Ang Kwarta Dili Makapalit og Kalipay, apan si Kristo Libre nga Nagtanyag og Hingpit nga Kalipay

Human sa tingale usa ka tuig sa pagbati nga ingon niini, naminaw ko sa pakigpulong ni Presidente Dallin H. Oaks, Unang Magtatambag sa Unang Kapangulohan. Gibati nako ang kalit nga kahigawad sa dihang nakadungog ko niya nga eksaktong naghulagway unsa nga matang sa tawo ako nahimo:

“Bisan karon ang uban nga nangangkon nga Kristiyano mas daling madani sa mga butang sa kalibotan—mga butang nga mopatunhay sa kinabuhi dinhi sa yuta apan dili makapalambo paingon sa kinabuhing dayon.”

Nagtuo ko nga mahimo nakong iprayoridad ang Dios ug kwarta sa samang higayon, apan sa mga pulong ni Presidente Oaks ug sa gipasabot sa Mateo 6:24 nagmatuod nga tinuod: “Dili mahimo nga ang usa ka tawo magpaulipon sa duha ka agalon kay mahitabo gayod nga iyang dumtan ang usa ug ang usa iyang higugmaon o unongan niya ang usa ug ang usa iyang tamayon. Dili kamo makapaulipon sa Dios ug sa salapi.”

Sa dihang ang akong hunahuna nakatutok sa materyal nga mga butang, nakaplagan nako nga mas lisod nga makakita sa kaanindot sa ebanghelyo. Wala ko makasabot kon sa unsa nga paagi nga ang pagsimba ug pagbasa sa mga kasulatan makatabang nako sa akong mga ambisyon.

Samtang ang pagpadayon sa edukasyon ug pag-angkon og kanunay nga kinitaan maayo nga mga buluhaton, giprayoridad ra kaayo kini nako. Nasobrahan ang akong tinguha. Nakaamgo ko nga ako magmiserable hangtod makat-on ko sa pag-usab sa akong hunahuna.

Nag-ampo ko ngadto sa Langitnong Amahan ug nangutana Kaniya kon makatabang ba Siya kanako sa pagsugod sa pagtutok unsay labing mahinungdanon. Nagsugod ko pinaagi sa pagbasa sa mga kasulatan. Samtang nagtuon ko sa mga bersikulo nga sa akong hunahuna nabasa na nako sa makadaghang higayon kaniadto, kining pamilyar nga mga istorya nagsugod sa pagkuha sa akong pagtagad. Gibati nako ang Espiritu Santo nga nakigsulti kanako!

Usa ka istorya nga nahinumdoman nako mao kadtong batan-on nga dato. Si Jesus misulti kaniya, “Kon gusto kang mahingpit, lakaw ug ibaligya ang tanan mong katigayonan. Ihatag ang halin ngadto sa mga kabos ug makabaton kag mga bahandi didto sa langit. Unya balik nganhi ug sunod kanako” (Mateo 19:21).

Sa dihang nagbasa ako niini nga istorya sa kasulatan, gibati nako nga naaghat sa paghunong ug sa paghunahuna mahitungod kon sa unsa nga paagi kini magamit nako. Sa sinugdanan, ingon og wala akoy bisan unsa nga komon sa batan-on nga dato nga magmamando—aduna na siyay iyang katigayonan ug dili andam nga makigbahin niini. Ako, sa laing bahin, dili pa dato, ug nagtuo ko nga ang akong mga paningkamot nga makaangkon og daghang kwarta matarong.

Apan sa wala madugay nakaamgo ko nga naglisod ko sa paghatag sa akong kwarta, sama sa batan-on nga dato nga magmamando. Ilabi na ang pagkonsiderar nga ako naglisod na sa paghunong sa akong tinguha alang sa daghang kwarta.

Gusto nako nga unahon pag-usab ang Langitnong Amahan diha sa akong kinabuhi. Nakahukom ko sa pag-abli sa akong journal, misulat unsay akong gibati, ug mibasa sa akong unang mga gisulat aron mas makasabot unsay nakapasugod sa akong sobra nga tinguha.

Samtang gibuhat nako kini, nakaamgo ko nga wala sa saktong han-ay ang akong mga prayoridad. Sa dihang namatikdan nako ang usa ka bahin, “Nagsige ko og hunahuna kon unsaon nako nga makaganansiya gikan sa tanan imbes nga maghunahuna mahitungod kon unsaon nako nga mahimong mas maayo o sa pagtabang sa uban.”

Sa kataposan, pinaagi sa pagtuon sa mga kasulatan, sa pagpaminaw sa Espiritu, ug sa pagsulat sa journal, nagsugod ko sa pagkausab.

Talagsaon kaayo nga mobati sa saad sa Mga Panultihon 3:5–6 nga natinuod sa akong kinabuhi:

“Salig sa Ginoo sa bug-os mong kasingkasing; ug ayaw pagsalig sa imong kaalam.

“Hinumdomi siya sa tanan mong buhaton ug tultolan ka niya sa matarong nga dalan.”

Nanglimbasog gihapon ako sa pagpalambo sa akong mga talento ug naningkamot pag-ayo sa akong edukasyon ug trabaho sa art. Ang pagpangita og pinansiyal nga seguridad sa pagsangkap sa kaugalingon ug sa atong mga pamilya usa ka matarong nga tinguha. Hinuon, kinahanglan kitang magbantay nga dili nato himoon nga mas importante ang atong paningkamot sa kalamposan ug kwarta kaysa bisan unsa pa.

Niining mga panahona, dili nako igsapayan kon mahimo ba kong inila o makakuha og tonelada nga kwarta pinaagi sa akong trabaho. Nakaamgo ko nga ang pagpuyo og kinabuhi diin ako makahigugma—ug mobati og gugma gikan sa—Langitnong Amahan ug ni Jesukristo, sa akong pamilya ug art igo na alang kanako. Dili na ako dali nga maglagot sa wala damha nga mga galastohan o sa mga kalamposan sa ubang tawo. Hinuon, mas mahalaron na ako sa ebanghelyo ni Jesukristo tungod kay nagpadayon kini sa pagluwas kanako gikan sa kinabuhi sa kahakog, pagtandi, ug kanunay nga pagkadiskontento. Ug sa dihang magsugod ako sa paghikalimot, ang mga kasulatan kanunay nga nagpahinudom kanako unsay labing importante sa kinabuhi.

Si Presidente Russell M. Nelson mitudlo:

“Samtang ang kalibotan moinsister nga ang gahom, kabtangan, kainila, ug kagana sa unod makahatag og kalipay, kini dili makahatag og kalipay! Kini dili makahatag og kalipay!

“Ang kamatuoran mao nga mas labaw nga makakapoy ang pagpangita og kalipay diin kamo dili gayod makakita niini! Pero, kon kamo makigtambayayong ni Kristo ug sa pagbuhat sa espirituhanong buhat nga gikinahanglan sa pagbuntog sa kalibotan, Siya, ug Siya lamang, ang adunay gahom sa pagtabang ninyo sa pagbuntog sa mga tentasyon niini nga kalibotan.”

Ang mga kausaban nga gitabang sa Manluluwas nga akong himoon sa akong kalag nahimong milagro. Nasayod ko nga ang kalamposan dili mahitungod sa pagmatuod unsa ako ka talagsaon o paghigot sa akong bili kon unsa ka daghan sa kwarta ang akong maangkon; mahitunggod kini sa pagbati og pasalamat alang sa oportunidad nga mosinati sa pagkamortal ug pagkakita sa talagsaong mga panalangin nga gihatag kanunay sa Langitnong Amahan kanako. Nasayod ko nga kon unahon nako Siya, ang tanan mapahimutang ra.

Moawhag ko kaninyo sa pagkonsiderar sa inyong mga prayoridad sa kinabuhi. Nakatutok ba kamo sa materyal nga mga butang ug sa unsay wala ninyo? O nakatutok ba kamo sa unsay labing importante? Pagmatinuoron sa inyong kaugalingon. Susiha kon kinahanglan ba ninyong usbon ang inyong dalan pabalik ngadto sa Manluluwas.

Kon mohimo kamo niana nga pagpili, makakaplag kamo og dugang nga kalipay kaysa inyong mahunahuna nga posible.