Unsaon Nako sa Paghimo og Matarong ug Tinuod nga mga Tumong?

Ni Mabel Teerlink

Mga Magasin sa Simbahan

Kining tulo ka baroganan makatabang ninyo sa pagpaningkamot sa inyong matarong nga mga tinguha pinaagi ni Jesukristo.

ang Manluluwas naghupay sa usa ka batan-ong babaye

Ang sinugdanan sa bag-ong tuig mao ang maayong panahon sa pagtinguha og bag-ong pagsugod ug paghimo og mga tumong. Apan usahay ang mga kasamok sa pamilya, pisikal nga mga sakit, mental nga mga kalisod, o ubang mga hagit makapalisod sa pagkab-ot sa atong mga tumong.

Sa pag-atubang niini nga mga babag, si Jesukristo mihimo nga posible alang nato nga “mobuhat og daghan nga mga butang diha sa [atong] kaugalingon nga gawasnon nga kabubut-on, ug magpahinabo sa daghan nga pagkamatarong;” (Doktrina ug mga Pakigsaad 58:27). Niining panahon sa pagbag-o, kining tulo ka baroganan makatabang nimo sa paghimo og matarong nga mga tumong pinaagi ni Kristo.

1. Modangop ngadto ni Kristo

Sa mga panahon sa kalisod, maghunahuna tingali kamo kon maayo ba ang paghimo og mga tumong o gani posible ba ang pagkab-ot niini. Si propeta Mormon nangutana og susama nga pangutana: “Unsaon sa paghimong posible nga kamo makahupot sa matag maayo nga butang?” (Moroni 7:20). Dayon iyang gipasabot kon sa unsa nga paagi nga ang mga tawo sa tibuok panahon migamit og “pagtuo kang Kristo; ug sa ingon niana pinaagi sa pagtuo, sila makahupot sa matag maayo nga mga butang” (Moroni 7:25).

Pinaagi sa pagtuo kang Kristo, makahimo kita ug makaangkon og maayong mga butang. Ang Iyang gahom, ang Iyang gugma, ug ang Iyang mga pagtulun-an makapahimo nato sa pagtuman sa atong matarong nga mga tinguha. Sa unang mga adlaw sa Pagpahiuli, ang Ginoo miingon ngadto sa iyang mga sulugoon, “Kon ikaw magtinguha, mamahimo ikaw nga paagi sa pagbuhat og daghan nga kaayohan niini nga henerasyon.” (Doktrina ug mga Pakigsaad 6:8).

Unsa ang gipasabot sa “pagbuhat og daghan nga kaayohan” alang ninyo? Adunay daghang paagi nga ang Dios mogamit sa tanang talagsaong mga talento ug mga hiyas sa pagtukod sa Iyang gingharian. Samtang inyong hunahunaon ang mga tumong nga gusto ninyong himoon, tinguhaa ang inspirasyon ug tabang gikan Kaniya. “Pagpakigtambag uban sa Ginoo sa tanan nimong buhaton, ug moagak siya kanimo alang sa kaayohan” (Alma 37:37).

2. Paghimo og Gamay ug Yanong mga Lakang

Diha sa mga kasulatan atong mabasa, “Pinaagi sa gagmay ug yanong mga butang, mahitabo ang dagkong mga butang” (Alma 37:6). Kini nga pagtulun-an makahimo sa atong mga tumong nga dili na kaayo makapahigawad ug mas mabuhat. Usahay ang Dios motrabaho “pinaagi sa gagmay nga pamaagi” (Alma 37:7) ug mohatag nato sa iyang pulong “pagtulon-an human sa usa ka pagtulon-an, diyotay dinhi ug diyotay didto;” (2 Nephi 28:30).

Kamo usab makahimo sa inyong mga tumong pinaagi sa “pagtulon-an human sa usa ka pagtulon-an”ug sa “ginagmay kaayo” nga mga lakang. Aniay pipila ka ehemplo sa paghimo og mga tumong sa paghimo og maayo, uban sa gagmay nga mga paagi sa pagpaningkamot ngadto sa kalamposan:

Mga Tumong	“Gagmay ug yanong” mga lakang (Alma 37:6)
Pangalagad niadtong kinsa mga kabos, masakiton, o gitakboyan.	Paggahin og gamay nga panahon sa pagpaminaw sa usa ka tawo nga nag-atubang og pagsulay.
Pakita og gugma niadtong nagmasulub-on.	Pakigtupad sa usa ka tawo nga naglingkod nga nag-inusara sa simbahan.
Pag-atiman sa mga bata, sa tigulang nga mga tawo, o niadtong adunay mga kakulangan.	Pag-eskedyul og panahon sa pagbisita og usa ka tigulang nga kaila o balay nga adunay mga tawo nga atimanonon.
Trabaho aron sa pagsangkap sa inyong kaugalingon o sa inyong pamilya.	Pangayo sa usa ka tawo nga inyong gitahod og tambag sa panarbaho.
Pagtuman sa inyong calling sa Simbahan.	Pag-ampo alang sa giya mahitungod sa inyong calling.
Boluntaryo sa mga proyekto sa komunidad o hatag og sibiko nga pagserbisyo.	Paggahin og 10–15 ka minuto mangita og mga oportunidad sa lokal nga boluntaryo.
Amumaha ang inyong lawas, hunahuna, ug espiritu sa maayong mga materyal ug mga kalihokan.	Maghimo og lista sa masustansyang mga pagkaon nga inyong makaon niining semanaha.
Magpalambo og personal nga mga kinaiya o mga naandam sa pamilya sa pagtuon sa kasulatan, pag-ampo, pagtambong sa simbahan, ug pagsimba sa templo.	Paghimo og inadlaw nga alarma o pahinumdom sa pagtuon sa mga kasulatan.
Pagserbisyo niadtong kinsa namatay na pinaagi sa paghimo sa buhat sa family history.	Log in ngadto sa FamilySearch.org ug pagkat-on sa paggamit sa dili pamilyar nga feature.
Pagpakigbahin sa ebanghelyo ni Jesukristo ngadto sa uban.	Sultihi ang usa ka higala mahitungod sa inyong paborito nga kasulatan o pakigpulong sa kinatibuk-ang komperensiya.
Pagkat-on og bag-ong mga kahanas nga makatabang ninyo sa pagpalig-on sa gingharian sa Dios.	Pangita og bidyo nga nagtudlo og kahanas nga gusto nimong makat-onan.

Sama sa gisulti ni Elder Dieter F. Uchtdorf sa Korum sa Napulog Duha ka Apostoles: “Kon motan-aw kita sa atong kinabuhi ug makakita sa gatosan ka buhatonon nga butang, mobati kita nga nabug-atan. Kon kita makakita og usa ka butang—paghigugma ug pagserbisyo sa Dios ug sa Iyang mga anak, sa gatosan ka lain-laing paagi—nan kita makahimo niadtong mga butang uban sa kalipay.”

3. Padayon sa Unahan

Kon ang inyong pag-uswag hinay o nadagma ka sa agianan, ayaw pagkawala og paglaom. Si Nephi nagtudlo kanato nga “mopadayon uban sa pagkamakanunayon ni Kristo, magbaton sa usa ka hingpit nga kahayag sa paglaom” (2 Nephi 31:20). Si Jesukristo nagbarog nga andam sa pagbayaw ninyo ug pagtabang ninyo sa pagsulay pag-usab.

Ang langit magmaya sa matag paningkamot sa pagkab-ot sa atong mga tumong, bisan og kini dili perpekto. Si Presidente Howard W. Hunter miingon: “Kitang tanan makasinati og mga saykol sa kauswagan ug mga panahon kon kita makig-away batok niining dili kapugngan nga mga hagit sa pagbaliktad. Daghang mga panalangin gikan sa Ginoo moduyog sa atong mga paningkamot ngadto sa kauswagan.”

Ang inyong Langitnong Amahan nakahibalo sa inyong mga tinguha ug sa inyong mga hagit. Makagiya Siya kaninyo ug makatabang ninyo sa inyong matarong nga mga tumong. Pag-ampo ngadto Kaniya, ug ipahinungod Niya unsay inyong nalampos, bisan unsa pa ka gamay, nga “mahimo nga kaayohan sa inyong kalag” (2 Nephi 32:9).