Ang Labing Maanindot nga Adlaw

Ang akong amahan, si Claude Roy, namatay niadtong 2015, wala madugay human mabunyagi. Nianang higayona, ang akong inahan, mga igsoon, ug ako taud-taod nang mga miyembro sa Simbahan, apan sulod sa mga dekada ang akong amahan nagpabilin nga nagmagahi sa pag-apil.

Paglabay sa panahon, siya miingon, “nagmagahi ang akong kasingkasing, ug gisamokan ko sa mga pagbisita sa akong mga anak ug mga apo ug gusto nga magpalayo sa akong kaugalingon gikan sa akong pamilya. Ang mga panagbangi nagkadako diha sa akong balay, ug ang akong relasyon sa akong asawa nadaot.”

Niining higayona, nagsugod siya sa pagpangita sa iyang lumad nga mga katigulangan nga taga-Canada, kinsa mga kaliwat sa Mi’kmaq ug Huron-Wendat nga lumad nga mga tawo. Human moadto sa komunidad sa Mi’kmaq duol diin siya magtubo, gidapit siya sa usa ka powwow, usa ka seremonya sa Lumad nga Amerikano.

Atol sa gabii sa powwow, ang halangdong lider mituyhad sa iyang mga bukton ug mihangyo sa mga bata nga moduol ngadto kaniya aron siya mopanalangin kanila. Ang diskurso nga misunod sa kaimportante sa pamilya ug mga kaliwatan dunay gamhanan kaayong impluwensya sa akong amahan.

Nianang higayona, miingon siya, “Nakita nako ang akong pamilya nga mihangop nako apan gibaliwala nako sila. Napuno ako sa hilabihan nga dili mahulagway nga kasubo ingon og ang akong kasingkasing nadugmok. Nasayod ako nianang higayona nga ang Ginoo migamit sa mga pulong sa tribo sa akong mga katigulangan aron mahumok ang akong kasingkasing. Nasayod ko nga kinahanglan ko nga moduol ngadto sa akong Langitnong Amahan ug moayo sa kadaot nga akong nahimo sa akong pamilya.”

Nagsugod si Papa sa pagpakig-uli sa among pamilya, nangayo og pasaylo gikan sa matag usa nga sakop sa pamilya. Uban sa ehemplo sa iyang asawa ug mga anak, nagsugod siya sa pag-ampo ug pagbasa sa Basahon ni Mormon. Nakabasa na og daghan nga kasaysayan mahitungod sa kontinente sa Amerika, mibati siya nga nadani sa Basahon ni Mormon. Ang katinuod niini iya dayon nga namatud-an.

“Gilibotan sa akong pamilya, nabunyagan ko nga miyembro sa Ang Simbahan ni Jesukristo sa mga Santos sa Ulahing mga Adlaw,” miingon siya. “Kadto mao ang labing maanindot nga adlaw sa akong kinabuhi! Mopamatuod ko sa gahom sa usa ka mahigugmaong ehemplo. Sulod sa 36 ka tuig, ang akong asawa nagpabilin sa iyang hugot nga pagtuo ug nahimong usa ka Kristohanon nga ehemplo ngari nako, bisan og nagmagahi ang akong kasingkasing. Dayon, usa ka kataposan sa semana nausab ang tanan alang kanako.”

Ang istorya sa akong amahan maanindot nga nagpahinumdom nato nga “ang mga bukton sa kaluoy gitunol [kanato]” sa Manluluwas ug nga kon kita maghinulsol, Siya sa pagkatinuod modawat kanato (tan-awa sa Alma 5:33).