang kanila (tan-awa sa 3 Nephi 17:7–9, 21). Daghan kaayo kitang nakat-onan mahitungod sa gugma ug kapuangod sa Manluluwas gikan niining sagrado nga istorya.

Ang Basahon ni Mormon nagsaksi nga si “Jesus mao ang Kristo.” Ang mga kasigurohan diha sa Basahon ni Mormon nagbalik-balik sa pagpahinumdom kanato nga ang atong Amahan sa Langit ug ang atong Manluluwas nahigugma kanato lapas sa bisan unsa nga atong mahunahuna.

Ang Pagpahiuli mipadayon uban sa pagpakita sa ubang langitnong mga mensahero ngadto ni Joseph Smith. “Ang nabanhaw nga si Juan Bautista mipahiuli sa awtoridad sa pagbunyag pinaagi sa pagpaunlod alang sa kapasayloan sa mga sala. Tulo sa orihinal nga napulog duha ka Apostoles—si Pedro, Santiago, ug Juan—mipahiuli sa pagka-apostol ug sa mga yawe sa awtoridad sa pagkapari. Ang uban mianhi usab, lakip ni Elijah, kinsa mipahiuli sa awtoridad sa paghiusa sa mga pamilya hangtod sa kahangtoran diha sa mahangtoron nga mga pakigrelasyon nga molungtad lapas sa kamatayon.”

Sa Abril 6, 1830, mitukod si Jesukristo pinaagi ni Joseph Smith og usa ka simbahan nga gisunod sa simbahan nga Iyang gitukod sa mga panahon sa Bag-ong Tugon (tan-awa sa Mga Artikulo sa Hugot nga Pagtuo 1:6), hingpit uban “ang patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang” (Mga Taga-Efeso 2:20). Ang Simbahan ni Jesukristo sa mga Santos sa Ulahing mga Adlaw naghimo sa mga panalangin sa gipahiuli nga gahom sa pagkapari nga maanaa ngadto sa tanang anak sa Dios kinsa nag-andam sa ilang mga kaugalingon sa pagdawat niini.

Sama sa gitudlo ni Presidente Russell M. Nelson kanato, makakaplag kita og hingpit nga kalipay diha sa inadlaw nga paghinulsol samtang kita modangop ngadto sa Langitnong Amahan ug sa atong Manluluwas. Ngadto ni bisan kinsa nga mibati og kaguol o nga sila wala makaabot sa sumbanan o wala mahiapil: tanan gidapit sa pagduol ngadto ni Kristo ug sa Iyang Simbahan. Ang Simbahan dili usa ka monasteryo alang sa perpekto nga mga tawo apan usa ka ospital alang sa naninguha nga mahimong mamaayo. Si Elder Dieter F. Uchtdorf sa Korum sa Napulog Duha ka Apostoles nagpahinumdom kanato nga “mosimba kita dili aron sa pagtago sa atong mga problema apan sa pag-ayo niini.”

Diha sa simbahan atong makaplagan ang hingpit nga kalipay sa mga oportunidad sa pag-usab sa atong mga kaugalingon nga mohunahuna sa uban, moserbisyo sa uban nga may gugma, ug mopakigbahin sa atong kaugalingong personal nga mga kasinatian uban sa kabuhong sa kamaayo ni Kristo. Mahimo nga kita “giihap uban sa mga katawhan sa simbahan ni Kristo” ug “mahinumdoman ug maamumahan pinaagi sa maayo nga pulong sa Dios” (Moroni 6:4). Unsa ka dako nga panalangin!

Si Propeta Joseph Smith makausa mipahayag, “Karon, unsa ang atong nadungog mahitungod sa ebanghelyo diin kita nakadawat? Ang tingog sa kalipay! Ang tingog sa kalooy gikan sa langit; ug tingog sa kamatuoran gikan sa yuta; malipayon nga mga balita alang sa mga patay; ang tingog sa kalipay alang sa mga buhi ug sa mga patay; malipayon nga mga balita sa hingpit nga kalipay” (Doktrina ug mga Pakigsaad 128:19).

Kining malipayong mga balita nakaabot tungod kay ang Langitnong Amahan ug ang Iyang pinalanggang Anak, si Jesukristo, nahigugma kanato ug nagtinguha—labaw pa sa bisan unsa—sa pag-abiabi kanato og balik ngadto sa Ilang presensya, nga kita unta adunay mahangtorong matang sa kinabuhi nga Sila nagpuyo. Ang Pagpahiuli nagpadayag nga Sila nakahimo sa tanan nga gikinahanglan sa paghimo niini nga mahimayaong posibilidad alang kanatong tanan. Diha sa atong mahangtorong panaw, masinati nato ang mga pagsulay ug mga kalisod, apan “[kita] mahimo, nga [kita] unta makabaton og hingpit nga kalipay” (2 Nephi 2:25) niini nga kinabuhi ug sa sunod. Si Propeta Joseph Smith mas nakahibalo niini kay sa kadaghanan.

Giatubang ni Joseph ang kanunay nga pagbatok ug pagpanggukod, apan siya mihupot sa iyang “pagkagaan og buot” (Joseph Smith—Kasaysayan 1:28). Mipabilin siya nga hingpit nga malipayon, kusgan, ug lig-on, ug siya nakatuman sa dili ordinaryo nga buhat nga siya gihatagan sa pagtrabaho. Ako mohatag og pasidungog ngadto sa tanang unang mga Santos kinsa mituo, misuporta, ug misunod ni Propeta Joseph Smith ug mipahinungod sa ilang mga kaugalingon ngadto sa pagtukod sa Simbahan. Nakautang kita kanila og pagpasalamat ug pasidungog.

Malisod ug walay kasigurohan ang unang mga adlaw sa Simbahan, ug kini mahimong malisod ug walay kasigurohan ang karon. Apan ang Pagpahiuli nagpadayon. Uban ni Jesukristo nga pangulo niini nga Simbahan, ang buhi nga mga propeta mopadayon sa paggiya kanato. Ang mga balay sa Ginoo mopadayon nga pagatukoron, nga ang mga panalangin sa mahangtoron nga mga pakigsaad uban sa Dios mahimong mobugkos kanato ngadto Kaniya ug ngadto sa atong mga hinigugma sa duha ka bahin sa tabil (tan-awa sa Mateo 16:19). Ang gugma sa Dios ug ni Jesukristo molugway ngadto sa tibuok kalibotan samtang kita nagsunod sa sugo sa Manluluwas sa pagpakaon sa Iyang karnero ug sa pagpakigbahin sa Iyang ebanghelyo. Atong masaksihan ang mga kamatuoran sa Pagpahiuli nga masangyaw sa mga paagi ug sa mga dapit nga mahimo untang lisod nga hunahunaon sa panahon ni Joseph.

Makakaplag kita og kalig-on ug dakong hingpit nga kalipay—sama ni Propeta Joseph—samtang atong gisagop ug gisunod kining bililhong mga kamatuoran. Ang tawag nga gihimo ni Joseph ngadto sa mga Santos sa iyang panahon nagpadayon kanato karon: “Kita dili ba mopadayon sa hilabihan nga mahinungdanon nga katuyoan? Padayon ug ayaw pagsibog. Pagmaisogon, … ug sa kanunay, ngadto sa kadaugan! Himoa ang inyong mga kasingkasing nga magmaya, ug paglipay sa hilabihan” (Doktrina ug mga Pakigsaad 128:22).

Hinaot ang malipayong mga balita sa gugma ug hingpit nga kalipay nga gidala sa Pagpahiuli magdala og panalangin ug maggiya sa atong mga kinabuhi—karon ug sa kanunay.