Ang Mga Lider sa Young Men ug Sunday School Nagtudlo ug Naghatag og Kaayohan sa Pilipino nga Mga Santos

Si Brother Wilcox misugod sa iyang pagpangalagad sa Pilipinas pinaagi sa paghatag og pagbansay ug sa pagpakigbahin og dinasig nga mga mensahe atol sa Komperensiya sa Stake sa Camiling sa Tarlac pagka-Nobiyembre 16-17, nga si Elder Revillo ang nagdumala.

“Usa sa mahinungdanong leksiyon nga akong nakat-onan gikan ni Brother Wilcox mao ang iyang istorya bahin sa usa ka amahan nga nangutana, “Unsa man ang makuha sa akong anak kon magpabunyag siya sa Simbahan?”“, saysay ni Presidente Restituto Bajarin, ang presidente sa stake. “Kauban sa daghang tubag nga iyang gihatag, ang usa nga nakapatandog gayod nako mao ang kaayohan nga mahimong kabahin sa usa ka lig-ong grupo sa mga tawo—mga indibiduwal nga inyong kasaligan tungod kay sila mga miyembro sa Simbahan.”

Bisan kon nagserbisyo siya isip magtatambag sa kapangulohan sa Primary sa stake, si Sister Liaa Nicolas naminaw pag-ayo samtang si Brother Wilcox milatid sa gibag-o nga empasis sa Simbahan alang sa nakasentro sa panimalay, gisuportahan sa Simbahan nga programa sa kabatan-onan. “Gipasabot niya kini sa among sesyon sa pagbansay sa mga pagpangulo,” siya miingon, “ug mapasalamaton kami nga siya mihisgot niini ngari namo.”

Sa Cebu City, si Presidente Johnson mipasiugda sa paglusad sa #LightTheWorld Giving Machines sa Simbahan diha sa mall sa Robinsons Galleria sa Cebu pagka-Nobiyembre 16. Kini nga inisyatiba sa panahon sa Pasko naglangkob og talagsaong pula nga kolor nga mga vending machine diin ang mga modonar makapili og mga aytem nga gustong itabang sa gitudlo nga mga benepisaryo niini, sama sa pagkaon o mga kit sa tubig, mga suplay sa edukasyon, mga hygiene kit, ug ubang mahinungdanong mga kapanguhaan.

“Ang mga tawo mahimong moadto ug mobutang sa ilang kwarta sa Giving Machine ug mohatag og donasyon alang sa mahinungdanong kawsa nga makapanalangin sa mga kinabuhi sa mga tawo,” si Presidente Johnson mipakigbahin atol sa paglusad. “Mao kini ang nindot nga panahon sa pagtutok sa atong isigkatawo ug sa atong Manluluwas nga si Jesukristo.”

Sila si Presidente Johnson, Elder Strong, ug ubang mga representante sa Simbahan nakighimamat usab sa mga sakop sa grupo sa mga negosyante sa Cebu diha sa Lahug Stake Center. Ang mga bisita gipailaila ngadto sa sistema sa edukasyon sa Simbahan, ug gisundan sa panaghisgot kon sa unsang paagi nga ang Simbahan ug komunidad sa negosyo magkatambayayong sa pagpalambo sa mga oportunidad sa edukasyon, panginabuhian, ug panarbaho alang sa Pilipino sa kinatibuk-an.

Sa Lunes, Nobiyembre 18, si Presidente Johnson ug si Brother Wilcox mipakita og pagtahod pinaagi sa pagbisita sa Assistant Secretary nga si Georgina H. Yang sa Departamento sa Edukasyon (DepEd) sa Pasig City. Kauban nila ni Elder Strong ug Elder George Kenneth Lee, Area Seventy, ang mga lider nakighimamat ni Secretary Yang uban sa mga inisyatiba sa Simbahan alang sa edukasyon sa nasod, sama sa BYU Pathway nga programa, sa Perpetual Education Fund, ug sa BYU Hawaii Philippines Track. Gihisgotan usab nila kon sa unsang paagi nga ang Simabahan makatabang sa pagsuporta sa mga tumong ug mga katuyoan sa departamento.

Sila Brother Wilcox ug si Presidente Johnson nakighimamat sa mga misyonaryo sa Philippines Missionary Training Center (MTC) pagka Nobiyembre 19, diin ang duha ka lider mihatag og tukma sa panahon nga mga mensahe.

“Ang huyang nga mga butang, apan kadtong igo ang kaaghop,” si Presidente Johnson mipasabot sa mga misyonaryo, “nga ang Ginoo molig-on sa mga butang ug mohimong gamhanan.” Alang kang Elder Macalisang, gitawag nga moserbisyo sa Japan Fukuoka Mission, kini nga mensahe gamhanan “kay kanunay nakong gitan-aw ang akong kaugalingon isip huyang.” Ang kanindot, “ang mga pulong ni Presidente Johnson nakapabuka sa akong mga mata ngadto sa kamatuoran nga pinaagi sa Ginoo, ako mahimong molambo, malig-on, ug puno sa gahom.”

Sa iyang mensahe, si Brother Wilcox nahinumdom sa usa ka nailhan nga himno: “Kay gihatagan ko og daghan, ako mohatag usab”. Si Sister Rodriguez, usa ka misyonaryo para sa Japan Tokyo North Mission, nakapamalandong: “Ang Langitnong Amahan mihatag nako og bililhong katungod sa pagkatawo ug abunda nga mga panalangin, parehong inubanan og dakong responsibilidad.”

Sayo nianang adlawa, si Presidente Johnson ug si Brother Wilcox nakighimamat sa National Youth Commission (NYC) Chairperson nga si Joseph Francisco Ortega, nga mibisita sa opisina sa Area sa Pilipinas kuyog sa iyang kawani. Uban ni Elder Revillo, ang duha ka dagkong lider sa kalibotan mipakigbahin ni Ortega sa lig-ong pagtutok sa Simbahan sa nagtubo nga henerasyon ug kon sa unsang paagi nga ang mga programa sa Simbahan nakapanalangin sa mga kinabuhi sa Pilipino nga kabatan-onan.

Mandaluyong City / Tanay Fsy

Nagpadayon sa ilang pagtutok sa nagtubo nga henerasyon, sila si Presidente Johnson, Brother Wilcox, ug Elder Strong pormal nga mitugyan sa ekipo sa science laboratory ngadto sa City of Mandaluyong Science High School sa Mandaluyong City pagka-Nobiyembre 20. Ang mga lider sa Simbahan nakighinabi sa Grade 11 nga mga estudyante, nga malipayong mipakigbahin ngadto nila sa ilang mga science research project.

Sa kaulahian nianang adlawa, ang mga lider sa Simbahan misuroy usab sa For Strength of Youth (FSY) Facility sa Tanay, Rizal, ug namulong bahin sa kaimportante sa pagtakda og takos, gibase sa ebanghelyo nga mga tumong ngadto sa bag-ong mipauli nga mga misyonaryo (RMs) atol sa My Plan Conference nga gipahigayon sa dapit.

“Ang kalipay makaplagan kon atong buhaton ang paagi sa Dios,” si Brother Wilcox namahayag sa kabatan-onan ug sa mga Young Single Adult (YSA) nga mitambong sa debosyonal pagka-Nobiyembre 21 sa Urdaneta Stake sa Pangasinan. “Ang mga pulong ni Brother Wilcox mipahinumdom nako kon unsa ko ka dili maalamon kaniadto sa dihang kanunay ko nga nagsalig sa akong kaugalingong mga paagi imbes sa Iya,” miingon si Hans Sagabaen, usa ka naghupot og Aaronic nga Pagkapari nga taga Urdaneta 2nd Ward. “Ang pagsunod sa Iyang mga paagi nakapakita nako nga ang tinuoray nga kalipay makaplagan lamang pinaagi Kaniya.”

Sa dihang si Brother Wilcox mipaneguro nga “ang inyong mga lider nahigugma ninyo, ug ang Langitnong Amahan ug si Jesukristo nahigugma ninyo,” si Lea Baliton, usa ka sakop sa Young Women sa Asingan 1st Ward, natandog. “Akong naamgohan nga adunay mga tawo nga nahigugma nako, labi na ang Langitnong Amahan ug si Jesukristo,” siya miingon.

“Ang tibuok nga debosyonal usa ka kasinatian nga puno sa Espiritu alang nako,” miingon si Carmillete Lee, ang presidente sa Young Women sa stake. “Ang giganahan nako pag-ayo mao … dihang iyang gibalikbalik nga si ‘Jesukristo mao ang kalig-on sa kabatan-onan’.”

Niana adlawa gihapon sa Tacloban Stake, si Presidente Johnson mitudlo sa mga opisyal sa Sunday School nga “matag usa nato angayan sa inspirasyon diha sa atong piho nga nahimutangan sa calling,” atol sa Pagtutok sa Panaghisgot sa Grupo bahin sa pagtudlo sa ebanghelyo. “Akong naamgohan nga aron mapalambo ang akong pagtudlo,” mipakigbahin si Joy Alban, ang presidente sa Sunday School sa stake, “kinahanglan ko nga mangayo og tabang ug giya gikan sa Espiritu Santo aron makatabang ko og maayo sa mga panginahanglan sa akong mga estudyante.”

Si Presidente Johnson mitapos sa iyang pagbisita sa Leyte pinaagi sa usa ka debosyonal sa mga miyembro. “Himoa kining mas seryoso nga magbasa sa mga kasulatan ug sa Dali, Sunod Kanako [giya sa pagtuon sa ebanghelyo],” ang lider sa Sunday School mitambag, “ug ang gisaad nga panalangin mao, ang Ginoo makagiya nato ngadto sa mas direkta nga dalan pagawas sa atong kaugalingong mga ‘kamingawan’.”

Si Presidente Johnson ug si Brother Wilcox miabiabi sa mga bisita ug sa mga representante sa gitudlo nga mga benepisaryo sa #LightTheWorld Giving Machines sa Simbahan nga gilusad sa Trinoma Mall sa Quezon City pagka-Nobiyembre 23. Sama sa bag-o lang nga gilusad sa Cebu City, ang mga moadto sa mall makagamit sa Giving Machines sa pagpili og angay nga mga gasa alang sa mga tawo nga nanginahanglan.

Sa kaulahian nianang adlawa, si Brother Wilcox ug si Presidente Johnson miapil usab sa klase sa seminary sa stake sa Quezon City Philippines Institute of Religion (QCPIR) sa Quezon City South Stake Center, diin silang duha miawhag sa mga estudyante sa seminary nga personal nga gamiton ang tambag nga gihatag sa Doktrina ug mga Pakigsaad 6:36: “Tan-aw ngari kanako sa matag hunahuna; ayaw pagduhaduha, ayaw kahadlok.”

Si Johndrick Labrador sa Bayanihan Ward mitisok sa iyang kasingkasing sa duha ka importante nga mga butang nga gihatag ni Presidente Johnson ug ni Brother Wilcox: “Una, mogahin og hilom nga panahon aron atong madungog ug mabati ang Espiritu Santo, ug ikaduha, maningkamot sa pagpaminaw sa mga pag-aghat sa Espiritu Santo aron madawat ninyo ug sa uban ang gisaad nga mga panalangin.”

“Kita murag makaingon nga unta wala nay mga hangin, wala nay mga balod, wala nay mga hagit sa kinabuhi,” si Presidente Johnson nagpasabot sa pisikal ug espirituwal nga mga kalamidad nga giatubang sa mga Pilipino atol sa iyang pakigpulong sa Komperensiya sa Stake sa Lubao sa Pampanga pagka-Nobiyembre 24. “Apan kini nga mga hangin ug mga balod makatabang nato nga mamahimo nga mga tawo nga kita kinahanglan nga mamahimo sa umaabot.”

Si Ceejay Lapuz, nga nagserbisyo sa bishopric sa Dinalupihan Ward, mihunong aron maghunahuna. “ Sulod sa dugay nga panahon, naghunahuna ko nga ang kinabuhi unta walay mga kalisdanan ug nga haruhay nga maglawig,” siya miasoy, “apan akong nakita nga kini nga mga pagsulay mao ang paagi sa Langitnong Amahan sa paggiya nako paingon sa gisaad nga yuta.”

Namulong sa multi-stake nga debosyonal sa kabatan-onan sa Makati East Stake Center sa Comembo, Taguig City sa Nobiyembre 24 gihapon, si Brother Wilcox mipailaila og komon nga pulong sa Chile diin nagserbisyo siya isip presidente sa misyon: “A mi manera”. Literal nga nagpasabot “akong paagi”, si Brother Wilcox mipasabot nga nagpadangat usab kini og usa ka kinaiya sa “pagbuhat sa mga butang sa atong paagi.”

Si Brother Wilcox mipasabot nga kana nga kinaiya dili makatabang nato nga makab-ot ang atong langitnong potensiyal. “Gusto Niya nga magmalipayon kita,” ang kinatibuk-ang opisyal sa Young Men mipasabot, “apan makaplagan lamang nato ang kalipay kon kita makakat-on sa pagbuhat niini sa Iyang paagi ug dili sa atong paagi ug kon buhaton nato kita, makakaplag sa tanang matang sa kalipay.”

Si EJ Silva mitan-aw og balik sa tanang pagpili nga iyang nahimo. “Akong nahinumdoman ang akong gibati sa dihang akong gibuhat ang mga butang sa “Iyang paagi”, ilabi na sa paghimo og mga tumong ug sa pagtuman niini,” miingon si Brother Silva, usa ka tigtambag sa Young Men sa ward. “Usa kini ka pagpahinumdom nga bisan kon kita adunay lainlaing mga prayoridad sa atong mga kinabuhi, kinahanglang buhaton nato ang mga butang sa “Iyang paagi” bisan unsa pa kini.”

Si Brother Wilcox mipakigbahin usab: “Ang Dios mihatag nato sa Iyang numero sa telepono. Siya mihatag nato sa Iyang mga sugo. Siya misulti nato kon unsaon nga kita makakonekta Kaniya, ug dili nato kini mabuhat sa atong paagi; kinahanglan nga kita mobuhat niini sa Iyang paagi.” Kini ang mga pulong nga maoy hinungdan nga si Abish Orilla, presidente sa klase sa Young Women, nga maghunahuna: “Usahay masuko kita kay dili nato mabuhat ang mga butang sa atong kaugalingong paagi, apan ang Langitnong Amahan nagtudlo kanato nga Siya nasayod sa tanan, nasayod unsay labing maayo.”

Isip presidente sa Young Women sa Bonifacio 6th Ward, si Joanna Liahona Leoncio mibati og mas lawom nga responsibilidad sa pagtabang sa mga batan-ong babaye nga iyang giserbisyohan. “Ang mga pulong ni Brother Wilcox nagpahinumdom nako nga ang pagtudlo sa pagkamasulundon ug pagsalig dili lamang mahitungod sa pagpakigbahin sa mga lagda,” karon iyang nakita, “mahitungod usab kini sa pagtabang nila nga makita kon sa unsang paagi nga ang ilang mga pagpili makaapekto sa ilang relasyon sa Dios.”

USA ka Komon nga Tema

Atol sa ilang napulo ka adlaw nga pagpangalagad, ang usa ka tawo makaila og usa ka komon nga tema nga gipakigbahin nila ni Presidente Johnson ug Brother Wilcox: Mopaduol ngadto sa Langitnong Amahan ug ni Jesukristo ug kami mosaad kaninyo nga kamo mapanalanginan gayod sa hilabihan. Makita kini sa mga pagbati nga gipakigbahin sa Pilipino nga mga Santos nga ilang giadtoan.

“Ang mas taas nga balaod naglakip sa mas ubos nga balaod,” si Brother Wilcox nagtudlo sa kabatan-onan nga nagpundok sa Makati East Stake Center, “ug motabang kini sa pagbayaw sa atong mga kaugalingon dili lamang sa pagbuhat sa saktong butang apan sa pagbuhat niini sa saktong rason, sa pagbuhat niini inubanan sa saktong tinguha, ug sa saktong pagdasig.”

Si Kevin Chester Benitez mapasalamaton kaayo sa pakigpulong ni Brother Wilcox, kay nagpahinumdom kini kaniya nga “ang mas lisod nga paagi mao ang adunay mas dakong mga ganti, ug ang ganti nga kinahanglan natong itumong, mao ang pagbaton og kinabuhing dayon ug pagpakabuhi nga mas duol kang Jesukristo ug sa Langitnong Amahan.”

Sa dihang si Presidente Johnson mihisgot ngadto sa mga miyembro sa Lubao Stake sa pisikal ug espirituwal nga mga hagit nga giatubang sa mga Pilipino, siya mitudlo usab nila nga kining tanan sa kaulahian mosangpot ngadto sa usa ka mahimayaong padulngan: “Ang mga balod, ang mga hagit sa atong mga kinabuhi, ang naghaguros nga mga hangin, motukmod nato paingon sa gisaad nga yuta. Motabang kini kanato nga mamahimong matang sa mga tawo nga kita kinahanglang mamahimo sa umaabot.”

Si Jillian Caryl Santiago, magtatambag sa kapangulohan sa Relief Society sa stake, napahinumdoman bahin “sa ngitngit ug lisod nga katuigan” nga iyang nalahutay. Karon, makasulti siya nga siya anaa na sa “mas maayo nga dapit.” Ang iyang pagpamatuod segurado nga makapalipay ni Presidente Johnson ug ni Brother Wilcox: “Nasayod ko nga kon kita mosalig sa Ginoo alang sa paglaom ug kalig-on, sa kaulahian atong mabuntog ang mga unos sa atong mga kinabuhi ug mahimong sama kang Kristo nga bersiyon sa atong mga kaugalingon.”