Paghinumdom Nganong Nagsunod Ko sa Ebanghelyo

Ni Isabelle Justice

Mga Magasin sa Simbahan

Ang pagpahinumdom sa akong kaugalingon sa akong “ngano” nagdasig nako nga magpaduol sa Manluluwas ug mopadayon sa akong espirituwal nga mga tumong.

Ang akong kinabuhi gubot usahay, apan ganahan ko sa kahupay nga akong bation kon mosulod ko sa chapel. Usa kini sa mga rason nganong ganahan ko nga moadto sa simbahan!

Ug kon mahinumdom ko sa unsay akong ganahan sa ebanghelyo—sama sa pagbati sa Espiritu Santo, pananglitan—mobati ko nga mas madasigon sa pagsunod sa akong espirituhanong mga kinaiya, sama sa pag-adto sa templo, pagbasa sa akong mga kasulatan, ug pag-ampo ngadto sa Langitnong Amahan.

Tungod kay puliki kaayo ang kinabuhi, daling makalimtan kining yano nga mga butang nga atong gihigugma. Apan ang kanunay nga pagpahinumdom sa akong kaugalingon sa mga rason ngano nga nagsunod ug nahigugma ko sa ebanghelyo ni Jesukristo nakatabang nako sa pagbag-o sa akong espirituhanong mga tumong nga mopaduol nako ngadto Kaniya ug sa Langitnong Amahan.

Pagtakda og Bag-ong Espirituwal nga mga Tumong

Sa sinugdanan sa matag tuig, gusto nakong susihon pag-usab ang akong espirituwal nga mga tumong pinaagi sa pagsulat sa mga pagbag-o sa Bag-ong Tuig. Kon naghimo ka usab og gamay nga pagpamalandong sa kaugalingon ug naghunahuna kon sa unsang paagi nga gusto nimong mapauswag ang imong relasyon ni Kristo niining bag-ong tuig, pangutan-a ang imong kaugalingon niini nga pangutana:

“Nganong gihigugma man nako ang ebanghelyo ni Jesukristo?”

Si Sister Ann M. Dibb, kanhi Ikaduhang Magtatambag sa Kinatibuk-ang Kapangulohan sa Young Women, mipasabot nga “ang atong gugma sa ebanghelyo nagtubo samtang kita nakasinati og gugma sa atong Amahan sa Langit ug sa kalinaw nga gisaad sa Manluluwas samtang kita nagpakita Kaniya nga kita andam sa pagsunod Kaniya.”

Ang pagkasayod nganong gihigugma nimo ang ebanghelyo makatabang nimo nga mobati ug makaila sa gugma sa Langitnong Amahan ug ni Jesukristo kanimo. Kini nga panghunahuna makatabang usab kanimo nga mobati nga dili kaayo mabug-atan kon maningkamot ka sa paghimo ug pagkab-ot sa imong espirituhanon nga mga katuyoan.

Ang akong “ngano” sa pagsunod ug paghigugma sa ebanghelyo ni Jesukristo naglakip sa kahibalo nga ang mga pamilya mahimong magkauban sa kahangtoran ug sa kalinaw nga akong gibati human sa usa ka talandogon nga pag-ampo ngadto sa Langitnong Amahan.

Bisan unsa pa ang imong “ngano”, hupti kini—maghatag kini kanimo og espirituhanong kusog nga imong gikinahanglan aron mahimong mas maayong disipulo ni Jesukristo.

Ang Pagsunod sa Imong “Ngano”

Sa dihang akong naamgohan ngano nga nagsunod ko sa ebanghelyo, ang paagi sa akong paghimo sa akong espirituhanong mga tumong nausab. Mihunong ko sa paghunahuna mahitungod sa unsay akong napakyas sa pagbuhat ug nahimong mas nakatutok sa unsay mahimo nakong buhaton. Nakahinumdom ko nga nagsunod ko sa ebanghelyo tungod kay gihigugma nako ang akong Manluluwas.

Si Elder Dieter F. Uchtdorf sa Korum sa Napulog Duha ka Apostoles miingon: “Atong dawaton nga ang mga sugo sa Dios dili lang usa ka lista sa maayong mga ideya. … Kini balaanon nga mga tambag, base sa mahangtorong mga kamatuoran, gihatag aron sa pagdala og ‘kalinaw niini nga kalibotan, ug kinabuhi nga dayon diha sa kalibotan nga umaabot’ [Doktrina ug mga Pakigsaad 59:23].”

Ang pagsubay sa akong espirituwal nga mga tumong nagpahinumdom nako kon si kinsa ko: balaanon nga anak sa langitnong mga ginikanan. Kana nga baroganan naghatag kanako og kaisog sa pag-atubang sa akong mga kahingawa (tan-awa sa Ether 12:27).

Si Presidente Russell M. Nelson miingon: “Ang Ginoo wala magdahom og kahingpitan gikan kanato niining puntoha sa atong mahangtorong pag-uswag. Apan Siya nagdahom gayod nga kita mag-anam-anam og kaputli.” Mao nga naningkamot ko kutob sa akong mahimo kada adlaw nga magpabiling duol ni Jesukristo ug maghinumdom nganong akong gipili ang pagsunod Kaniya.