“Kini ang Imong Gasa,” Liahona, Enero 2025.
Mga Tingog sa mga Santos sa Ulahing mga Adlaw
Kini ang Imong Gasa
“Langitnong Amahan,” nag-ampo ko, “unsa nga gasa ang akong mapalambo aron makapanalangin ko sa Imong mga anak?”
Isip usa ka batan-ong babaye, si Yanina nadasig sa pagkahibalo nga ang pagkanta usa ka gasa nga iyang magamit sa pagpanalangin sa uban. Sa wala madugay, napili siya isip usa sa internasyonal nga mga miyembro nga mokanta uban sa Tabernacle Choir atol sa kinatibuk-ang komperensiya (litrato nga gikuha diha sa Salt Lake Tabernacle).
Sa dihang si Presidente Gordon B. Hinckley (1910–2008) mibisita sa Ecuador niadtong 1999, nakadungog ko niya nga miingon, “Bisan unsa ang inyong mahukman nga buhaton, buhata ang labing maayo nga inyong mahimo.”
Isip usa ka bata, nakat-onan nako nga ang Dios mohatag kanato og mga gasa nga motugot kanato sa pagpanalangin sa uban (tan-awa sa Moroni 10:8–18). Nag-ampo ko, “Langitnong Amahan, unsa nga gasa ang akong mapalambo aron makapanalangin ko sa Imong mga anak?”
Sa edad nga 16, nagsugod ako sa pagtuon sa pagkanta tungod sa pagdasig sa direktor sa lokal nga konserbatoryo. “Nindot ka og tingog,” gisultihan ko niya.
Sa dihang namakpak ang mga tumatan-aw human sa akong unang pasundayag sa pag-awit, usa ka hugpong sa mga pulong ang misantop sa akong hunahuna: “Kini ang imong gasa.” Mihilak ko kay gitubag ang akong pag-ampo. Sa akong nasod, hinuon, mahimong lisod ang pagpanginabuhi isip usa ka musikero. Apan nasayod ko nga ang Ginoo moandam og paagi. Busa, nagpadayon ko sa pagtuon sa pagkanta, nagtinguha nga mahimong labing maayo kutob sa akong mahimo.
Pag-edad nakog 19, gihatagan ko og scholarship aron magtuon sa gawas sa nasod. Kana nga oportunidad ug susamang mga kahigayonan, bisan pa niana, wala matuman. Sa akong pagsabot, nakita nako nga gusto sa Ginoo nga magpabilin ko sa Ecuador.
Gisultihan ko sa mga tawo nga wala koy kaugmaon sa musika tungod kay wala akoy bantogan nga edukasyon sa gawas sa nasod, bahandi, o inila nga ngalan. Apan ako nasayod nga ang Dios adunay plano alang kanako, mao nga akong gibutang ang akong talento sa pagserbisyo sa Simbahan, diin ako nagpasiugda og mga choir, nagdumala sa musika, ug misulay sa pagdasig sa uban sa pagpalambo sa ilang mga gasa ug mga talento.
Sa kadugayan, sa dihang gitanyagan kog trabaho sa usa ka estasyon sa telebisyon, nabalaka ko sa mga tentasyon nga anaa na apil sa industriya sa kalingawan. Apan ang tubag sa akong mga pag-ampo mao ang, “Dawata ang trabaho ug ipakita nga mahimo kang artist nga dili ikompromiso ang imong mga sumbanan.”
Nagtrabaho ko isip assistant sa artistic nga produksiyon sa telebisyon, isip assistant choral director sa Symphonic Choir sa Guayaquil, ug sa board sa Ecuadoran House of Culture para sa probinsya sa Guayas.
Mopamatuod ko nga posible ang pagtuman sa atong mga damgo nga dili isakripisyo ang atong mga baroganan. Karon ang akong ngalan giila sa akong nasod ug sa akong propesyon—salamat sa akong pasalig sa pagsunod sa ebanghelyo ug pagpalambo sa mga gasa nga gihatag sa Langitnong Amahan kanako.
Kon atong sundon ang kabubut-on sa atong Amahan, ang imposible mahimong posible (tan-awa sa Mateo 19:26). Nasayod ko nga nahigugma Siya kanato ug gusto nga motabang kanato sa pagpalambo sa atong mga gasa sa pagpanalangin sa uban.