Ang mga Pananalangin sa Pagpahiuli

Daghang katuigan nga milabay, gibati nako nga sama sa batan-ong si Joseph. Naglibog ko tungod sa “gubat sa mga pulong ug kagubot sa mga opinyon” (Joseph Smith—Kasaysayan 1:10) nga naggikan sa daghang lahilahi nga mga simbahan sa Fiji. Sa una nakong nahimamat ang mga misyonaryo, daghan kaayo kog pangutana. Ang uban nagbugalbugal nga hinay kong makat-on kay migahin ko og walo ka tuig sa pagtuon sa Simbahan. Ang akong pagkakabig nagsugod pinaagi sa pagsabot sa ngalan sa Simbahan.

Atol sa Iyang mortal nga pagpangalagad, gitukod ni Jesukristo ang Iyang Simbahan. Sa kadugayan, ang doktrina ug katungod sa pagkapari sa Iyang Simbahan nawala. Sa atong panahon, gipahiuli ni Jesukristo pinaagi ni Propeta Joseph Smith ang maong simbahan nga Iyang giestablisar dihang nagpuyo Siya sa yuta (tan-awa sa Mga Artikulo sa Hugot nga Pagtuo 1:6). Nagsugo usab Siya pinaagi sa pagpadayag, “Kay sa ingon ang akong simbahan pagatawgon sa kataposan nga mga adlaw, gani Ang Simbahan ni Jesukristo sa mga Santos sa Ulahing mga Adlaw” (Doktrina ug mga Pakigsaad 115:4).

Ang Simbahan nagdala sa ngalan ni Jesukristo tungod kay Iya kini nga Simbahan! Human sa walo ka tuig, kini nga kamatuoran mituhop sa akong hunahuna ug kasingkasing. Nabunyagan ko sa edad nga 27 ug sa wala madugay gitawag isip magtatambag sa Kapangulohan sa Young Men ug magtutudlo sa sayo sa buntag nga seminary. Samtang nagpadayon, ang akong pagpamatuod nagpadayon sa paglambo.

Nausab ang akong kinabuhi samtang nagtudlo ko og seminary, nagtambongan og miting sa sakramento, ug naminaw sa kinatibuk-ang komperensiya. Gibati usab nako ang malumo, makahupay, ug makadasig nga impluwensiya sa Espiritu samtang magbasa ko sa Basahon ni Mormon—usa ka mahikap nga ebidensiya ug pagpadayag sa Pagpahiuli ug sa propetikanhong tawag ni Joseph Smith.

Dihang gitawag sa Ginoo si Joseph “ug namulong ngadto kaniya gikan sa langit, ug mihatag kaniya og mga sugo” (Doktrina ug mga Pakigsaad 1:17), gipakita Niya nga Siya “nagdasig sa mga tawo ug nagtawag kanila ngadto sa iyang balaan nga buhat niini nga panahon ug kaliwatan, ug ingon sa karaan nga mga kaliwatan” ug nga “siya mao gihapon ang Dios kagahapon, karon, ug sa kahangtoran” (Doktrina ug mga Pakigsaad 20:11–12).

Ang Pagpahiuli nga nagsugod kang Joseph nagpadayon karon. Isip mga Santos sa Ulahing mga Adlaw, kita gitawag sa pagpamulong sa ngalan sa Manluluwas aron “nga ang hugot nga pagtuo … molambo sa yuta,” ang Iyang “walay kataposan nga pakigsaad unta mapahimutang,” ug “ang kinatibuk-an sa [Iyang] ebanghelyo mapahayag pinaagi sa huyang ug sa yano ngadto sa mga kinatumyan sa kalibotan” (Doktrina ug mga Pakigsaad 1:21–23). Bulahan kita nga makatabang sa pagtukod sa Simbahan ug pag-andam sa kalibotan alang nianang adlawa nga mobalik si Jesukristo.

Pagpasalamat alang ni Propeta Joseph Smith

Usa ka tuig human sa akong bunyag, ang akong asawa, si Anita, ug ako mibiyahe ngadto sa Nuku’alofa Tonga Temple aron maselyo alang sa karon ug sa kahangtoran. Ang akong pagpamatuod sa Pagpahiuli nakahimo sa akong pag-adto sa templo nga makahuloganon kaayo. Ang gipahiuli nga ebanghelyo ni Jesukristo tinud-anay nga bililhon kaayo! Ang akong kasingkasing napuno sa pasalamat sa mga panalangin nga gidala niini ngari kanako ug sa akong pamilya.

Kining bililhon nga mga panalangin miabot sa kalibotan pinaagi kang “Joseph Smith, ang Propeta ug Manalagna sa Ginoo, nakahimo og daghan pa, gawas lamang kang Jesus, alang sa kaluwasan sa mga tawo niini nga kalibotan, kay ni bisan kinsa nga tawo nga nakapuyo dinhi”” (Doktrina ug mga Pakigsaad 135:3). Kinahanglang magpasalamat kita kanunay—ug dili gayod makalimot—kon unsay gihatag kanato pinaagi sa propeta niining kataposang dispensasyon.

Pinaagi ni Joseph, nasabtan nato ang atong relasyon sa pakigsaad ngadto sa Langitnong Amahan ug ni Jesukristo. Ania kanato ang gipahiuli nga pagkapari ug mga ordinansa ug mga pakigsaad. Sa kasinatian ni Joseph sa Sagradong Kakahoyan, atong makat-onan nga bisan sa wala pa gani ang Amahan mipaila sa Iyang Anak, si Jesukristo, Iyang gitawag si Joseph pinaagi sa ngalan (tan-awa sa Joseph Smith—Kasaysayan 1:17). Nakaila Siya sa atong ngalan. Ug sama nga Iyang giablihan ang kalangitan ug gitubag ang yano, kinasingkasing nga pag-ampo sa usa ka 14 anyos nga batang lalaki, Siya usab motubag sa atong mga pag-ampo sa Iyang kaugalingong kabubut-on, paagi, ug panahon, bisan unsa pa ang atong edad. Kini nga mga kamatuoran milanog sa kinahiladman sa akong kalag. Ako mopamatuod nga kini tinuod.

Nanghinaot ko nga ako usa ka tawo nga nagbuhat ug maayo sa kalibotan. Kon nakahimo man ako, nan si Joseph Smith dako og nahimo sa pagtampo niini. Ang akong kinabuhi dili unta masama niini karon, dili ako mahimong bana ug amahan nga mao ako karon, ug dili ko sama ka malipayon kon wala ang gipahiuli nga ebanghelyo nga gisakripisyohan ni Propeta Joseph sa iyang kinabuhi aron madala sa kalibotan. Ang ebanghelyo naghatag kanako og kahayag ug paglaom. Tungod niini, mapasalamaton ako sa hangtod kang Propeta Joseph.

Magdala ko og kopya sa Basahon ni Mormon bisan asa ko moadto, manghinaot nga mahatag nako kini sa usa ka tawo ug makapaila nila sa gipahiuli nga ebanghelyo ni Jesukristo. Nakahatag na ko og gatosan ka kopya sa tibuok kalibotan. Ganahan kaayo ko nga mopakigbahin sa mensahe sa Pagpahiuli—bisan kanus-a, bisan asa.

Tinuod kini ilabi na kon magtudlo ug magpamatuod sa akong mga anak uban ni Anita sulod sa mga bungbong sa among panimalay. Ang among anak nga babaye nagserbisyo karon og misyon sa New York City, USA. Amo siyang gisultihan, “Lakaw ug ipamatuod ang Manluluwas sa imong habig sa kalibotan. Ang imong Mama ug Papa magbuhat niini sa among habig sa kalibotan.” Ganahan mi nga magpahibaloay sa usag usa bahin sa dagan sa among serbisyo. Ug karon, naa mi kwatro anyos nga apo nga babaye. Ang paglaom ug pangandoy sa akong kasingkasing mao nga kanunay siyang makadungog ug makahinumdom kanunay sa iyang Lolo nga nagpamatuod sa Manluluwas ug sa Iyang ebanghelyo.

Kitang tanan makapamatuod sa mga panalangin sa gipahiuli nga ebanghelyo—bisan kanus-a, bisan asa—samtang magpuyo kita sa sulundon nga kinabuhi sa usa ka disipulo ni Jesukristo. Mahimo natong ipakigbahin ang Basahon ni Mormon: Lain nga Tugon ni Jesukristo. Ug makapamatuod kita nga si Jesukristo mipahiuli sa kahingpitan sa Iyang ebanghelyo ug nangulo sa Simbahan karon. Si Presidente Russell M. Nelson nagtudlo nga “ang pagpadayag nagpadayon sa paggawas gikan sa Ginoo niining nagpadayon nga proseso sa pagpahiuli.” Ako mopamatuod nga kini nagpadayon pinaagi sa dili maputol nga linya sa mga yawe sa pagkapari nga gihuptan sa mga propeta, manalagna, ug tigpadayag kinsa nagdasig, naggiya, ug nagtabang kanato sa pagbugkos sa atong mga kaugalingon ngadto sa Manluluwas nga si Jesukristo.

Kini mao ang akong pagsaksi ug pagpamatuod. Ikalipay nako ang pagpakigbahin niini kanunay ug wala gayod magduhaduha niini.