Ang Sistema sang Aton Langitnon nga Giya
Kon itutok naton ang aton mga kabuhi kay Jesucristo, matultulan naton ang alagyan papauli, nga nagapadayon hasta sa katapusan kag nagakalipay hasta sa katapusan.
Ginbag-o ni Jesucristo ang akon kabuhi sang ginbunyagan ako sa edad nga 26 anyos sa pinalangga ko nga Frutillar, Chile. Sadto, nagatabok-tabok ako sa kadagatan, mga suba, kag mga linaw sang matahum nga Chilean Patagonia tungod sa akon trabaho. Sang mabunyagan ako, nagbag-o kag naglain ang panan-awan ko sa akon obra kag kabuhi, nga nagakilala nga “ang tanan nga butang nagapakita nga may Dios.”
Sa kinaugali, ang mga salmon ginabata sa ginhalinan sang mga suba. Sa isa ka punto sang ila kabuhi, kinahanglan nila maglangoy pailawod para makalab-ot sa dagat, kon diin sila makakita sang sustansya kag kondisyon nga kinahanglan nila para magtubo.
Pero ang dagat delikado man nga lugar kon diin may nagapanago nga mga manunukob kag may mga mangingisda nga nagapanakop sang salmon gamit ang matahum nga mga paon nga kuno abi pagkaon pero indi makabusog sa ila. Kon malampuwasan sang mga salmon ini nga mga peligro, mangin handa na sila sa paggamit sang ila mabaskog nga sistema sang giya sa pagbalik sa lugar kon diin sila ginbata, para mag-atubang sang bag-o kag kilala na ngadaan nga mga hangkat. Tinuig nga gintun-an sang mga siyentipiko ang ila pagsaylo-saylo kag nadiskubre nila nga may ginagamit sila nga isa ka klase sang magnetic map, nga daw pareho sa GPS, para giyahan sila pakadto sa ila katapusan nga destinasyon nga grabe kainsakto.
Tanan kita sarang makabalik sa aton langitnon nga puluy-an kon diin kita naghalin sa pila ka adlaw. Kag pareho sa mga salmon, may ara man kita sang aton magnetic map, ukon Kasanag ni Cristo, para giyahan kita pabalik didto. Gintudlo ni Jesus sa Iya mga disipulo, “Ako amo ang dalan, ang kamatuoran, kag ang kabuhi, wala sing may makakadto sa Amay kon indi paagi sa akon.”
Kon itutok naton ang aton mga kabuhi kay Jesucristo, matultulan naton ang alagyan papauli, nga nagapadayon hasta sa katapusan kag nagakalipay hasta sa katapusan. Gintudlo ni Pangulong Russell M. Nelson nga “ang kalipay nga aton mabatyagan halos wala sing kalabtanan sa mga sirkumstansya sang aton mga kabuhi kag may dako kaayo nga kalabtanan sa ginatutokan sang aton mga kabuhi.”
Ang Aton Diosnon nga Kinaiya kag Kapalaran
Sa proklamasyon sang pamilya, mabasa naton nga “ang kada isa [sa aton] isa ka pinalangga nga espiritu nga anak nga lalaki ukon anak nga babayi sang langitnon nga mga ginikanan, kag tungod sina, ang kada isa may diosnon nga kinaiya kag kapalaran. … Sa kalibutan sang wala pa mabun-ag, ang espiritu nga mga anak nga lalaki kag mga anak nga babayi nakakilala kag nagasimba sa Dios bilang ila Wala’y Katapusan nga Amay kag nagbaton sang Iya plano nga paagi sa sini ang Iya mga kabataan sarang makaangkon sing isa ka pisikal nga lawas kag makaagom sang dutan-on nga inagihan sa pag-uswag padulong sa kahimpitan kag sa katapusan makalab-ot sa ila diosnon nga kapalaran bilang mga manunubli sang kabuhi nga wala’y katapusan.”
Antes Sia mabata sa mortalidad, nagpakita si Jesucristo kay Moises kag nakighambal sa iya para sa Iya Amay. Siling Niya kay Moises nga may dako sia nga buluhaton nga ipaobra sa iya. Sa sina nga pagpakigkita, kapila sia gintawag sang Ginuo nga “anak ko”.
Pagkatapos sina nga eksperiyensya, nag-abot si Satanas kag gintentar sia, nga nagasiling, “Moises, anak sang tawo, simbaha ako.”
Ginsabat ni Moises ang tentasyon paagi sa pagdumdum sang iya diosnon nga kinaiya, nga nagasiling, “Sin-o ka? Kay lantawa, ako anak sang Dios.” Kamatuoran ang naghilway kay Moises sa pag-atake sang kaaway.
Mga kauturan, matuod ang mga paon sang mortalidad. Masami makagalanyat sila, pero isa lang ang ila tuyo: para ilikaw kita sa ilig sang buhi nga mga tubig nga nagadul-ong sa Amay kag kabuhi nga wala katapusan.
Nahibal-an ko kon daw ano kamatuod ang mga paon sang mortalidad. Isa ka Domingo, bilang bag-o nga miyembro, nagatudlo ako sang klase sa priesthood sang nagsugod ang masaw-a nga diskusyon. Ginbudlayan ako nga tapuson ang akon leksyon. Nasaklaw ako kag pamatyag ko ako ang biktima. Wala huluhambal, nagdiretso ako gwa nga nagapamensar nga indi ako anay magbalik sa simbahan.
Sa sina mismo nga tion, isa ka nagaulikid nga priesthood holder ang nagtindog sa akon atubang. Mapinalanggaon niya ako nga ginhagad nga magtutok kay Cristo kag indi sa sitwasyon nga naeksperiyensyahan namon sa klase. Sang ginbalikan ko ina nga eksperiyensya, ginhambal niya sa akon nga nakabati sia sang tingug nga naghambal sa iya, “Lagsa sia; importante sia sa akon.”
Pinalangga kong kaabyanan, tanan kita importante sa Iya. Gintudlo ni Pangulong Nelson nga “tungod sang aton kasugtanan sa Dios, indi Sia magkataka sa Iya pagpaninguha nga buligan kita, kag indi naton maubos ang Iya maluluy-on nga pasensya para sa aton.” Ang aton diosnon nga kinaiya kag kaangtanan sa kasugtanan nagahatag sa aton sang kinamatarong nga magbaton sang diosnon nga bulig.
Ang Kakinahanglan sang Sustansya
Pareho sang mga salmon nga nagakinahanglan saguron sang dagat para magtubo, kinahanglan man naton saguron ang aton kaugalingon sa espirituhahon para malikawan naton nga mapatay sa espiritwal nga malnutrisyon. Ang pangamuyo, balaan nga kasulatan, ang templo, kag ang regular naton nga pagsimba kon Domingo importante sa aton espiritwal nga kalan-on.
Sang Nobyembre 1956, si Ricardo García nagsulod sa mga tubig sang pagbunyag sa Chile, kag nangin una nga miyembro sang Simbahan sa akon pungsod. Sang adlaw antes sia mapatay, ginhambal niya sa atubang sang iya pamilya kag kaabyanan, “Madamo nga tinuig ang nagligad, gin-imbitar ako sang mga misyonero nga mangin malipayon upod sa akon pamilya. Malipayon ako nga tawo. Ihambal sa tanan sa Chile nga ang ebanghelyo kalipay.”
Pagkatapos nga saguron sang ebanghelyo ni Jesucristo, gindedikar ni Ricardo ang bilog niya nga kabuhi sa pagserbisyo sa Dios kag sa iya isigkatawo nga may pagpalangga. Ang iya ehemplo sang pagkadisipulo nagbugay sang mga henerasyon, dala na sa akon. Gintudlo ni Propeta Joseph Smith nga “ang tawo nga puno sang pagpalangga sang Dios indi makontento sa pagbugay sang iya pamilya lamang, kundi nagalab-ot sa bilog nga kalibutan, nga malipayon sa pagbugay sang bilog nga katawhan.”
Pagbalik sa Aton Langitnon nga Puluy-an
Ara sa sulod sang kada isa sa aton ang handum nga magbalik sa aton langitnon nga puluy-an, kag si Jesucristo amo ang aton sistema sang langitnon nga giya. Sia ang dalan. Ginpatigayon sang Iya nagabayad-sala nga sakripisyo nga makahimo kita sang sagrado nga mga kasugtanan upod sa Dios. Kon makahimo na kita sang mga kasugtanan, makita naton kon kaisa ang aton kaugalingon nga nagalangoy kontra sa ilig. Ang peligro, kapaslawan, tentasyon, kag kabudlayan magatilaw sang aton pagtuo kag espirituhanon nga kusog. Magpangayo sang bulig. Nakaintiendi si Jesucristo kag handa pirme nga magbulig sa aton mga palas-anon.
Tandai nga nakilala Sia bilang “lalaki sa mga kasubo, kag nakakilala sang kalisud.” Ang Manluluwas nagtudlo, “Ang kalibutan magapaantos sa inyo, pero magpakaisog kamo! Gindaog ko na ang kalibutan!” Ginatugot sang Iya nagabayad-sala nga sakripisyo nga mapatawad ang aton mga sala hasta nga indi na Niya ini madumduman.
Mahimo nga indi naton lubos nga malimtan ang aton mga sala bilang bahin sang aton mortal nga pagtuon para madumduman naton nga indi na ini pagliwaton. Sa baylo, madumduman naton Sia samtang nagaambit kita sang sakramento sa simbahan kada Domingo. Ini nga ordinansa kinahanglanon nga bahin sang pagsimba kag espirituhanon nga pagtubo. Nagaabot ang kalipay kon maintiendihan naton nga indi lang ini isa ka simple nga adlaw. “Ang adlaw nga inugsimba ginhimo para sa kaayuhan sang tawo” nga may tuyo nga hatagan kita sang kapahuwayan sa kalibutan kag pagpabaskog sang aton lawas kag espiritu.
Ginadumdom man naton Sia kon magkadto kita sa templo—sa balay sang Ginuo. Ang mga templo nagahatag sa aton sang mas madalom nga ihibalo parte kay Jesucristo bilang sentro sang kasugtanan nga nagadala sa aton sa kabuhi nga wala katapusan, “ang pinakadako sa … mga regalo sang Dios.”
Ang pagkadto sa templo nagahatag sa akon sang kaumpawan kag dako nga paglaum parte sa aton wala katapusan nga kapalaran. Nakaeksperiyensya ako sang langitnon nga koneksyon sa mga tawo sa magtimbang nga bahin sang kabuhi. Nakita ko ang nagapang-ayo nga mga milagro sa mga kabuhi sang akon kabataan, ang duha sa ila may indi makita nga mga balatian nga nagakinahanglan sang adlaw-adlaw nga pag-atipan sa bilog nila nga kabuhi.
Nagakalipay ang amon pamilya samtang ginapakigbahin namon ang plano sang kalipayan. Nagasanag ang mga guya sang akon kabataan kon mabatian nila, nga tungod kay Jesucristo, ang ila “mga pag-antos mangin sa malip-ot lamang nga tion.” Palangga namon kaayo ang amon kabataan, kag kahibalo kami nga pila ka adlaw, sa gintudlo ni Pangulong Jeffrey R. Holland, sila “magatindog sa amon atubang nga ginhimaya kag halangdon, perpekto sa katahum sa lawas kag kaisipan.” Ang aton mga kasugtanan nagalapit sa aton sa Dios sa punto nga mangin posible ang imposible, nga ginapuno ang espasyo sang kadulom kag pagduhaduha sang kasanag kag kalinong.
Salamat kay Jesucristo, may paglaum kag mabakod nga mga rason para magpadayon sa pagpalangga, pagpangamuyo, kag pagsuporta sa mga tawo nga aton ginaulikdan.
Kahibalo ako nga buhi Sia. Kilala Niya kita kag palangga Niya kita. Sia ang dalan, ang kamatuoran, kag kabuhi sang kalibutan.
Ginahagad ko ang tanan sa aton nga isentro ang aton mga kabuhi kay Jesucristo kag sa Iya mga pinanudlo. Ang paghimo sini magabulig sa aton nga malikawan ang masakit nga mga paon sang tentasyon, kasaklaw, kag kaluoy sa kaugalingon. Magatindog kita pareho sa mga templo—balaan, malig-on, kag nagapadayon. Atubangon naton ang mga bagyo, kag makapauli kita, nga nagapadayon hasta sa katapusan kag nagakalipay hasta sa katapusan. Sa ngalan ni Jesucristo, amen.